Iirmeà 7

1Ty tsara nahitri’ Iehovà am’ Iirmeà,

manao ty hoe:

2Mijohaña an-dalambein’

Anjomba’ Iehovà eo,

le koiho ty entañe toy, ami’ty hoe:

Mijanjiña ty tsara’ Iehovà

ry Iehodà iabio,

o mimoak’ amo lalam-bey retoio

hitalaho am’ Iehovào.

3Hoe t’Iehovà’ i Màroy:

t’i Andrianañahare’ Israele,

ahitio o lia’ areoo

naho o fitoloña’ areoo,

le hampimoneñeko an-tane atoy.

4Ko iantofa’ areo ty reha-bande

manao ty hoe:

Ty Anjomba’ Iehovà,

ty Anjomba’ Iehovà,

ty Anjomba’ Iehovà.

5Eka, naho toe avanta’ areo o lala’areoo

naho o fitoloña’areoo;

naho toe manao ty hato

añivo’ t’indaty naho i rañe’ey;

6Naho tsy forekeke’ areo ty ambahiny,

ty bode rae, vaho ty vantotse;

le tsy mampiori-dio-màliñe

an-tane atoy,

vaho tsy mañori-drahare ila’e

ho ami’ty fañelohañe anahareo;

7Le hampimoneñeko an-tane atoy,

ie tane natoloko an-droae’areo ho

nainai’e donia.

8Fe hehe t’ie miantoke

ty rehan-dremborake tsy manjofake.

9Mampikametse,

mañoho-doza, mpañarapilo,

manao fanta vilañe,

mibanabana amy Baale,

vaho mañorike ndrahare ila’e

tsy nifohi’ areo!

10Mbore mb’etoy, mijagarodoñe

añatrefako ami’ty anjomba tokaveñe

amy añarakoy toy, manao ty hoe:

Votsotse zahay, hitoloña’ areo

o hativàñe iabio.

11Aa vaho lakato’ malaso

am-pahaoniña’ areo hao

ty anjomba tokaveñe ami’ty añarako toy?

Heheke! izaho, eka izaho ty nahatrea,

hoe t’Iehovà.

12Akia arè, mb’amy ni-toeko

e Silòy1,

i nampimoneñako i añarakoy valoha’ey,

vaho oniño ty nanoako aze

ty amy haloloa’ ondatiko Israeleoy.

13Ie henane zao,

amy te fonga nanoe’ areo i sata rezay,

hoe t’Iehovà, le nitaroñe,

toe nañaleñale te nivolañe,

fe tsy nañaoñe nahareo,

vaho nitokaveko f’ie tsy nanoiñe.

14Aa le hanoeko amy anjomba tokaveñe

amy añarakoiy, i fiatoa’ areoy,

i toetse natoloko anahareo

naho an-droae’ areoy,

hambañe amy nanoeko e Siloy.

15Havokovokoko tsy ho treako nahareo,

hambañe ami’ty nandroahako

o rolongo’ areo iabio,

ze hene tarira’ i Efraime.

16Aa naho ihe, ko mihalaly

ho a’ ondaty retoañe,

ko añonjonan-koike ndra soloho,

vaho ko manao ondati-aivo amako

fa tsy ho haoñeko.

17Tsy oni’o hao ty anoe’ iareo

amo rova’ Iehodao

naho amo lala’ Ierosalaimeo?

18Mangàla-katae o ajajao,

mamiañe afo o rae’eo,

mañajary bokon-koba o rakembao

hamboara’ iareo vonga-mofo

i mpanjaka-ampelan-dikerañey;

vaho añiliña’ iareo enga rano

o ndrahare ila’eo,

hampibosek’ ahy.

19Izaho hao o sigihe’ iareoo?

Hoe t’Iehovà,

Tsy iereo avao ho ami’ty hasalara’iareo?

20Aa le hoe t’i Talè, Iehovà:

Inao! Hailiñe ami’ty toetse toy

ty habosehako naho ty fifomboko,

am’ondatio naho amo hareo,

amo hatae ankivokeo

naho ami’ty vokatse an-tane atoy;

ho forototoeñe, tsy lefe akipeke.

21Hoe t’Iehovà’ i Màroy,

i Andrianañahare’ Israeley:

Tovoño amo fisoroña’ areoo,

amo enga-koroa’ areoo

ty fikama’ areo i hena’ey.

22Fe tsy nivolañeko o roae’ areoo

tsy nililieko amy andro

naneseako iareo boak’an-tane

Mitsraime añey

ze o enga oroañeo naho o fisoroñañeo.

23Fe hoe ty nandiliako iareo,

Haoño ty feoko2

le ho Andrianañahare’ areo iraho,

naho ho ondatiko nahareo;

vaho añavelò iaby o lalañe

nililiakoo, soa te hiraorao.

24F’ie tsy nañaoñe iereo,

tsy nanongilan-dravembia,

te mone nañavelo

ami’ty fikililian-tro’ iareo,

añ’ereñeren’ arofo-lo,

vaho nidisa-voly fa tsy nionjoñe.

25Boak’amy andro niakaran-droae’ areo i Mitsraimey am-para’ ty andro toy,

le nañitrike o mpitoroko mpitoky iabio

mb’ama’ areo nañaleñaleñe te niraheñe;

26f’ie tsy nañaoñe ahy,

tsy nanokilan-dravembia,

toe nampigàn-kàtoke avao;

maro ty haratiañe nanoe’iereo

te aman-droae’iareo.

27Hene saontsio am’iareo o entañe zao,

f’ie tsy hijanjiñ’azo;

ho koihe’o, f’ie tsy hanoiñe azo.

28Hanoa’o ty hoe :

Itoy ty fifeheañe tsy nañorike

ty fiarañanaña’ Iehovà

Andrianañahare’ iareo,

tsy nañaom-panoroañe;

modo ty hatò, naito am-pivimbi’iareo.

29Hitsifo o maroi’oo, naho ahifiho añe;

añonjono an-kaboañe

maliolio ey ty fandalañe,

fa nifarie’ Iehovà vaho naforintse’e

ty tariratse nampiforoforo azey.

30Fa nanao raty am-pahatreavako

o ana’ Iehodao, hoe t’Iehovà;

napo’iareo añ’anjomba kanjieñe

amy añarakoy

o raha tiva’ iareoo, handeots’ aze.

31Mbore rinanji’ iareo o tamboho’

i Topete3 am-bavatanen’ana’ i Hinomeo4, hañoroañ’ añ’afo ao

o ana-dahi’ iareoo

naho o anak’ ampela’ iareoo—

ie tsy nililieko, tsy naereñèreko.

32Aa le ho tondroke ty andro,

hoe t’Iehovà,

t’ie tsy hanoeñe Topete ka,

tsy ho vavatanen’ana’ i Hinome,

fa ty vavatanem-panjamanañe,

amy te handeveñe e Topete ao iereo

am-para’ te tsy aman-toetse.

33Ho fihina’ o voron-tiokeo

naho o bibi’ ty tane toio ty lolo’

ondaty retoa;

vaho tsy eo ty handroake iareo.

34Hajiheko amo rova’ Iehodao

naho amo lala’ Ierosalaimeo

ty feon-kafaleañe naho ty feom-pirebehañe,

ty feom-pañenga naho ty feon’ engavao,

fa ho kòake i taney.