ዓይኑሞ ማፃኣፖ 112

ኮሺ ዓሲኮ ዎዛ

1ናንጊና ናንጋ ጎዳም ጋላታ!

ናንጊና ናንጋ ጎዳ ዒጊጫያና

ዓይሢፆ ዒዛኮ ኩንሢፆና ዎዛዻሢ

ዎዚ ዓንጂንቴያዳይ!

2ዬያ ዓሢኮ ዜርፃ ሳዓ ዼኤፒ ማዓንዳኔ፤

ፒዜ ዓሶ ሾይንታ ዓንጂንታንዳኔ።

3ቆሎንታ ዖርጎቹሞንታ ማኣሮ ዒዛኮ ኩማንዳኔ፤

ፂሉማ ዒዛኮ ናንጊና ናንጋንዳኔ።

4ዒዚ ኮሺ፥ ሚጪንታያ፤ ሃሣ ፂሎ ማዔ ጎይፆና

ፒዜ ዓሲም ዹሞይዳ ፖዒ ፖዓኔ።

5ዔኤቢ ዒንጋያና ሂርጉዋ ታልዓያም

ማዾ ፔኤሲ ፒዜ ማዻሢም

ኮሺ ባኣዚ ማዓንዳኔ።

6ዬይ ዓሢ ናንጊና ዓጊፃዓኬ፤

ፂሎ ዓሲኮ ማዻ ማሊንቴ ጎይሣ ዴዓንዳኔ።

7ፑርታ ሃይሴ ዒዛ ዲቃሡዋሴ፤

ዒና ዒዛኮ ናንጊና ናንጋ ጎዳ ጉሙርቂ ዶዴያኬ።

8ዒና ዒዛኮ ዶዲኬ፥ ፔቴታዖ ዒጊጩዋሴ፤

ጋፒንፆይዳ ሞርካ ዒዛኮ ሎኦማሢ ዒ ዛጋንዳኔ።

9ማንቆ ዓሶም ፔ ሼኔና ዒዚ ዒንጌኔ፤

ፂሉማ ዒዛሲ ናንጊና ናንጋንዳኔ፤

ዒዚ ቦንቺንቲ ዎልቄና ዼግ ዼጊ ጋዓንዳኔ። 1

10ፑርቶ ዓሳ ዬያ ዛጋዖ ሮኦጋዻንዳኔ፤

ዓቺ ዻይ፥ ዖኦፒ ዖኦፒ ዓኣዻንዳኔ፤

ዬያ ዓሶኮ ማሊፃ ጉሪ ማዓንዳኔ።