Sabo 44

Ho a i Talèn-tsabo,

Sabo o ana’ i Korao : Itsakoreañe

1Ry Andrianañahare,

fa jinanjin-dravembia’ay, fa natalilin-droae’ay o fitoloñañe nanoe’o

tañ’ andro’ iereoo,

amo andro faha’ matoetoeo.

2Ie am-pità’o ty nandroake

o fifeheañeo le najado’o eo ;

dinemo’o ondatio, vaho naparatsia’o.

3Tsy ty fibara’ iareo ty nahazoañe i taney;

le tsy o fità’ iareoo ty naharombake,

fa ty fità’o havana naho ty sira’o,

vaho ty hazavan-dahara’o

amy t’ie nisohe’o.

4Mpanjakako irehe, ry Andrianañahare;

lilio fandrombahañe t’Iakobe.

5Ihe ro igorea’ay o rafelahi’aio;

ty tahina’o ty andialià’ay o mitroatse hiatreatre anaio.

6Tsy iatoako ty faleko,

tsy maharombak’ ahy ty fibarako.

7Fa Ihe ro nandrombak’ anay

amo rafelahi’aio,

naho nanalatse o malaiñe anaio.

8I Andrianañahare ro

firengea’ay lomoñandro,

vaho andriañe’ay nainai’e ty tahina’o. Selà

9F’ie nifarie’o henaneo,

naho ninje’o;

tsy indreze’o ­fionjonañe o lahindefo’aio.

10Ampiambohoe’o amo rafelahi’aio,

vaho mamaok’ an-tsatri’e avao

o malaiñe anaio,

11Fa natolo’o ho añondry kamaeñe,

vaho nampivarakaihe’o amo fifeheañeo.

12Naleta’o ami’ty minjilite’e ondati’oo,

tsy nahazoan-tombo’e t’ie naletake.

13Nampañinje’o o mpifankarineo, fanivetiveañe naho fandrabioñañe

amo mañohok’ anaio.

14Anoe’o oha-drehake o fifeheañeo,

fikoliñan-doha am’ondatio.

15Fañinjeañe ­lomoñandro ty aoloko eo,

vaho nampikolopok’ ahy

ty hameñaran-tareheko,

16ami’ty fivola’ o mikobìke

naho mamàtseo;

ty amy fiatrefan-drafelahiy

vaho i mpamale-fatey.

17Toe hene nifetsak’ ama’ay,

f’ie tsy nañaliño Azo,

vaho tsy nivalik’ amy fañina’oy.

18Toe tsy niamboho Azo o arofo’aio,

vaho tsy niveve amy lala’oy o fandia’aio,

19f’ie dinemo’o an-toem-panalok’ eo, vaho kinolopo’o an-talinjon-kavilasy.

20Aa naho nandikofa’ay

ty tahinan’Añahare’ay,

ke namela-pitàñe aman-drahare

ankafankafa;

21Tsy ho ­nitsikarahen’ Añahare hao?

Kanao arofoana’e ze mikafitse an-trok’ao.

22Eka, Ihe ro anjamanañe anay

handro am-pohatse;

volilieñe hoe añondry ho lentañe.

23Mivañona, ry Talè, Ino ty irota’o?

Mitsekafa, ko farie’o

kitro katroke zahay.

24Akore ty ampietaha’o laharañe,

naho añaliñoa’o ty hasotria’ay

vaho ty halovilovia’ay?

25Fa mibokok’ an-debok’ ao ty fiai’ay;

mipitek’ an-tane eo ty fisafoa’ay.

26Miongaha hañolotse anay, vaho jebaño ty amy fiferenaiña’oy.