ዒዮቤ ማፃኣፖ 11

ፆፓሬ

1ናዕማታ ዓጮ ዓሢ ፆፓሬ ሂዚ ጌዔኔ፦

2«ሃያ ቢያ ጉሪ ጌይንቴ ባኮኮ ማሂ ኬኤዛይ ባኣዓዳ?

ፔቴ ዓሲ ሃያጉዴ ጋፑዋ ባኣዚ ጌስቲሢና ፒዜ ማዓኒ ዳንዳዓ?

3ዒዮቤ! ጉሪ ኔ ጌስቴ ባኮኮ ማሂ ኔኤም ኬኤዞንዶ ባኣዚ ባኣያ ማላ?

ሃያይዲ ኔ ቶኦቺ ጌስታዛ ኔና ጎራንዳ ዓሲ ባኣያ ኔኤም ማላ?

4ኔኤኒ ኔ ማሊፆና፦ ‹ታኣኒ ፒዜኬ› ጋዓኔ፤

ፆኦሲማኣ ኔኤኒ፦ ‹ታ ኔ ቤርታ ጌኤሺኬ› ጋዓኔ።

5ፆኦሲ ኔኤም ማሂ

ፒዜ ማዔ ባኮ ኬኤዛቴ ዓይጎ!

6ዔራቶኮ ጎይሢ ሚርጌታሢሮ

ዔራቶኮ ዓኣሺንቴ ባኮ ኔና ፆኦሲ ዔርዜቴ ዓይጎ!

ዓካሪ ፆኦሲ ኔና ሜቶይዳ ዓጌሢ

ኔኤም ኮይሳሢዳፓ ዻኪሲ ማዔሢ ዔሬ።»

7«ፆኦሲ ዓኣቺ ዓርቄ ባኮ ኔ ዔራኒ ዳንዳዓ?

ቢያ ባኮ ዳንዳዓ ጎዳሢ ዎዚዒታቴያ

ማርማሪ ዔራኒ ኔ ዳንዳዓ?

8ዒዛኮ ዼኤፑማ ጫሪንጮኮ ዑሣኬ፤

ኔ ዒዛ ዎዳኒ ዳንዳዓይ?

ሊካ ዔቱማ ዒዛኮ ዱኡፖ ዔታፓ ዴማኬ፤ ኔ ዓይጎ ዔራይ?

9ፆኦሲኮ ዼኤፑማ ሳዖይዳፓ ባሼ ዖዶቃኔ፤

ዼኤፖ ባዞ ዋኣፃፓ ባሼ ዳልጋኔ።

10ፆኦሲ ሙኪ ቱኬቴ

ዎጎ ዎጋ ዓሶ ቤርቶዋ ሺኢሼቴ

ዖ ዒዛ ላኣጋንዳይ?

11ፆኦሲ ፓሡዋ ዓሶ ዔዔራኔ፤

ዻቢንቲ ዒ ዴንቄ ዎዶና ዚቲ ጌይ ዛጉዋሴ።

12ዔኤያ ዓሲ ዔራ ማዓያይዳፓ

ኪርሞሌ ዓሲ ማዒ ሾይንታቴ ሼሌዔኬ።»

13«ጋዓንቴ፥ ዒኖ ኔኤኮ ኔ ፒዜ ማሄቴ

ሃሣ ኩጮ ኔኤሲ ኔ ዔቂሲ ፆኦሲ ሺኢቄቴ

14ጎሞ ኔጊዳፓ ኔ ሃኪሴቴ

ፑርታ ባኣዚያ ኔ ማኣራፓ ኔ ባይዜቴ

15ዬማ ዎዶና ኔ ዼግ ጌዒ

ቦርሲንቲባኣያ ቢያ ባኣዚ ኔ ዛጋንዳኔ፤

ሃሣ ዒጊቹሞ ባኣያ ዶዲ ኔ ዔቃኒ ዳንዳዓኔ።

16ሜቶ ኔኤኮ ኔ ቢያ ዋላንዳኔ፤

ኔ ማሊ ጶቂሣንዳሢ ኩሚ ዓኣዼ

ዲጲጉዲ ሌሊኬ።

17ናንጋ ኔኤኮ ዓቢ ዹኡሲ ፖዒፓ ባሼ ፖዓንዳኔ፤

ዹማ ጊንሣ ሃሣ ጉታኣ ፖዒጉዲ ማዓንዳኔ።

18ሃጊ ማዓንዳ ዎዛ ኔኤኮ ዓኣሢሮ ጉሙርቂ ኔ ናንጋንዳኔ፤

ፆኦሲ ኔና ካፓያታሢሮ ሂርጋባኣያ ሃውሺ ኔ ናንጋንዳኔ።

19ዖናኣ ዒጊጩዋዖ ኔ ላሃንዳኔ፤

ሚርጌ ዓሲ ኔ ቤርታ ቦንቺንቲ ዴንቃኒ ኮዓንዳኔ።

20ፑርቶ ዓሶኮ ዓኣፓ ባይቃንዳኔ፤

ዔያታ ቶላንዳ ጎይፃ ዔያቶኮ ቢያ ዲርቂንቴያ ማዓንዳኔ፤

ዔያቶኮ ጋፒንፃኣ ሃይቢኬ።»