ዓይኑሞ ማፃኣፖ 64

ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ

ሜታፓ ቶሊ ኬስካኒ ሺኢቂንቴ ሺኢጲሢ

1ፆኦሲዮ! ታኣኮ ሜቶሮ ኔና ታ ሺኢቃሢ ዋይዜ፤

ታ ሞርካ ታና ዒጊቻሢዳፓ ታና ካፔ።

2ፑርቶ ዓሳ ታ ጊዳ ጌኔ ማሊሢና ዔቄሢፓ

ዔያቶኮ ዎጎ ዎጋኒ ቡኮሢዳፓኣ ታና ዓይሴ።

3ዔያታ ዒንዲርዞ ፔኤኮ ዓዳ ጬንቻ ዓፓሮጉዲ ዋርቃኔ፤

ዔያቶኮ ጫንጮ ዑኡዛ ሂኢሺጉዲ ዱካኔ።

4ካቲ ዴዒ ፂሎ ዓሶ ዔያታ ዱካኔ፤

ዓሳ ማሊባኣንቴ ዒጊጩዋዖ ዱካኔ።

5ፑርታ ባኣዚ ማዻኒ ዎላ ዞርታኔ፤

ፒራሢያ ዓኣቺ ፒራኒ ዔያታ ጌስታኔ፤

ዔያታ ዬያ ቢያ ሂዳዖ፦

«ዖኦኒያ ዴንቃኒ ኑና ዳንዳዑዋሴ» ጋዓኔ።

6ዔያታ ጌኔ ማሊሢ ማሊ ቱኬስካፓ፦

«ዓካሪ ፑርታ ማሊሢ ዶዲ ኑኡኒ ቱኬኔ» ጋዓኔ።

ዬይያ፦

ዓሲኮ ዒናንታ ማሊሢያ ጌኔ ባኣዚና ኩሜያ ማዒፆ ዔርዛኔ።

7ፆኦሲ ጋዓንቴ ዔያቶ ፔ ሂኢዦና ዱካንዳኔ፤

ዔያታ ማሊባኣዖ ማኣሳናንዳኔ።

8ፔ ዻንጎና ዔያታ ዹቂንታንዳኔ፤

ባይሲንታ ዔያቶ ሄላንዳኔ፤

ዬያሮ ዔያቶ ዛጋ ዓሳ ቢያ ዔያቶ ዾንኪ

ቶኦኮ ፔኤሲ ዓጊሣንዳኔ።

9ዓሲ ቢያ ዒጊጫንዳኔ፤

ፆኦሲ ማዼ ባኮ ፔጌና ዔያታ ኬኤዛንዳኔ፤

ዒናፓኣ ዔያታ ማላንዳኔ።

10ፂሎ ዓሳ ፆኦሲና ዎዛዾንጎ፤

ዒዛ ፔኤኮ ፑኖ ካያሢ ማሄ ዓሳ

ዒኖ ፒዜዚንሢያ ቢያ ዎዛዾንጎ።