Zekarià 10

1Ihalalio orañe am’ Iehovà,

oran-doha-taoñe am’ Iehovà mpitsene i helatsey;

vaho hampikojojoaha’e orañe,

fonga ondaty ty amo mitiry an-tete’eo.

2Fa mikora aman-tahiñe o ambiasao,

naho mahaonim-bande o mpisikilio,

mivolam-bìlañe ka o nofio,

tsy jefa’e ty fañohò’ iareo;

aa le mirererere hoe añondry iereo,

misotry fa tsy amam-piarake1.

3Misolebotse amo mpiarakeo

ty habosehako, le ho liloveko o ose-lahio;

fa tiahi’ Iehovà’ i Màroy i lia-rai’ey,

i anjomba’ Iehoday

ie hanoe’e hoe soavalam-bolonahe’e

an-kotakotak’ ao.

4Boak’am’ iareo ty vato-lahy,

hirik’am’ iereo ty fantake,

boak’am’ iereo ty falen-kotakotake,

vaho hirik’am’ iereo ao ze mpameleke—hiharo

5hoe fanalolahy iereo, ho lialia’ iereo am-potak’ an-dalañe ao t’ie mihotakotake naho mifandraparapake,

fa mindre am’ iereo t’Iehovà vaho

hifandrakaraka o mpiningi-tsoavalao.

6Hampaozareko ty anjomba’ Iehodà,

naho ho rombaheko ty anjomba’ Iosefe, hampoliko fa iferenaiñako,

vaho hanahake t’ie tsy nahifiko añe, amy te izaho Iehovà t’i Andrianañahare’ iareo, le ho toiñeko.

7Hanahake ondaty manjofakeo t’i Efraime, le hirebeke ty arofo’ iareo hoe an-divay; Eka hahaisake izay o ana’eo

vaho handia-taroba,

hifale am’ Iehovà ty arofo’ iareo.

8Ho tsikaoreko, naho hatontoko, amy t’ie nijebañeko, ie hitombo ho mira ami’ty hamaro’e taolo.

9Ie aparatsiako amo fifeheañeo,

le hahatiahy ahy an-tsietoitane añe;

naho ho veloñe iereo naho o ana’ iareoo,

vaho himpoly.

10Hampoliko boak’an-tane Mitsraime, naho hatontoko boak’ Asore añe;

vaho hendeseko mb’an-tane Gilade

naho mb’e Libanone mb’eo;

ampara’ te tsy tsahatse i toetsey.

11Ho sorohe’e i ria-kaloviloviañey,

ho fofohe’e o onjan-driakeo,

le ho maike o godobo’ i sakaio,

naho hafotsake ty enge’ i Asore

vaho hipitsok’ añe ty kobai’ i Mitsraime.

12Hampaozareko am’ Iehovà iereo vaho i tahina’ey ty hidraidraita’ iareo,

hoe t’Iehovà.