Mbembe Adun [mfn]
Ichedendik 33
Ẹmẹm ch'Jekọb ọmaana Ẹsau
Jekọb otinẹ ichen, oze bẹ́, Ẹsau okwuma, ọmaana anọng ẹnọhna pẹ. Minna kw'okebhẹ iva pẹ ọnang Lea, ọmaana Rachẹl, ọttara atọhmnọng pẹ p'panọng afa. Osok atọhmnọng pẹ, ttara iva pabẹ z'ititika, Lea ọmaana iva pẹ mator bẹ, pira Rachẹl ọmaana Josẹph nnakpong nnam. Kẹ oyenẹ ochi bẹ eden. K'ose kw'ọd-ọnyọma ọgbaanọkka, ọraka otima eso ny'izek ọnang-ẹ, igbedim ichenọmfa.
Ẹsau oter otima ẹbhar, od-ọwọhmọ Jekọb, ọgaar-ẹ mbọhk z'ẹdọngọ, ọbaak-ẹ. Bẹ anọng afa, masọhrọ asen. Ẹsau otinẹ ichen okkerẹ, oze panọng ọmaana iva mbo, ọbọbh Jekọb bẹ́, “Bọng-anọng bọ matọnọ ma?”
Jekọb ọpọhn-ẹ bẹ́, “Iva p'Ibinọkpaabyi ikk'ọphyaam fẹ otima ọnang ọtọhmnọng kwọ bọ e.”
Nya o, atọhmnọng pẹ p'panọng, ọmaana iva pabẹ, mazenga anyọma Esau, maraka nso anang-ẹ. Ọpọhn za, Lea, ọmaana iva pẹ, maraka nso anang-ẹ. Pira Rachẹl, ọmaana Josẹph nnakpong nnam makwu araka nso anang-ẹ.
Ẹsau ọbọbh Jekọb bẹ́, “Etirakpo mbya maphyir py'nkebh ma, eyinẹ yen o?”
Jekọb ọpọhn-ẹ bẹ́, “Atte, ntim pyẹ bẹ́, nsi ettem ẹdaam-ọ ẹmaan-m e.”
Ẹsau ọpọhn-ẹ bẹ́, “Mma e, agbaanakka kwaam. Kaam kk'ekpo ntera nyena k'ọsaabh e. Kọ tera sok mbyo py'ikk'ayena za.” Jekọb ọpọhn-ẹ bẹ́, “Mma e, nkwuk-ọ-okwukọ! Ó̱de ikk'ọ ndaaka z'ettem, tọka ẹnanga nda chaam. Kirẹ ẹza ch'nzọ-ọ ma, ode mach'nze ititika s'Ibinọkpaabyi, ch'ikọ kk'aam abir atọka k'ettem ọkkọkka. Ototo, tọka ẹnanga nda ch'nnang-ọ, okurọ bẹ́, Ibinọkpaabyi kk'ọphyaam ọsa ọnang-m. Kaam nyen ọttọhk kpenamkpen f'nnorọ.” Ẹsau okwu oze bẹ́, Jekọb obe ny'odik kwẹ, ofona nya, ochera ọmaan-ẹ, ọtọka ẹnanga ndo.
Ẹsau oben-ẹ bẹ́, “Tte mọtọma ozenga. Kaam m'nchọ-ọ eden.” Jekọb ọpọhn-ẹ bẹ́, “Atte kwaam azong ma bẹ́, iva mba atim achamẹ ọkpan, ọmaana bẹ́, kaam m'nkkerẹ etirakpo py'etim ẹrọkọ iva pabẹ ọrọk. Ó̱de nna bẹ ma bẹẹm ayaarẹ, zaabẹ́ ewu madanẹ dọ, mm'ape-ope. Tte atte kwaam ochi ọtọhmnọng kwẹ eden, kaam m'nyaar nyaak-ẹ nnam, ma bẹm bẹm k'ose kw'ina etirakpo mbyo, ọmaana iva pabẹ mọkọhn maa, nkebha atte kwaam z'Seir.”
Ẹsau oben Jekọb bẹ́, “Ó̱de ode minna, tte nnang-ọ ajinọng banẹ paam, matọn afona kẹ.”
Okenaka, Jekọb ọpọhn-ẹ bẹ́, “Kayen kw'masi minna? Bung-bungọ f'nnorọ ode bẹ́, nyena ọdaam f'ikọ atte kwaam.”
Minna kw'Ẹsau ọtọm ozenga ny'ewu ndo, ọkpa nnam z'Seir. Okenaka, Jekọb ochina z'Sukọt, od-osi ọsọhm kwẹ za, obir osi okkira f'etirakpo pyẹ. Kẹ wọ osi, makpe ibyi njo bẹ́, Sukọt1.
Ch'Jekọb obin z'Padan-Aram opyirẹ z'ebhondim ch'Shẹkẹm, z'ẹkọma ch'Kenaan, osi ibhinga-byi ọnyọma Shẹkẹm. Wa Jekọb otim asilva arọbh achen, odebh izek s'ottim ikkira sẹ. Iva p'Hamọr kw'ode otte kw'Shẹkẹm, bẹ bọ uwa makpẹ-ẹ izek njo. Nya wọ kw'osi ija-byi s'Ibinọkpaabyi, okpe sẹ bẹ́, Ẹl Ẹlọhe Israẹl.2
Source notes (2)
- Footnote Sukọt oyinẹ bẹ́, okkira.
- Footnote Ẹl Ẹlọhe oyinẹ bẹ́, Ibinọkpaabyi wọ ode Ibinọkpaabyi kw'Israẹl.
Mbembe Adun [mfn]. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.