Iesaià 35

1Hifale ty ratraratra naho ty paipaiñe, hirebeke i vavataney,

vaho hitaroke hoe dokonose;

2Handrevake re vaho hirañaraña

an-drebeke naho sabo;

hatolots’aze ty enge’ i Lebanone,

ty hafanjàka’ i Karmele naho i Sarone; hahaisake ty enge’ Iehovà iereo,

ty volonahen’ Añaharen-tika.

3Haozaro o fitàn-kengeo

le hafatraro o ongotse mikoletrao,

4Ano ty hoe o embetse an-trokeo: Manintsiña, ko hembañe!

hehe te ho avy t’i Andrianañahare’ areo, aman-tambe naho famalean’ Añahare handrombake.

5Le hibeake ty fihaino’ o goao

naho ho sokafeñe ty ravembia’ o gìñeo;

6Hitsamboañe hoe hirañe ty kepeke

vaho hisabo an-kaehake ty famele’ o moañeo; higoangoañan-drano ty fatrambey naho ty torahañe am-bavatane eo.

7Hifotetse ho antara ty tane maike,

naho rano manganahana o paipaiñeo,

hitiria’ ty vinda o korontsom-panalokeo, vaho handimbe o ahetseo

ty tongoahara naho ty sale.

8Ho eo ty lalan-gadagadañe,

ty fañaveloañe hatao ty hoe

ty Lala-Piavahañe1,

tsy homb’ama’e ty tsy malio;

ie ho amo mpañavelo amy lalañey,

vaho tsy hihezeñe aze ty dagola.

9Tsy ho ama’e ty liona,

tsy hanganike ama’e ty biby romotse;

tsy ho zoeñe ao iereo,

fa ho fañaveloa’ o jinebañeo

10le himpoly o vinili’ Iehovào,

hipoña-tsabo mb’e Tsione mb’eo;

naho hafaleañe tsy modo ty ho añ’ambone’ iareo ;

Hitendreke firebehañe naho haravoañe vaho hihelañe añe ty hontoke

naho ty fiselekaiñañe.