ዒዮቤ ማፃኣፖ 16

ዒዮቤ

1ዬካፓ ዒዮቤ ሂዚ ጌይ ማሄኔ፦

2«ሃያ ማላ ሃይሴ ሚርጌ ዎዴ ታ ዋይዜኔ፤

ዒንሢ ታና ዶዲሻያ ማሊ ዖዪሢዳ ዖዪሢ ታኣም ቃሴኔ።

3ሃያ ዒንሢኮ ፓሡዋ ጌኤዞኮ ጋፒንሢ ባኣያዳ?

ሃያይዲ ዒንሢ ታኣና ማርማንዳጉዲ

ዒንሢ ማሄሢ ዓይጎዳይ?

4ዒንሢ ታ ቤዛ ማዔም

ታ ዎንዴ ዒንሢ ቤዛ ማዔያታቴ

ቦሂሢና ቶኦኮ ታኣኮ ታ ዓጊሢ ዓጊሢ፤

ሃሢ ዒንሢ ጋዓ ባኮ ቢያ

ዒንሢዳ ሚዛጲሲ ጌስታኒ ታ ዳንዳዔያ ናንዳንቴኬ።

5ዬያጉዲ ሃሣ ታ ዒንሢ ዞሬያና

ዒንሢ ዶዲሻኒ ታ ሚርጌ ባኣዚ ጌስታኒ ዳንዳዔያ ናንዳንቴኬ።»

6«ጋዓንቴ ሚርጌ ታ ጌስቴታቶዋ ሃርጋ ታኣኮ ሼሌዒንዱዋሴ፤

ዚቲ ጌይ ታ ጊቤቴያ ዋኣዪፃ ታኣኮ ጋፒንዱዋሴ።

7ፆኦሲዮ! ዓካሪ ኔ ታና ላቢሴኔ፤

ታኣኮ ማኣሮ ዓሶዋ ቢያ ኔ ባይዜኔ።

8ዑፆኮ ታኣኮ ጉርሚፃ ማርካ ማዔኔ፤

ሜጌፆ ጴዺ ዖኦፒፃኣ ‹ኔ ጎሜ ዓሲኬ› ጌይ ታጊዳ ማርካዻኔ።

9ፆኦሲ ዻጋዺ ዑፆ ታኣኮ ቲቄኔ፤

ታና ዒፂፆና ዓጮ ፔኤኮ ዒ ዻዔኔ፤

ታኣኮ ሞርካሢ ፔ ዓኣፖና ታና ጎዜኔ።

10ዓሳ ታ ኮይላ ቡኪ ታና ሚኢጫኔ፤

ቦሂ ቦሂ ባዒያ ታና ባዓኔ።

11ፆኦሲ ፑርቶ ዓሶም ታና ዓኣሢ ዒንጌኔ፤

ዋይዞ ዒፃ ዓሶ ኩጫ ታና ኬኤሬኔ።

12ኮሺ ታ ናንጋንቴ

ዒዚ ፔ ዻጎና ታና ሜንሤኔ፤

ባቃኖ ታኣኮ ዺዺ ዓርቂ ታና ጋኣጬኔ፤

ታና ዒ ባይዛኒ ታጊዳ ዔቄኔ።

13ዒዛኮ ሂኢዦ ዓሳ ታና ማንጌኔ፤

ሚጪንቱዋዖ ጳላሢ ታኣኮ ዔያታ ዱኡዜኔ፤

ጪሾዋ ታኣኮ ዔያታ ሳዓ ላኣሌኔ፤

14ላሚ ላሚ ዒ ታና ዱኬኔ፤

ዶዲ ዖልዚ ዓሲ ማዒ ኮኦሚ ታጊዳ ዒ ሙኬኔ።

15ታኣኮ ዖዪፃ ሚርጌሢሮ ሲዬ ማኣዖ ታ ማይንቴኔ፤

ባሺንቲ ታኣኒ ሲላሊዳ ሎኦሜኔ።

16ሚርጌና ታ ዬኤኬሢሮ ዓኣፖ ካራ ታኣኮ ዞቄኔ፤

ሻኔ ዹሚ ዓኣፖ ዴምዔራሢ ታኣኮ ካንቂ ዓርቄኔ።

17ዬይ ቢያ ማዔቴያ ታ ማዼ ዻቢንቲ ባኣሴ፤

ፆኦሲ ታ ሺኢቃሢያ

ጌኤሺ ዒናናኬ።»

18«ሳዔሌ! ታጊዳ ሄሌ ጌኖ ማዾ ካንቂፖ!

ታኣኮ ሃዳሮ ዒላታ ሹኡሚንቲ ዓታንዳጉዲ ማሂፖ!

19ዓካሪ ታኣም ማርካዻንዳያና

ታርዤ ታኣኮ ማዓንዳሢ ጫሪንጮይዳ ዓኣኔ። 1

20ታኣኮ ላጋ ቶኦቺ ታና ዛጋኔ፤

ታ ጋዓንቴ ሌካ ፆኦሲ ባንሢ ዒላታኔ።

21ፔቴ ዓሲና ባጊና ጌስቲ ቡኩሳይ ዓኣሢጉዲ ቢያ

ፆኦሲና ዓሲና ጌስቲ

ቡኩሳይ ዓኣቶ ዓይጎ ጎዖንዶይ!

22ታ ናንጎ ሌዖኮ ጋፒንፃ ሄሊ ሄሊኬ፤

ማዒ ታ ሙኪንዱዋ ቤሲ ዓኣዻኒኬ፤

ዻካ ዎዴ ሌሊ ታኣኮ ዓቴኔ።»