ዓይኑሞ ማፃኣፖ 65

ዓይኑሞ ሱኡጋሢ ዓይሣ ጎይፆና ዓይናዺንታ ዳውቴኮ ጋላታ ዓይኑሞ

ፆኦሲ ጋላቲሢና ቦንቺሢ

1ፆኦሲዮ! ፂዮኔይዳ ጋላታ ኔኤም ኮይሳኔ፤

ኔኤም ኑኡኒ ናኣቤ ናኣቦዋ ዒንጊ ኩንሣንዳኔ።

2ኔኤኒ ሺኢጲሢ ዋይዛያ ማዔሢሮ

ዓሲ ቢያ ኔ ባንሢ ሙካንዳኔ።

3ጎማ ኑና ኩሚ ባይዜ ዎዶና

ኔኤኒ ኑ ዻቢንቶ ዓቶም ጌዔኔ።

4ኔኤኒ ዶኦሬ፥ ኔ ባንሢያ ኔ ዑኪሴ

ዓሳ ቡካ ጶኦካ ኔ ጌሤዞንሢ ዎዛዾንጎ፤

ኔኤኮ ዱማዼ ጌኤዦ ማኣራፓ

ኔ ኬኤፃፓ ዓንጆ ኑ ሚሽካንዳኔ።

5ኑና ዓውሳ ፆኦዛሢዮ!

ኔኤኮ ዲቃሣ ፂሉሞና ኑኡም ማሄ፤

ኔኤኒ ሳዖኮ ጋፖም ቢያ

ሃኬ ዓኣ ባዞማኣ ጉሙርሳ ዎዛሢኬ።

6ዹኮ ኔኤኒ ኔ ዶዱሞና ማዤኔ፤

ዎልቆዋ ኔኤኮ ኔኤኒ ቱኡቴኔ።

7ኔኤኒ ባዞኮ ዖኦዢፆ

ባዞ ጉዳሢኮዋ ጉኡሚፆ

ዴሮኮዋ ዣላሢ ኔ ዚቲዳኔ።

8ሳዖኮ ጋፓ ሃኬ ዓኣሢ

ኔኤኮ ዲቃሣ ዓኮ ማዾሮ ዲቃታኔ፤

ካሪፆንታ ዓሚፆንታ ሙካኣና

ዎዛዺ ዒላሻንዳጉዲ ኔ ማሃኔ።

9ሳዖም ዒርዚ ኔ ዋርቂሻኔ፤

ዔባ ዓኣፓንዳጉዲ ማሂሢና ዖርጎቻኔ፤

ዎሮ ዋኣሢና ኔ ኩንሣኔ፤

ሳዖይዳ ሃኣኮ ኔ ባቃልሳኔ፤

ዬያ ኔ ማዻሢያ ሂዲኬ፦

10ጎሽኪንቴ ጎዦይዳ ዒርዚ ኔ ዋርቂሳኔ፤

ሂርኪ ዼግ ጋዓ ቤዞ ኔ ጊኢጊሻኔ፤

ሳዖ ዓጮ ዒሮኮ ዑኡፖና ኔ ዎዒሳኔ፤

ባቃሎ ባቃልሲ ኔ ዑጊሳኔ።

11ኔ ኮሹሞና ካፃ ሃኣካ ዎዚ ሚርጋይ!

ኔ ዓኣ ቤዛ ቢያ ሚርጌ ሃኣኮ ዓኣኔ።

12ዓሳ ናንጉዋ ዳውላ ሚርጌ ማኣቲ ዋርቄኔ፤

ጌሜራኣ ዎዛና ኩሜኔ።

13ቦኦላዻ ጊንፃ ቆልሞ ሌሊ ማዔኔ፤

ዶኦጮ ጊንፃኣ ሃኣኮና ኩሜኔ፤

ዬያሮ ቢያሢ ዎዛዺ ዒላሺሢና ኔኤም ዓይናዻኔ።