Iirmeà 8

1Amy andro zay, hoe t’Iehovà,

le hakare’ iareo boak’an-kibori’e ao

ty taola’ o mpanjaka’ Iehodào, naho

ty taola’ o roandria’eo, naho

ty taola’ o mpitokio, naho

ty taola’ o mpisoroñeo, naho

ty taola’ o mpimone’ Ierosalaimeo,

2ie havarakaike añatrefa’ i àndroy

naho i volañey

vaho i valobohòn-di­kerañe nitea’ iareo

naho nitoroñe’ iereo

naho norihe’ iereo

naho nitsoehe’ iereo

vaho nitalahoa’ iareo;

tsy hahoroñe tsy haleveñe,

fa hadoñe ho forompotse

ambone’ tane eo.

3Ho joboñe’ o romoromom-pokom-patse honka’e

amo tane nandroahako iareo iabioo

ty fivetrahañe aolo’ ty fivelomañe,

hoe t’Iehovà’ i Màroy.

4Tovoño am’ iereo ka ty hoe: Hoe t’Iehovà:

Tsy hitroatse hao ty mikorovoke?

Tsy himpoly hao ty mibotriatse?

5Inoñ’arè ty nampivio’ ondati’ Ierosalaime retoa t’ie nainai’e am-pitsileañ’ añe?

vontitire’ iereo ty fitake,

mifoneñe tsy himpoly.

6Nitsendreñe iraho, nahatsanoñe

t’ie tsy nisaontsy ty hato,

leo raik’ am’ondatio tsy misoloho

manao ty hoe: Ino o nanoekoo?

Songa mivio am-pombà’e mb’eo,

manahake ty soavala mirefe aly.

7Eka apota’ ty sama andikerañ’ eñe

o famantaña’eo;

ambena’ ty ongongo naho ty foly

vaho ty tsiriry o fiampaneña’eo,

fe tsy fohi’ ondatikoo ty lili’ Iehovà.

8Akore te atao’ areo :

Mahihitse zahay,

vaho aman-tika ty Hà’ Iehovà?

Fe hehe te nanoe’ i fanoki-bìla’

o mpanoki-dilioy fandañitse.

9Nisalareñe o mahihitseo,

lonjetse iereo vaho tsinepake:

nifarie’ iereo ty tsara’ Iehovà;

inoñ’arè ze o hihitse am’ iereo zao?

10Aa le hatoloko am’ty ila’e

o tañanjomba’iareoo,

naho amo mpitavañeo o tete’iareoo;

amy te songa matiti-mena,

ty kede naho ty bey;

sindre mpikatramo

ty mpitoky pak’am-pisoroñe.

11Loho maivañe ty nanindria’ iareo

ty rare’ i anak’ ampela’ ondatikoy

ami’ty hoe: Fañanintsiñe, Fañanintsiñe;

aia ze o fanintsiñañe zao?

12Nimeñatse hao iereo te niota-faly?

Aiy avao! tsy nahasalatse iareo,

vaho tsy mahay minanake;

aa le hikorovoke amo mikorovokeo

naho hafetsake ambane

amy andro fitilihañe iareoy, hoe t’Iehovà.

13Toe ho mongoreko hoe t’Iehovà:

Ho po-balòboke o vaheo,

tsy ho amam-boa o sakoañeo,

naho hiheatse o rave’eo,

vaho hihelañe añe o nitolorakoo.

14Ino ty andrarean-tika toboke?

Mifanontona,

antao hizilik’ amo rova fatratseo

naho hianjiñe ao;

fa nampianjiñe antika t’Iehovà Andrianañaharentika,

vaho nanjotsoa’e ranon-afero

ho fikamañe, amy te nanao

hakeo am’ Iehovà tika.

15Nipay fierañerañañe tika

fe tsy nanjo hasoa;

naho andro fijanganañe,

fe hehe t’ie hebahebake!

16Janjiñeñe boake Dane

ty fikofòn-tsoavala;

manginikinike iaby i taney

ami’ty kofò’ o soavala lahi’eo;

amy t’ie pok’ eo mampibotseke

i taney naho ty halifora’e;

ty rova naho o mpimone’eo.

17Le ingo, hañirahako mereñe,

toe fandrefeala tsy mete avere,

hañehetse anahareo, hoe t’Iehovà.

18Tsy lefe melañeñe ty halendeñako! mitoirañe amako ao ty troko.

19Inao ty feon-kaikai’ o anak’ ampela’ ondatikoo boak’ an-tsietoitane añe,

tsy e Tsione ao hao t’Iehovà?

Tsy ama’e ao hao i Mpanjaka’ey?

Ino ty nampiboseha’iareo ahy

amo sare-soki’ iareoo,

naho amo samposampon’ ambahinio?

20Añe i fitatahañey, modo i asaray,

fe tsy voa-rombake tika.

21Mangirifiry ami’ty fangirifiria’ o anak’ ampela’ ondatikoo iraho;

miharovetse; fosatse;

mamihiñe ahy ty haemberañe.

22Tsy aman-kosotse hao ty Gilade1?

Po-panaha hao ty ao?

Inoñ’ arè ty tsy nahatotòtse

ty fijangana’ i anak’ ampela’ondatikoy?

23Ee t’ie ni-rano ty lohako,

naho niganaganake o masokoo,

hirovetako handro an-kaleñe

o nizamaneñe

amy anak’ ampela’ ondatikoy.