ዒዮቤ ማፃኣፖ 17

1«ዑኡዞ ዔካኒ ታኣኒ ባሺንቲ

ናንጎ ዎዳ ታኣኮ ጋፓኒ ዑኬኔ፤

ዓካሪ ዱኡፒ ታና ካፔኔ።

2ታና ቦሃ ዓሳ ማንጌኔ፤

ዓኣፓ ታኣኮ ዔያታ ታና ዒፃሢ ዛጋኔ።

3ፆኦሲዮ! ኔጊዳፓ ዓታዛ

ሜሌ ታኣም ዔቄያ ባኣሴ፤

ኔኤኒ ኔኤሮ ታኣም ዋኣሴ ማዔ።

4ዔያታ ማሊ ጶቂሡዋጉዲ

ዒኖ ኔ ዔያቶኮ ዓርቄኔ፤

ዬያሮ ዔያታ ባሻንዳጉዲ ማሂፖ።

5ሚኢሼ ዴንቃኒ ጌዒ

ፔ ላጋሢ ዓኣሢ ዒንጋ ዓሲ

ዒ ማዼ ጌና ናኣቶ ሄላኔ።

6ፆኦሲ ታና ዓሲ ዓማላንዳጉዲ ማሄኔ፤

ዓሳ ፔኤኮ ጩጮ ዒዛኮ ቤርታ ጩታ ዓሲጉዲ ታ ማዔኔ።

7ታኣኮ ዖዪፃፓ ዔቄያና ዓኣፓ ታኣኮ ዴይ ዓቴኔ፤

ዑፃ ታኣኮ ጉቤ ሺቢጉዲ ማዔኔ።

8ፔና ጎኔ ዓሲኬ ጋዓ ዓሳ ሃያ ባኮና ዲቃቴኔ፤

ጌኤዦ ዓሳኣ ፆኦሲ ጉሙርቁዋ ዓሶይዳ ዻጋዼኔ።

9ያዺ ማዔቴያ ፂሎ ዓሳ ጎኑሞ ጎይፃፓ ሺኢኩዋሴ፤

ጌኤዦንሢያ ዶዱሞይዳ ዶዱሞ ቃሳኔ።

10ዒንሢ ቢያሢ ላሚ ሙኪ ታ ቤርታ ማርሜቶ

ዒንሢ ባኣኮይዳፓ ፔቴታዖ ማሊ ጶቂሣ ዓሲ ታ ዴንቃዓኬ።»

11«ታኣኮ ናንጎ ዎዳ ጋፔኔ፤

ታ ቱኬ ቱኡዞና ታኣኮ ዒኖ ማሊፆና ጉሪ ማዒ ዓቴኔ።

12ሃኣታ ዓሳ ዹሞ ‹ሮኦሪኬ› ጋዓኔ፤

ሮኦሮ ሃሣ ‹ዹማኒ ዑኬኔ› ጋዓኔ።

13ሃካፓ ሴካ ታኣኮ ዓኣማ

ሃይቂ ዱኡኪንቲሢ ሌሊኬ፤

ዒኢካ ዹሞይዳ ሻኣሎ ታኣኮ ታ ሂኢሣንዳኔ።

14ዬካፓ ዱኡፖ፦ ‹ዓዴ› ጌይ ታ ዔኤላንዳኔ፤

ታና ሙዓ ዛኣሎ፦ ‹ታ ዒንዴ፤ ታ ጌሮ› ታ ጋዓንዳኔ።

15ዓካሪ ዓይጎ ሃጊ ማዓ ዎዛ ታኣኮ ዓኣይ?

ታኣኮ ሃጊ ማዓ ዎዞ ዖ ታኣም ዴንቃንዳይ?

16ታኣኒ ሊካ ሃይቄ ዓሳ ዓኣ ቤዞ ኬዳኣና

ሃጊ ማዓንዳ ዎዛ ታኣና ዎላ ኬዳንዳ?

ሃሣ ታኣና ዎላ ዱኡፓ ኑ ጌላንዳ?»