ጌኤዦ ማፃኣፖ
ዓይኑሞ ማፃኣፖ 129
ፂዮኔ ኬዞ ዓይኑሞ
ዒስራዔኤሌኮ ሞርኮፓ ቶላኒ ሺኢቂንቴ ሺኢጲሢ
ናኣቶፓ ዓርቃዖ ፑርታ ባኣዚ ታና ሄሌኔ፤
ዒስራዔኤሌ ዓሳ ሂዚ ጎዖንጎ፦
«ታኣኒ ናኣቶ ዓኣንቴ ዓርቃዖ
ታኣኮ ሞርካ ታና ሚጪንቲቃይዶ ዳውሳኔ፤
ጋዓንቴ ታና ዔያታ ባሺባኣሴ።
ታኣኮ ዙሎ ዔያታ ዢራፓና ጳርቂ
ጎሺ ጎሽኮማጉዲ ሹኬኔ።
ናንጊና ናንጋ ጎዳ ቢያ ዎዴ ፒዜኬ፤
ዬያቶ ሚጪንቱዋ ፑርቶ ዓሶ ቱኡዛፓ ታና ዒ ቡሌኔ።»
ፂዮኔ ዒፃ ዓሲ ቢያ
ቦርሲንቲ ጊንሢም ማዖም።
ማኣሪ ዑሢዳ ባቃሌ ማኣቲጉዲ
ሃጊ ዑጉዋዖ ሹሊ ባይቃያ ማዖም።
ዬያጉዴ ማኣታ ዎዻ ዓሲኮ ኩጮ ኩሙዋያ
ጌኤቴ ማሂ ቱካኒ ጋዓሢማኣ ኮኦማ ኩሙዋያ ማዖም።
ዔያቶኮ ኮይሊና ዴንዳ ዓሲ ቢያ ፂዮኔኮ ሞርኮ፦
«ናንጊና ናንጋ ጎዳ ዒንሢ ዓንጆንጎ!
ኑኡኒያ ናንጊና ናንጋ ጎዳ ሱንፆና ዒንሢ ዓንጃኔ!»
ዔያቶ ጋዓዓኬ።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.