Malaký 3

1Oniño t’ie hahitriko i ìrakoy,

ie ty hañajary ty lalañe aoloko eo;

le hitotsak’ amy zao an-kivoho’e ao

i Talè paia’ areoy,

toe ty ira’ i fañina

mahafale anahareoy,

hehe t’ie mb’eo aniany,

hoe t’Iehovà’ i Màroy.

2Fe ia ty hahafeake

ty andro hitotsaha’e?

ia ty hahafijohañe t’ie pok’eo?

ie hoe afo fampitranahañe,

hoe savonim-panasàñe.

3Ie hiambesatse hoe mpampitranake

naho mpañalio volafoty,

hañefetse o ana’ i Levio,

hampitranake iereo

hoe volamena naho volafoty,

hibanabana’ iareo enga an-kavantañañe am’ Iehovà.

4Ie amy zay ho no’ Iehovà o banabana’ Iehodà naho Ierosalaimeo,

manahake tañ’andro taolo,

naho tan-taoñe haehae.

5F’ie hafetsako am-pizakàñe heike;

fa valolombeloñe mahimbañe

iraho amo mpamorekeo,

naho amo mpañarapilo,

naho amo mpanao fanta vìlañeo;

naho amo mpikatramo

ty tambe’ i mpikaramay

naho i vantotsey naho i bode-raeio;

naho amo manitake ty ambahiny ami’ty zo’e;

amy t’ie tsy mañeveñe amako,

hoe t’Iehovà’ i Màroy.

6Izaho Iehovà tsy miova1

ro tsy mahamongotse anahareo

ry ana’ Iakobeo.

7Sikal’ aman-droae’ areo

ty niambohoa’ areo o fañèkoo,

naho tsy niambena’ areo,

mimpolia amako, le hitolihako,

hoe t’Iehovà’ i Màroy.

Fe hoe nahareo,

Aa vaho akore ty himpolia’ay?

8Hampikametse aman’ Añahare hao

t’indaty? F’ie nikamera’areo.

Aa hoe nahareo:

Ami’ty aia ty nikamera’ay?

Amo faha-foloo, naho amo engao.

9Silofem-pàtse nahareo,

amy te fonga nikizo ahiko,

Eka naho ty fifeheañe toy iaby.

10Hene aseseo an-driha i fahafoloy,

soa te ama’ mahakama ty an-kivohoko ao,

le tsoho iraho ty amy zao,

hoe t’Iehovà’ i Màroy,

hera hisokafako o lalan-dikerañeo

hampidoandoañako fañanintsiñe

tsy hierañañe.

11Le hendahako ty ama’ areo

i mampibotsekey tsy hampianto ty vokan-tane’ areo;

vaho tsy hañary o voa’e tsy matoeo

o vahe’ areo an-tetek’ aoo,

hoe t’Iehovà’ i Màroy.

12Le hatao’ ze hene fifeheañe ty hoe:

Haha nahareo; fa ho tane fanjàka,

hoe t’Iehovà’ i Màroy.

13Nanoa’areo saontsy maràñe, hoe t’Iehovà,

mbore manao ty hoe:

Akore ty nañinjea’ay azo?

14Nanao ty hoe nahareo:

Tsy vente’e ty mitoroñe

an’Andrianañahare;

ino ty tombo’e ho antika

t’ie mitañe o fandilia’eo,

naho mañavelo am-pirevendreveñañe

am’ Iehovà’ i Màroy?

15Ie amy zao, ataon-tika ho haha

o mpiebotsebotseo,

eka onjoneñe o mpikitro-draha ratio,

ie mitsok’ an’Andrianañahare,

vaho mipolititse.

16Nifanaontsy amy zao

o mpañeveñe am’ Iehovào;

nañaoñe t’Iehovà naho nahajanjiñe,

vaho sinokitse añ’atrefa’e eo

ty bokem-paniahiañe,

ho amo mpañeveñe am’ Iehovào,

naho o miasy i tahina’eio.

17Ho ahy iereo, hoe t’Iehovà’ i Màroy,

le harovako amy andro amoriako o varakooy;

manahake ty fañarova’ ondaty

i ana’e mitoroñe azey.

18Ie amy zay, ho oni’areo ty fiavaha’

ty vantañe ami’ty tsivokatse,

ty mitoroñe an’Andrianañahare

ami’ty tsy mitoroñe Aze.

19Inao, ho tondroke ty andro

hirehetse hoe toñake;

ie ho ahe-maike iaby

o mpirengevokeo

naho o mpanao haloloañeo;

hampirebareba iareo amy andro ho aviy,

hoe t’Iehovà’ i Màroy,

vaho tsy hapo’e ndra vahatse ndra singa.

20Fe ama’ areo mpañeveñe ami’ty añarako,

ro hanjiriha’ ty andron-kavañonañe,

reketse fijangañañe an-dengon-tsaro’e eo2;

hionjom-beo nahareo

manahake ty fivoamboañan-tsarake boak’an-kijoly ao.

21Le ho lialià’ areo o lo-tserekeo;

ie ho lavenok’ ambane’ lelam-pandia’

areo ao amy andro anoeko izay,

hoe t’Iehovà’ i Màroy.

22Tiahio i Ha’ i Mosè mpitorokoy,

i nafantoko aze e Korebe añey:

o fañè naho fepetse ho a Israele iabio.

23Inao te hiraheko ama’ areo t’i Elià3

mpitoky aolo’ i andro Iehovà jabajaba

naho maharevendreveñey.

24Ie ty hampimpoly ty arofon-droae

amo ana’eo, naho o tron’anakeo

aman-droae’iareoo;

tsy mone homb’eo iraho handafa

i taney am-pandrotsahañe do’e.4