Iesaià 2

1Ty tsara nioni’ Iesaia ana’ i Amotse

ty am’ Iehodà naho Ierosalaime:

2Ho tondrok’ amo andro honka’eo te haoreñe ankaboa’ o vohitseo

ty vohin-anjomba’ Iehovà,

honjoneñe ambone’ o haboañeo;

vaho hikovovoke mb’ama’e mb’eo

ze kilakila ondaty.

3Maro ty rofòko homb’eo hanao ty hoe:

Antao, hionjoñe mb’ambohi’ Iehovà,

mb’añ’anjomban’Añahare’ Iakobe1;

hañòha’e antika o lala’eo,

hañaveloan-tika o oloñolo’eo;

amy te hionjoñe boake Tsione ao

ty Hàke,

naho boak’ Ierosalaime ao

ty tsara’Iehovà.

4Ie ty hizaka añivo’ o kilakila’ ndatio,

naho hifandahatse ami’ty maro;

le ho pehe’ iareo ho lelan-dasarý

o fibara’ iareoo

naho ho fibira miporengotse,

o lefo’ iareoo;

tsy hifañonjom-pibara

ami’ty fifeheañe ty fifeheañe

vaho tsy hioke hialy ka.

5O ry anjomba’ Iakobeo, mb’etoy, hañaveloan-tika ami’ty fireandrea’ Iehovà.

6Fa naforintse’ ondati’oo i anjomba’ Iakobey

fa àtsake ty sata’ o tatiñanañeo iereo,

naho o mpisikily manahake

o nte-Pilistioo2,

vaho mifañoho-pitàñe

amo anan’ambahinio.

7Pea volafoty naho volamena

ty tane’ iareo;

tsifotofoto ty vara’e,

tsitsike soavala ka ty tane’ iareo,

tsy vatse iaheñe o sarete’eo;

8Lifo-tsamposampo ka ty tane’ iareo;

italahoa’iareo o satam-pità’ iareoo,

o fitolon-drambom-pità’eo.

9Nafotsake ty fokonontsoa,

narèke ondatio;

aa le ko ihevea’o.

10Mimoaha am-bato ao,

mietaha an-debok’ ao,

am-pirevendreveñañe am’Iehovà,

naho ami’ty enge’ i volonahe’ey.

11Hareke ty fiebotsebo’ ondatio,

havokok’ ambane ty fibohabohà’ondatio,

Iehovà avao ro honjoneñe

amy andro zay.

12Fa manañ’andro amo mpirengevokeo

naho amo mpitahebokeo

t’Iehovà’ i Màroy

naho amy ze hene mitoabotse;

fa songa harèke;

13naho amo mendorave’

i Lebanone3 iabio,

o miligiligy amboneo,

naho amo kile’ i Basane4 iabio,

14naho amo vohitse abo iabio,

naho amy ze hene haboañe mionjoñe,

15Naho amo tilik’abo iabio,

naho amo fahetse matahetseo,

16Naho amo hene sambo’ i Tarsiseo,

vaho amo sare mahafalefaleo.

17Habotreke ty fitoabora’ ondaty,

le haketrake ty fitrotroabora’ondatio;

Iehovà avao ty honjoneñe amy andro zay.

18Vata’e hasiots’añe o hazomangao.

19Himoak’ an-davan-damilamy ao ondatio, naho an-dakato an-tane ao,

ami’ty fañeveñañe am’ Iehovà,

naho ami’ty engem-bolonahe’e,

ie hiongake hañozoñozoñe ty tane toy.

20Amy andro zay, le haria’ ondatio

amo sorao naho amo kananavio

o hazomanga volafoty naho

o hazomanga volamena

nitsenè’ iareo ho fitalahoañeo.

21Hitsifira’e an-tseram-bato ao,

naho am-bato tringitringieñe ao,

amy fihondrahondra’e am’ Iehovày,

naho amy engem-bolonahe’ey,

ie miongake hañozoñozoñe ty tane toy.

22Ko iatoa’o ondatio,

o mikofòk’ an-doak’oro’eo:

fa ho volilien-ko inon-dre?