യെശ. 52

യെരൂശലേമിന്‍റെ മോചനം

1സീയോനേ, ഉണരുക, ഉണരുക,

നിന്‍റെ ബലം ധരിച്ചുകൊള്ളുക;

വിശുദ്ധനഗരമായ യെരൂശലേമേ, നിന്‍റെ അലങ്കാരവസ്ത്രം ധരിച്ചുകൊള്ളുക;

ഇനിമേലിൽ അഗ്രചർമ്മിയും അശുദ്ധനും നിന്നിലേക്കു വരുകയില്ല.

2പൊടി കുടഞ്ഞുകളയുക; യെരൂശലേമേ,

എഴുന്നേറ്റ് ഇരിക്കുക;

ബദ്ധയായ സീയോൻ പുത്രീ,

നിന്‍റെ കഴുത്തിലെ ബന്ധനങ്ങൾ അഴിച്ചുകളയുക.

3യഹോവ ഇപ്രകാരം അരുളിച്ചെയ്യുന്നു:

“വിലവാങ്ങാതെ നിങ്ങളെ വിറ്റുകളഞ്ഞു;

വിലകൊടുക്കാതെ നിങ്ങളെ വീണ്ടുകൊള്ളും.”

4യഹോവയായ കർത്താവ് ഇപ്രകാരം അരുളിച്ചെയ്യുന്നു: “എന്‍റെ ജനം പണ്ടു പരദേശവാസം ചെയ്യുവാൻ മിസ്രയീമിലേക്ക് ഇറങ്ങിച്ചെന്നു; അശ്ശൂരും അവരെ വെറുതെ പീഡിപ്പിച്ചു. 5ഇപ്പോൾ എന്‍റെ ജനത്തെ വെറുതെ പിടിച്ചു കൊണ്ടുപോയിരിക്കുകകൊണ്ടു ഞാൻ ഇവിടെ എന്ത് ചെയ്യേണ്ടു” എന്നു യഹോവ അരുളിച്ചെയ്യുന്നു; “അവരുടെ അധിപതിമാർ പരിഹസിക്കുന്നു1; എന്‍റെ നാമം ഇടവിടാതെ എല്ലായ്‌പ്പോഴും ദുഷിക്കപ്പെടുന്നു” എന്നും യഹോവ അരുളിച്ചെയ്യുന്നു. 6“അതുകൊണ്ട് എന്‍റെ ജനം എന്‍റെ നാമത്തെ അറിയും; അതുകൊണ്ട് ഞാൻ, ഞാൻ തന്നെയാകുന്നു പ്രസ്താവിക്കുന്നവൻ എന്നു അവർ അന്നു അറിയും.”

7സമാധാനത്തെ ഘോഷിച്ചു നന്മയെ സുവിശേഷിക്കുകയും

രക്ഷയെ പ്രസിദ്ധമാക്കുകയും സീയോനോട്:

“നിന്‍റെ ദൈവം വാഴുന്നു” എന്നു പറയുകയും ചെയ്യുന്ന

സുവാർത്താദൂതന്‍റെ കാൽ പർവ്വതങ്ങളിന്മേൽ എത്ര മനോഹരം!

8നിന്‍റെ കാവൽക്കാരുടെ ശബ്ദം കേട്ടുവോ?

അവർ ശബ്ദം ഉയർത്തി ഒരുപോലെ ഉല്ലസിച്ചു ഘോഷിക്കുന്നു;

യഹോവ സീയോനിലേക്കു മടങ്ങിവരുമ്പോൾ

അവർ അഭിമുഖമായി കാണും.

9യെരൂശലേമിന്‍റെ ശൂന്യപ്രദേശങ്ങളേ, പൊട്ടി ആർത്തുകൊള്ളുവിൻ;

യഹോവ തന്‍റെ ജനത്തെ ആശ്വസിപ്പിച്ച്,

യെരൂശലേമിനെ വീണ്ടെടുത്തിരിക്കുന്നുവല്ലോ.

10സകലജനതകളും കാൺകെ യഹോവ തന്‍റെ വിശുദ്ധഭുജത്തെ വെളിപ്പെടുത്തിയിരിക്കുന്നു2;

ഭൂമിയുടെ അറ്റങ്ങളെല്ലാം നമ്മുടെ ദൈവത്തിന്‍റെ രക്ഷയെ കാണും.

11വിട്ടു പോരുവിൻ; വിട്ടു പോരുവിൻ; അവിടെനിന്നു പുറപ്പെട്ടുപോരുവിൻ;

അശുദ്ധമായതൊന്നും തൊടരുത്; അതിന്‍റെ നടുവിൽനിന്നും പുറപ്പെട്ടുപോരുവിൻ;

യഹോവയുടെ ഉപകരണങ്ങളെ ചുമക്കുന്നവരേ,

നിങ്ങളെത്തന്നെ നിർമ്മലീകരിക്കുവിൻ.

12നിങ്ങൾ തിടുക്കത്തോടെ പോവുകയില്ല, ഓടിപ്പോവുകയുമില്ല;

യഹോവ നിങ്ങൾക്ക് മുമ്പായി നടക്കും;

യിസ്രായേലിന്‍റെ ദൈവം നിങ്ങൾക്ക് പിൻപട ആയിരിക്കും.

ദാസന്‍റെ കഷ്ടതയും മഹത്ത്വവും

13എന്‍റെ ദാസൻ കൃതാർത്ഥനാകും;

അവൻ ഉയർന്നുപൊങ്ങി അത്യന്തം ഉന്നതനായിരിക്കും.

14അവന്‍റെ രൂപം കണ്ടാൽ ആളല്ല എന്നും

അവന്‍റെ ആകൃതി കണ്ടാൽ മനുഷ്യനല്ല എന്നും തോന്നുമാറു

വിരൂപമായിരിക്കുകകൊണ്ടു പലരും നിന്നെ കണ്ടു സ്തംഭിച്ചുപോയതുപോലെ,

15അവൻ പല ജനതകളെയും കുതിച്ചുചാടുമാറാക്കും3;

രാജാക്കന്മാർ അവനെ കണ്ടു വായ് പൊത്തി നില്ക്കും;

അവർ ഒരിക്കലും അറിഞ്ഞിട്ടില്ലാത്തതു കാണുകയും

ഒരിക്കലും കേട്ടിട്ടില്ലാത്തതു ഗ്രഹിക്കുകയും ചെയ്യും.