ጌኤዦ ማፃኣፖ
ዒሲያሴ ማፃኣፖ 53
ዴራ ሂዚ ጋዓንዳኔ፦
«ኑኡኒ ኬኤዛ ባኮ ዖኦኒ ጎኔኬ ጌዔይ?
ናንጊና ናንጋ ጎዳኮ ዎልቃ ዖኦም ፔጋዺ ጴዼይ? 1
ፆኦሲ ዓይላሢ ፃኣዺ ሳዓይዳ ባቃሌ
ባቃሊጉዲ ፃጲ ዳኪ ዑጌኔ፤
ኑ ዛጋንዳጉዲ ሚዛጱሞንታ
ቦንቾዋ ዒዛኮ ባኣሴ፤
ዒዛ ኑ ናሽካንዳጉዲ
ዒዛኮ ሱጉሢ ሚዛጱዋሴ።
ዒዚ ዓሲና ቦሂንቴያና ዒፂንቴያኬ፤
ዒዚ ሜታዻያና ዖዖያ ዓሲኬ፤
ዓሳ ዒዛ ዛጋኒ ዓኣፖ ሺርሻንዳያ ሄላንዳኣና
ዒዚ ቦሂንቴያኬ፥ ኑኡኒያ ዒዛ ቦንቺባኣሴ።»
«ጎኔና ዒዚ ኑኡኮ ዶርዓሢ ዔኬኔ፥ ሃርጎዋ ዒዚ ኑኡኮ ኬዴኔ፤
ኑኡኒ ጋዓንቴ ፆኦሲ ዒዛ ጳርቄም
ሎኦሜያና ኪፃዼያ ማሂ ዛጌኔ። 2
ዒዚ ጋዓንቴ ጫርጊንቲ ኪፃዼሢ ኑኡኒ ፑርቴሢሮኬ፤
ዒዚ ጋኣጪንቴሢያ ኑ ዻቢንቶሮኬ፤
ኑኡኒ ዻቄሢ ዒዚ ዔኬ ሜታሢናኬ፤
ዒዛ ኪፃዺፆና ኑ ፓፄኔ። 3
ኑ ቢያሢ ማራይጉዲ ዣኣሌኔ፤
ቢያሢ ኑኡኒ ኑ ማሊፆ ጎይፆ ዓኣዼኔ፤
ናንጊና ናንጋ ጎዳ ጋዓንቴ ኑና ቢያሢኮ ዻቢንቶ ዒዛ ኬዲሴኔ።» 4
«ዒዛ ጌኔ ማዾና ሜቶና ሄሌኔ፤
ያዺ ማዔቶዋ ዔኤቢያ ዒ ጌዒባኣሴ፤
ሹኪንታኒ ዔኪ ዓኣዺንታ ማራናይና
ዑፃፓ ጋፓኖ ታይዛ ዓሶ ቤርታ ዚቲ ጋዓ ማራይጉዲ
ዚቲ ጌዔያፓ ዓቴም ዔኤቢ ጌዒባኣሴ። 5
ዻቤ ባኣዚ ባኣንቴ ጌኔ ዎጌና ዒ ሃይቄኔ፤
ዬይ ማዓንዳሢ ቤርታዺ ዔሪ ጶቂሣኒ ዖ ዳንዳዔይ?
ጋዓንቴ ታኣኮ ዴሮ ዻቢንቶሮ ዒ ጳርቂንቴኔ፤
ዓሳ ናንጋ ዓጫፓ ዒዚ ሺኢኬኔ። 6
ዔኤቢ ፑርታ ባኣዚ ማዹዋዖ
ዒዛኮ ዻንጋፓኣ ሉኡዙሞ ኬስኩዋንቴ
ዒዚ ሃይቦና ፑርቶ ዓሶ ባኣካ ፓይዲንቴኔ፤
ዖርጎጮናኣ ዎላ ዒዚ ዱኡቴኔ።» 7
ዬይ ጋኣጪንቲፆና ሜታዺፃ ዒዛ ሄሌሢ
ናንጊና ናንጋ ጎዳኮ ማሊሢ ማዔምኬ፤
ዒዚ ዒዛኮ ሼምፓሢ ጎሜሮ ዒንጎ ዒንጊሢ
ማሂ ሺኢሼቴያ
ዒዚ ፔ ዜርፆ ዛጋንዳኔ፥ ናንጎ ሌዓኣ ዒዛኮ ዖዶቃንዳኔ፤
ናንጊና ናንጋ ጎዳኮ ማሊፃ ዒዛና ኩማንዳኔ።
ታኣኮ ፂሎ ማዔ ዓይላሢ ዋኣዬስካፓ ናንጎ ፖዖ ዛጊ ዎዛዻንዳኔ፤
ፔኤኮ ዔራቶና ሚርጌሢ ዒ ፂሊሳንዳኔ፤
ዔያቶኮ ዻቢንቶዋ ዒዚ ኬዳንዳኔ።
ዒዚ ፔኤኮ ሼምፓሢ ሃይቢም ዓኣሢ ዒንጌኔ፤
ፑርቶ ማዻ ዓሶና ዎላ ዒ ፓይዲንቴኔ፤
ያዼ ማዔያታቴያ ዒዚ ሚርጌ ዓሶኮ ጎሞ ኬዴኔ፤
ዻቢንቶ ዓሶ ዛሎዋ ዒ ቃይሼኔ፤
ዬያሮ ታኣኒ ዒዛ ዼኤፖ ዓሶ ባኣካ ማሂ ዒዛ ሄላ ዛሎ ዒንጋንዳኔ፤
ዔርቴ ዓሶና ዎላ ዲዒንቴ ባኮ ዒ ጊሽታንዳጉዲ ታ ማሃንዳኔ። 8
Source notes (8)
- Cross-reference ዮሃ. 12፡38፤ ሮሜ 10፡16።
- Cross-reference ማቲ. 8፡17።
- Cross-reference 1ጴፂ. 2፡24።
- Cross-reference 1ጴፂ. 2፡25።
- Cross-reference ዮሃ. ፆፔዻ 5፡6።
- Cross-reference ዳኪ. ማዾ 8፡32-33።
- Cross-reference 1ጴፂ. 2፡22።
- Cross-reference ማር. 15፡28፤ ሉቃ. 22፡37።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.