ጌኤዦ ማፃኣፖ
ዒዮቤ ማፃኣፖ 10
«ናንጊ ታና ዒሤኔ፤
ታ ሃሢ ናንጋ ጫንጮ ናንጎ
ፔጌና ታ ዋይዚሲ ኬኤዛኔ።
ፆኦሲ ታ ሂዚ ጋዓንዳኔ፦
ኔ ታና ዓርቄ ባካ ዓይጎናታቴያ
ፔጋሲ ታኣም ዻዻዋንዳፓዓቴም
ዻቢንቴያኬ ጌይ ዎዎጊፖ!
ሃያይዲ ኔ ዒዛ ሜታሳሢ ኮይሳያዳ?
ኔኤኒ ኔ ኩጮና ማዤ ዓሢ ቶኦቻኒ ኔኤም ኮይሳ?
ፑርቶ ዓሶኮ ጌኖ ማሊፃ ኔና ዎዛሳ?
ኔ ዓኣፓ ዓሲ ዓኣፒጉዲዳ?
ኔ ዛጋሢ ዓሲ ዛጋ ጎይሢዳ?
ኔ ኬላ ዓሲ ኬሊጉዴያዳ?
ሃሣ ሌዓ ኔኤኮ ዓሲ ሌዔጉዲ ቃሚሢዳ?
ታ ዻቢንቶ ኔ ዛጋሢ፥
ጎሞዋ ኔ ታኣኮ ኮጲሳሢ ዓይጎሮዳይ?
ታኣኒ ዻቢንቲ ባኣያ ማዔሢና ኔ ኩጫፓኣ ታና
ዖኦኒያ ዻቂሻኒ ዳንዳዑዋኣሢ ኔ ዔራኔ።»
«ጪጊቺንታ ማሎንታ ዒንጊ ታና ኮሼሢ ኔ ኩጮኬ፤
ዓካሪ ሃሢ ዬንሢ ኔ ኩጮንሢ ጊንሣ ታና ሻሃንዳ?
ዓጪና ኮሾና ሜሄጉዲ ዓጪፓ ኔ ታና ኮሼሢ ማሌ፤
ሂዳዖ ሃሢ ጊንሣ ኔ ታና ሲላሊ ማሂ ጋኣጫኒዳ?
ዓዳ ዲኢቂጉዲ ዋኣፂሲ
ሜቄ ዲኢቂ ጉዴያኣ ኔ ታና ሜቂሴኔ።
ዑፆ ኔ ታኣኮ ዒልዒና ዓሽኪና ማሂ ካንቄኔ፤
ሜጌሢና ሻሺና ማሂያ ካንሢ ኔ ኮሼኔ።
ሼምፔንታ ናንጊና ናንጋ ናሹሞዋ ኔ ታኣም ዒንጌኔ፤
ኔኤኮ ካፒፃኣ ዓያኖ ታኣኮ ዶዲሼኔ።
ሃይሾ ዬያ ባኮ ኔ ዒና ኔ ዓኣቺ ዓርቄኔ፤
ኔኤኮ ማሊፃ ዬያ ማዔሢ ታ ዔሬኔ።
ዻቢንቲ ታ ማዼቴ ኔ ታና ዛዛጋኔ፤
ታኣኮ ጎሞሮዋ ኔ ፑርታና ዎጉዋዖ ሃሻዓኬ።
ጎሜ ታ ማዼቴ ቤዞና ሜቶይዳ ታ ሎኦማኔ፤
ኮሺ ባኣዚ ታ ማዼቴያ ታ ጋላቲንቱዋሴ፤
ኮሺ ታኣኒ ሜታዼም
ቦርሲንቲ ታና ሄሌኔ።
ዒና ታኣኮ ጊንሣ ዶዴያ ማዔቴ
ዞቢጉዲ ኔ ታና ኬሚ ዓርቃኔ፤
ታና ባይዛኒ ኔ ዎልቆና ማዺንታ ዓኮ ባኮ
ላሚ ላሚ ኔ ማዻኔ።
ታ ጊዳ ማርካዻንዳ ዓሲ
ቢያ ዎዴና ኔ ዴንቃኔ፤
ታ ጊዳ ኔ ዻጋዻ ዻጋ
ቃሲንቲ ቃሲንቲ ዓኣዻኔ፤
ኔ ታና ዖላኒ ቢያ ኬሊ ዓኪ ዓኪ ማሊሢ
ዖልዚ ዓሲጉዲ ኔ ዳካኔ።»
«ፆኦሲዮ! ዓይጋ ኔ ታኣኒ ሾይንታንዳጉዲ ማሄይ?
ዖኦኒያ ታና ዛጊባኣንቴ ታ ሃይቄያ ማዔቴ ኮሺታንቴኬ!
ማዢንቲ ባኣዖ ታ ዓታኣባሽ፤
ዒንዶ ጎጳፓ ኬኬስካዖ ዱኡፒ ባንሢ ታ ዔውቴቴ ቃራታዖኬ።
ታ ናንጎ ዎዳ ቃሚሢቱዋዓዳ?
ዬማ ቃሚፆ ዎዶማካ ዻካታዎ ታ ዎዛዻንዳጉዲ
ሃዳራ ታና ሃሼቴራ!
ዬያ ኔ ሃሻንዳሢ ላሚ ታ ማዓኑዋ ቤዞ፥ ሃይቢ ሺቢና
ሻኔያ ማዔ ዓጮ ታ ዴንዳንዳሢኮ ቤርታኬ።
ታ ዴንዳ ቤዛ ዹሚኮ ሺቢና ዣሎና ኩሜ ሳዓኬ፤
ዬካ ዓኣ ፖዓኣ ዹሞጉዴያኬ።»
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.