ዓይኑሞ ማፃኣፖ 91

ፆኦሲኮ ካፒፆ

1ናንጊና ናንጋ ጎዳ ፑኖ ካይዚ ማሂ ናንጋ ዓሲ

ቢያ ባኮ ዳንዳዓ ፆኦዛሢ ሺባ ዎርቃኔ።

2ታኣኒ ዒዛ፦ «ታኣኮ ፑኖ ካያሢ፥ ዋርዲዮ ቤዛሢ፤

ጊንሣ ሃሣ ጉሙርቆ ፆኦዛሢ ጋዓኔ።

3ዒዚ ዓኣቺንቴ ፒራሢና

ዎዻኒ ዳንዳዓ ዶርዓሢናይዳፓ

ኔና ካፓኔ።

4ዒዚ ፔ ጋፓኖና ኔና ዓኣቻንዳኔ፤

ዒዛኮ ጋኣዞ ዴማ ዓኣሺንቶ ቤሲ ኔ ዴንቃንዳኔ፤

ጉሙርቂንቲፃ ዒዛሲ ጊቲማጉዲ ኔና ቃዛያ ማዓንዳኔ።»

5«ዹሞኮ ዲቃሢፆይዳፓ

ሮኦሮናኣ ዱኮ ሂኢዦ ኔ ዒጊጫዓኬ።

6ዹሚና ሃንታ ፑርታ ባኣዚዳፓ

ዓቢ ሮኦሪ ሙካ ባይሲንታኣ ኔ ሂርጋዓኬ።»

7«ኮይሎይዳ ኔኤኮ ሺያ፤

ሚዛቆ ዛሎና ታጶ ሺያ ሎኦማንዳኔ፤

ጋዓንቴ ዬይ ኔ ባንሢ ዑካዓኬ።

8ኔኤኒ ኔኤኮ ዓኣፖና ሌሊ ዬያ ዛጋንዳኔ፤

ፑርቶ ዓሳ ሜታሢ ዔካሢ ዛጊ ኔ ዛጋንዳኔ።»

9«ናንጊና ናንጋ ጎዳ ኔኤኮ ዓኣሺንቶ ቤዛሢ

ዼኤፖ ፆኦዛሢያ ፑኖ ካያሢ

ኔኤኒ ማሄኔ።

10ዬያሮ ፑርታ ባኣዚ ኔና ሄላዓኬ፤

ባይዛ ሃይቢያ ኔ ማኣሪ ጌላዓኬ።

11ኔ ሃንታ ጎይፃ ቢያ ኔና ዒ ካፓንዳጉዲ

ኪኢታንቾ ዒዚ ኔኤም ጌዒ ዓይሣንዳኔ። 1

12ቶካ ኔኤኮ ሹጮይዳ ዹቂንቱዋጉዲ

ዔያታ ፔኤኮ ኩጮና ኔና ኬዲ ዓርቃንዳኔ። 2

13ዞቦንታ ዶርቦ ሾኦዦንታይዳ ኔ ሄርቃንዳኔ፤

ሃጊ ዔቃ ዓዶ ዞቦንታ ቃራሢያ ኔኤኒ ዒማይዳንዳኔ።» 3

14ናንጊና ናንጋ ጎዳ ሂዚ ጋዓኔ፦

«ታና ዒ ናሽኬሢሮ ታ ዒዛ ሄሊ ዓውሳንዳኔ፤

ታ ሱንፆ ዒዚ ዔሬሢሮ ታ ዒዛ ጎኦቢ ዓይሳንዳኔ።

15ዒዚ ታና ዔኤላኣና ታ ዋይዛንዳኔ፤

ዒዛኮ ሜታሢ ዎዶና ዒዛና ማዓንዳኔ፤

ታ ዒዛ ዓውሳንዳኔ፥ ቦንቻንዳኔ።

16ሚርጌ ሌዔ ዒዛ ታ ናንጊሻንዳኔ፤

ታኣኮ ዓውሲፆዋ ዒዛም ዻዋንዳኔ።»