Sabo 10

1Akore te Ihe mijohañe añe, ry Iehovà?

Ino ty ietaha’o an-tsan-kasotriañe?

2Am-pirengevohañe ty añoridaña’

o raty tserekeo o rarakeo;

f’ie tsepahe’ o fikitroha’eo avao.

3Sengè’ i ­tsivokatsey o fañirian-tro’eo,

tata’e ty fatitiañe, naho inje’e t’Iehovà.

4Ty tsivokatse amy fitoeboran-tarehe’ey,

tsy mitsoek’ aze;

ty hoe avao ro fitsakorea’e:

Tsy eo ze o Andrianañahare zao.

5Miraorao nainai’e o sata’eo;

kanao mitiotiotse ambone,

tsy am-pahaisaha’e eo o fizakà’oo,

le fonga ibohaboha’e o malaiñ’ azeo.

6Hoe ty aereñeren-tro’e :

Tsy hasiotse iraho,

ndra an-tsa an-tsa tsy ho ampoheke ka.

7Pea hateràñe naho katramo

naho fisenge-hery i falie’ey;

kilily naho haloloañe

ty ambane’ i famele’ey.

8Itoboha’e o ­fivoñonañe an-drovao

amo fietahañeo

hamonoa’e ty vantañe;

jilojilovem-pihaino’e

ty tsy amam-pañimba.

9Ie mitingañe añetak’ ao

hoe liona ami’ty fitsifira’e;

mitampoñe hitsepake ty rarake,

hiambotrak’ ami’ty mpisotry,

hikozozota’e amy harato’ey.

10Mibotreke re, mifinake;

vaho mikorovok’ amy figorea’ey

i pìtso-pañolotsey.

11Hoe re an-troke ao :

Fa nandikofan’ Añahare,

fa naeta’e ty lahara’e; tsy ho vazoho’e ka.

12Miongaha ry Iehovà;

ry Andrianañahare, zonjò ty Fità’o;

ko amoea’o o mpirekeo.

13Akore te ati’ o tsivokatseo

t’i Andrianañahare,

ie manao an-tro’e ao ty hoe :

Tsy ipaia’e?

14Toe vazoho’o; eka fa oni’o

ty ampoheke naho ty embetse

le ho valeam-pità’o,

ihe ro iatoa’ ty tsy aman’imba;

vaho mpañimba ty bode-rae.

15Pozaho ty sira’ o tsivokatseo naho i piaroteñey,

karaofo ty haratia’e ie tsy nilefe tsikaraheñe.

16Mpanjaka nainai’e t’Iehovà;

fa mongotse an-tane’e eo o fifeheañeo.

17Ry Iehovà,

fa jinanji’o ty halali’ o tretram-poo;

hafatraro ty arofo’ iareo

atokilaño o ravembia’oo;

18Hañomea’o to o bode-raeo

naho o forekekeñeo,

tsy hampinevenevera’ ondaty

an-tane atoio ka.