Sabo 40

Ho a i Talè, Sabo’ i Davide

1Nitamàko am-pahaliñisañe t’Iehovà,

le nitokilaña’e, vaho jinanji’e ty fitoreoko.

2Naaka’e an-koboñe namparikoriko,

naho boak’ an-dietse nipaletroke,

vaho nampitongoà’e ambone

lamilamy eo o tombokoo;

le nalaha’e o liakoo.

3Napo’e am-bavako ao ty sabo vao,

fijejoañe aman’Añaharen-tikañe;

maro ty hahaoniñe le hañeveñe,

vaho hitsolok’ am’ Iehovà.

4Haha ty manao Iehovà ho fiatoa’e,

naho tsy mitolike

mb’amo mpirengevokeo,

vaho tsy mitsile mb’an-dremborake.

5Maro, ry Iehovà Andrianañahareko,

o fitoloña’o fanjàkao,

naho ty fivetsevetse’o anay,

tsy eo ty mañirinkiriñe Azo !

Naho nitaroñeko naho nilañoneko,

mbe mandikoatse ze mete ho talilieñe.

6Tsy mahafale Azo o soroñeo1 naho

o enga-mahakamao;

sinoka’o o sofikoo;

tsy nipaia’o ty engan-kolorañe

ndra ty engan-kakeo.

7Le hoe raho : Intoy iraho, homb’eo,

fa nisokireñe am-boke-pelek’ ao;

8Noko, ry Andrianañahareko,

ty mitoloñe amo satrin’arofo’oo;

eka, an-troko ato o Tsara’oo2.

9Fa nitaroneko am-pivori-bey ao ty talily soan-kavantañañe;

tsy ho sebañeko o soñikoo,

ry Iehovà, Ihe ro maharofoanañe.

10Tsy naetako an-troko ao

ty havantaña’o;

fa nitaroñeko ty figahiña’o

naho ty fandrombaha’o;

vaho tsy nakafiko amy fivori-beiy

ty fiferenaiña’o naho ty hatò’o.

11Ry Iehovà ko hazoñeñ’ amako

ty fitretreza’o;

añaro ahy nainai’e ty fiferenaiña’o

naho ty hatò’o.

12Miarikoboñe ahy ty haratiañe tsifotofoto; miambotrak’ amako o hakeokoo,

le tsy mahafiandra,

ie maro te amo volon-dohakoo,

vaho milesa ty troko.

13Ho no’o abey ry Iehovà ty hamotsotse ahy;

malisà ry Iehovà hañolotse ahy,

14Le aharò salareñe naho meñareñe

o mipay ty fiaiko hasintake;

ampiamboho vaho injeo

o te hijoy ahio.

15Ehe ampidabao an-kenatse

ze manao amako ty hoe: Hiy! Hiy!

16Hirebeke naho hifale ze mipay Azo,

vaho hitolon-kanao ty hoe

o mpitea i fandrombaha’oio:

Onjoneñe t’Iehovà.

17 Aa kanao rarake naho misotry iraho,

ee t’ie ho vetsevetse’ i Talè;

Ihe ro mpañimba naho mpañaha ahy,

ry Andrianañahareko; ko mihenekeneke.