Iesaià 34

1Mitotoha hijanjiñe ry fifeheañeo, mitsendreña ry ondatio!

Mitsanoña ry tane, naho ze halifora’e;

ty voatse toy naho ze hene aboa’e.

2Iforoforoa’ Iehovà o fifeheañeo1,

ifomboa’e iaby o lahindefo’eo;

fa zinama’e iereo,

nasese’e ho mongoreñe.

3Havokovoko alafe ao o vinono am’iareoo,

hakare’ o loloo ty fañati-fofo’e,

hidoandoañe amo vohitseo ty lio’ iareo,

4Ho momoke i valobohòn-dindiñey,

le hapeleke hoe 2tihy o likerañeo;

hene hihintsañe ty fifamorohota’ iareo manahake ty fiforejejen-dravem-bahe,

vaho i miheatse an-tsakoañey.

5Fa àtsa-dio andikerañe ao ty fibarako, hehe t’ie mizotso mb’ Edome mb’eo henaneo hizaka,

mb’am’ondaty nafàko harotsakeo.

6Etsa-dio ty fibara’ Iehovà,

nampivondrahen-tsolike,

ami’ty lio’ o añondrio naho o oseo,

ami’ty safom-boan-kobatroke;

fa manañe fisoroñañe e Botsrà añe

t’Iehovà,

naho fanjamanañe an-tane Edome ao.

7Hindre ama’e hizotso o ndrimoo,

o baniao rekets’ o maozatseo;

le ho kotsa-dio ty tane’ iareo,

vaho ho bobohen-tsolike ty debo’ iareo.

8Fa aman’andro hamalea’e t’Iehovà,

taoñe hañondroha’e i Tsione.

9Hovaeñe ho lokotara o toraha’eo,

ho solifara o lembo’eo;

hene hifotetse ho lokotara milebaleba

o tane’eo.

10Tsy hakipeke handro ndra haleñe, hitolom-­pionjoñe avao ty hatoe’e;

ho kòake an-tariratse an-tariratse,

tsy hirangañe nainai’e donia.

11Ho fanañan-tangongo

naho sama ty ao,

ho fimoneñam-borondolo naho koàke, ho vavare’e ama’e ty talin-kakoahañe

naho ty talim-polò hakapaihañe.

12O roandria’eo, tsy eo ty ho kanjieñe

ho mpanjaka;

kila ho mongotse o ana-dona’eo.

13Fatike ty hitiry amo fijilova’e fatratseo, hìsatse naho ropiteke amo kijoli’eo;

ho fitoboha’ o fanalokeo,

naho ty fanozora’ o voron-tsatrañeo.

14Ho fikaoña’ ty farasy naho ty fanaloke, hikoike o hamaroa’eo ty ose-lý;

Eka, hitoboke ao ty voron-dolo,

ho tendreke ao ty fitofa’e.

15Hamboare’ i lapetakey ty traño’e

naho hifana ao, naho hamoy,

vaho hatonto’e ambane’ talinjo’eo,

hifamory ao ty vantio,

songa amam-bali’e.

16Kodebeo ty boke’ Iehovà, le vakio:

tsy am’iereo ty ho motso,

sindre ho amam-bali’e;

i falie’ey ty nandily,

le i arofo’ey ty nanontoñe iareo.

17Niazo’e an-tsapake iareo,

le zinaram-pità’e am’iereo an-taly

o anjara’eo;

ho fanaña’ iareo nainai’e,

tariratse an-tariratse

ty fimoneña’ iareo.