Iesaià 3

1Hehek’ arè te

afaha’ Iehovà Talè’ i màroy

am’ Iehodà naho am’ Ierosalaime

ty fitoñoñe naho ty kobay,

ze mahakama an-driha ao iaby,

naho ze hene haja rano,

2Ty fanalolahy naho ty lahindefoñe,

ty mpizaka naho ty mpitoky,

ty mpisikily naho ty androanavy,

3Ty mpifeleke limampolo

naho ty manan-kasy,

ty mpanolo-kevetse,

ty kalitake vaho

ty mahay lañonañe.

4Ho tolorako ajaja ho roandria’e,

ho felehe’ o anak’ajajao iereo.

5Ho forekekèñe ondatio,

sindre ondaty ami’ty ilae’e,

songa ami’ty rañe’e

hijiajia amo androanavio ty ajaja,

naho amo vañoñeo ty tembo.

6Le hangazoñe t’indaty ty rahalahi’e

añ’anjomban-drae’e ao:

Manan-tsikin-drehe: feheo zahay,

le angao ho ambane’ fità’o eo

ty fianto toy.

7Hifanta amy andro zay re:

Izaho tsy ho mpanaha;

amy te tsy ama-mahakama

ndra saroñe ty an-trañoko ao,

aa le ko ampifehè’o ahy ondatio.

8Amy te nikoletra t’Ierosalaime

nihotrake t’Iehodà: songa mandietse Iehovà

ty fameleke naho ty fitoloñañe,

hanigike o fihainon-enge’eo.

9Manisý iareo ty vintan-dahara’ iareo;

ie misenge hakeo manahak’ i Sedome, tsy aeta’ iareo.

Hekoheko amo tro’ iareoo,

fa nikai-kankàñe am-bata’e.

10Misaontsia amo vantañeo ty hoe, Soa!

fa ho kamae’e o vokam-pitoloña’eo.

11Feh’ohatse amo lo­-tserekeo: ho silofeñe:

fa havahañe ama’e o satam-pità’eo.

12Le ty am’ondatikoo, ty ajaja ro talè’e,

naho ampela ro mpifeleke.

O ry ondatikoo, ampandilare’

o mpifehe’areoo,

abotse’iereo o lala ho norihe’areoo1.

13Miongake t’Iehovà hitaroñe,

mijohañe eo hizaka ondatio.

14Ho zakae’ Iehovà

o androanavi’ondati’eoo

naho o roandria’eo;

Amy te nabea’ areo

i tanem-balobokey;

añ’anjomba’areo ao o tinavañe

amo rarakeo.

15Ino ty atao’ areo,

kanao mampidemoke ondatikoo,

vaho mandisañe ty lahara’ o rarakeo?

hoe ty nafè’ Iehovà Talè’ i màroy.

16Mbore tinovo’ Iehovà ty hoe:

Kanao mitoandratoandra

o anak’ampela’ i Tsioneo,

naho miebotsebotse

am-bozo midagarìtse

naho ama-maso mikiroke,

ie mitsapiotsapiok’ am-piotroñañe,

vaho am-pikantsakantsañañe

ty tombo’ iareo,

17le ho silofe’ i Talè lañao

ty an-gadon-doha’

o anak’ampela’ i Tsioneo2,

vaho habora’ Iehovà ty fimeñara’ iareo.

18Hafaha’ i Talè amy andro zay

o mohara soa’ iareo mikorìñeo,

o ravak’ an-doha’eo,

o tsiandetse bontolio,

19o rojoo, o bangebangeo

o saron-doha mihofahofao,

20o satro-beio, o ravam-pandiao,

o ravan-dohao,

o fibandian’arañañeo, o kiviroo,

21o bangeo naho o kavin’ oroñeo,

22o saravio, naho o salampiñeo,

o kitambio

naho o haro-pitintiñañeo,

23o hetsoroo, o lamba leny marerarerao,

o sabakao vaho o tsingarakarakeo.

24Ho tondroke te ho limbeze’ ty fitrotrotse ty harifondrifoñe;

handimbe ty fiètse ty hàfotse;

handimbe ty volo mirandra ty loha peake;

handimbe ty marerarera ty gony;

hisolo ty montramontra ty soba.

25Ho zamaneñe am-pibara o lahilahi’oo,

an-kotakotak’ ao o lahindefo’oo.

26Handala naho hangololoike

o lalam-bei’eo;

ho farien-dre le hitozoke an-tane eo.