Matio 4

Zizy Valoha’e

Mar 1.12, 13; Lke 4.1-4

1Le nendese’ i Arofo Masiñey mb’ am-babangoañ’ ao t’i Iesoà ho zizie’ i mpañìnjey1. 2Nililitse efapolo andro naho efapolo halen-dre vaho nisaliko, 3nitotok’ ama’e i mpañìnjey nanao ty hoe: Kanao Anan’ Añahare, irehe, misaontsia amo vato retoañe hiova ho mahakama. 4Fa hoe ty natoi’ Iesoà aze: Pinatetse ty hoe:

Tsy mahakama avao 2ty mahaveloñe’ ondaty

fa ze hene tsara3 ­miakatse am-palie’ Iehovà.4

Zizy Faharoe

Lke 4.9-12

5Le nindese’ i mpañìnjey mb’amy rova navaheñey mb’eo naho nampi­johañe’e an-digiligi’ i anjomba miavakey 6vaho nanoa’e ty hoe: Naho Andrianañahare irehe, mitsambotraha ambane ey, amy te pinatetse ty hoe:

Fa linili’e ty ama’o o anjeli’eo

ty hitare Azo amo lia’o iabio,

naho5

o fità’iareoo ro hañongake Azo,

tsy mone hidasits’ am-bato ty fandia’o

7Hoe t’i Iesoà tama’e:

Ko tsohe’o t’Iehovà Andrianañahare’o.6

Zizy Fahatelo

Mar 1.13; Lke 4. 5-8

8Aa le nendese’ i mpañìnjey mb’ an-dindim-bohitse añe vaho natoro’e aze ze kila fifehea’ ty voatse toy naho ty enge’ iareo. 9Le nanoa’e ty hoe: Hene hatoloko Azo o retoañe naho ibaboha’o an-daharañe. 10Fe hoe t’Iesoà tama’e: Soike ty mpañìnje7! fa pinatetse ty hoe:

Hitalaho am’Iehovà Andrianañahare’o irehe, vaho Ie avao ty hitoroña’o.8

11Le nisitake aze i mpañìnjey, vaho niharineañ’ anjely, niatrak’ aze.

Ty Fifotoram-Pitoroña’ Iesoà

Mar 1:14, 15; Lke 4:14,31

12Ie jinanji’ Iesoà, te nasese mb’am-balabey ao t’i Jaona, le nimb’e Gilgale mb’eo. 13Niarie’e ty Natse­ràle le nimoneñe e Kapernaome-raità9 am-pari­parin-tane’ i Zebolona añe, 14hañeneke ty nisaontsie’ Isaia mpitoky ami’ty hoe:

15An-tane Zebolona naho an-tane Naftaly, ty lala’ i riakey,

alafe’ Iordaney—

Galilia’ o kilakila’ ondatio:

16Fa nahaisa-kazavañe ra’elahy

ondaty mañavelo añ`ieñeo,

le fa nireandreañan-kazavañe o mitoboke

an-tanen-kamoromoroñañeo.10

17Ie henane zay, namototse nitaroñe t’Iesoà, nanao ty hoe: Misolohoa, fa mitotoke i fifehean-dikerañey.

Nijoboñe o Mpiama’e Valoha’eo

Mar 1.16-20

18Nidraidraitse añ’ olo-driake Galilia eo t’i Iesoà, le nahavazoho mpirahalahy roe, i Simona atao Petrose11, naho i Andrea rahalahi’e, nañifike o harato’ iareoo an-driake ao, amy t’ie mpiandriake. 19Le nanoa’ ty hoe: Oriho iraho, vaho hanoeko mpañarato ondaty. 20Aa le nado’ iereo amy oray o harato’ iareoo vaho nañorike aze.

21Ie nienga mb’eo, le nahavazoho mpirahalahy roe ka: Iakobe ana’ i Zebedeele12 naho i Jaona rahalahi’e, mindre amy Zebedeele rae’ iareo, nañajary ty harato’ iareo an-dakañe ao, vaho nikoihe’e. 22Nihepakepake iereo nienga i haratoy naho ty rae’iareo, nañorik’ aze.

Nañafake e Galilia añe

Mar 1.39; Lke 4.44

23Le nimb’eo mb’eo an-tane Galilia t’i Iesoà, nañoke am-pivoria’ iareo ao, naho nitaroñe ty tolotse soa13 i fifehean-dikerañey naho nañafake ze fonga areteñe vaho ze hene hasilofañe am’ ondatio. 24Niboele nahatsitsike ty tane’ i Sirià ty nitalilieñe aze; le nasese mb’ama’e ze hene nitindrien-karazan’ areteñe maro: o angaran-kokolampao14, o volevolen’ angatseo naho ze azo ty tsipelatse, vaho jinanga’e. 25Valobohoke bey ty nañorike aze boake Dekapoly naho i Galilia naho Ierosaleme naho Iehodà vaho alafe’ Iordaney añe.