Sabo 39

Ho a i Talè, atao Iedotone, Sabo’ i Davide

1Hoe iraho: Hambenako o lalakoo,

tsy mone handilatse an-delako.

hampidiñeko an-daboridy ty vavako

ie añatrefako eo o lo-tserekeo.

2Nimoañe iraho naho nitsiñe,

nijomohòñe, ndra ami’ty soa,

fe nanjeke avao ty haloviloviako.

3Mitsovovoke ty an-troko ao,

miforehetse i afoy te mitsakore,

vaho hoe ty fivolan-delako :

4Ry Iehovà, ampandrendreho ahy

ty figadoñako,

naho ty zehe’ o androkoo—te ino, ampaharofoano ahy

ty habori’ o havelokoo.

5Hehe te nanoe’o an-jehe o androkoo,

vaho tsy vente ama’o o taokoo;

toe songa hoe kofòke avao

ndra te añoñ’ay t’indaty. Selà

6Manao firiorion-talinjo ondatio,

tsy vente’e ty fihepakepaha’e,

hampitoabotoàbotse vara,

fe nofi’e ty hangoroñ’ aze.

7Aa inom-bao, ry Talè,

ty liñisako henaneo?

Ama’o ty fitamàko.

8Hahao amo fonga fiolàkoo,

ko salare’o amo seretseo.

9Fa mijomohòn-draho

tsy manoka-bava; amy te Ihe ty nanao izay.

10Afaho amako ty angorosi’o;

tomontoñe iraho ty amy fanindriam-pità’oy.

11Añ’endake ty andilova’o ondatio

ty amo tahi’eo,

momohe’o hoe fizara o fisengea’eo.

Toe songa kofòke avao ondatio.

12Janjiño o halalikoo ry Iehovà,

vaho toloro ravembia o fitoreoko.

Ko mianjiñe ty amo ranomasokoo,

fa ambahiny ama’o iraho, renetane manahak’ an-droaeko iaby.

13Atoliho tsy hisamba’o ahy, hisomilahako, aolo’ ty fiengako tsy ho eo ka.