Iesaià 10

1Hankàñe amo manampa-pepètse tsivokatseo,

naho o mampipatetse famorekekeañeo;

2Ty mampivike o ­misotrio

tsy hahazoa’e to,

vaho mitavañe ty zo’ o rarake am’ondatikoo,

hihaofa’ iareo o vantotseo,

hitsatsà’ iareo o bode-raeo!

3Aa le ino ty hanoe’ areo

amy androm-pitilihañey,

naho amy hekoheko hifetsake boak’añey?

fa hipay imba ama’ia nahareo?

vaho hapo’ areo aia ty vara’ areo?

4Ino ty hanoeñe,

naho tsy hitsilofìñe amo tsinepakeo,

ndra hitsingoritritse amo vinonoo?

Amy hoe zay iaby,

mboe tsy mitolike ty haviñera’e,

mbore mbe mitora-kitsy ty fità’e.

5O Asore, kobain-kaviñerakoo,

ry dodan-­katorifihako am-pità’ iareoo:

6Hiraheko haname ty fifeheañe

tsy ­vokatse,

hafantoko am’ondaty ­iviñerakoo, hikopaha’e naho hitsindroha’e vaho handialia’e hoe fotake an-dalañe eo.

7Tsy apota’e izay,

toe tsy am-pitsakorean-tro’e;

fe ty handrotsake ro firefea’e,

ty hañito fifeheañe maro.

8Fa hoe re: Tsy songa mpanjaka

hao o roandriakoo?

9Tsy hambañe amy Karkemise1

hao ty Kalnè2?

Naho amy Kamate3 ty Arpade4?

Vaho amy Damesèke ty Somerone?

10Manahake ty nitakaran-tañako

o borizañe an-tsamposampo tsieo,

ie maro te amo hazomanga e

Ierosalaime naho e Someroneo.

11Aa tsy hanoeko am’ Ierosalaime naho

o hazomanga’eo hao,

ty nanoeko amy Somerone reketse

o hazomanga’eo?

12Aa le ho tondroke te

ie nihenefa’ i Talè

ty fitoloña’e am-bohi’ i Tsioney eo

naho am’ Ierosalaime eo,

le hanao ty hoe:

Ho liloveko o vokan’ arofo

irengevoha’ i mpanjaka’ i Asoreio

naho o engen-dahara’e mievoñevoñeo,

13ami’ty nanoe’e ty hoe:

Ami’ty haozaran-tàñako naho ami’ty hihiko ty nanoako izay,

toe mahilala iraho;

fonga nafahako ty efe-tane’ondatio

naho nikamereko ty vara’ iareo,

vaho nampitsingoro o mpimone’ iareoo

hoe asam-panalolahy;

14Le nitakaren-tañako manahake te

nitrañom-boroñe ty vara’

ze hene ondaty;

hoe fitontonan-atoly naforintseñe

ty nanontonako ty tane toy iaby;

tsy teo ty nañetseke elatse,

ndra nanoka-bava, ndra nivolañe.

15Hiebotsebotse amy mitañ’azey

hao ty fekoñe?

Hitsingevongevo amy mandronje azey

hao ty lasý?

Manahake ty kobaiñe manjonjoñe

ty mivontititse ama’e,

naho ty fitoñoñe mañongake ty raha tsy hatae.

16Aa le hañitrike haborokàñe amo

vondra’eo t’i Talè, Iehovà’ i Màroy;

le ho viañeñe ambane’ i enge’ey eo

ty hatomomohañe hoe afo mamorototo.

17Hinjare afo ty failo’ Israele

naho lel’afo i Masi’ey;

hiforehetse hampitomontoñe

o fati’eo naho o hisa’eo

añate ty andro raike.

18Ty enge’ i ala’ey

naho i tete’e kobokaray ty

hagodra’e troke naho tsandriñe;

manahake ty finiha’ t’indaty siloke.

19Ho tsiampe ty hatae sisa añ’ala’e ao,

ndra ajaja ty hahavolily aze.

20Ho tondroke amy andro zay te tsy

hiato amy namofoke iareo ty sengaha’

Israele naho o nandrifitse amy

anjomba’ Iakobeio;

fe Iehovà Masi’ Israele

ty hiatoa’ iareo ami’ty hatò.

21Himpoly ty sehanga’e, ty honka’ Iakobe, mb’aman’ Añahare Tsitongereñe.

22Fa ndra te mira ami’ty faseñe

an-driakey ondati’oo ry Israele,

ty sehanga’e avao ty himpoly;

fa fanjamanañe

lifo-kavañonañe ty tinendre.

23Famongorañe do’e, toe najadoñe,

ty hafetsa’ i Talè, Iehovà’ i Màroy,

añ’ivo i tane iabiy.

24Aa le hoe t’i Talè, Iehovà’ i Màroy:

O ry ondatiko mpimoneñe e Tsioneo,

ko hembañe amy Asore,

ndra te fofohe’e an-doda,

naho añonjona’e kobay handafà’e azo

ami’ty sata’ i Mitsraime.

25Fa hanintsiñe aniany

o heloko miforoforoo,

vaho ho amy fandrotsahañe iareoy

ty habosehako.

26Le ho tsekafe’ Iehovà’ i Màroy ama’e

ty karavantsy,

manahake ty nanjamanañe i Midiane

am-bato’ i Orebe5 añe;

naho ho ambone’ i riakey ey ty kobai’e,

vaho honjone’e manahake ty nanoe’e amy Mitsraime.

27Ie amy andro zay, hihintsañe tsy

ho antsoro’o eo ty kilanka’e,

naho tsy ho an-kàto’o eo ty joka’e,

toe hipozake amy havondrahañey i jokay.

28Fa nivotrak’e Aiate6 re,

fa nirangae’e ty Migrone7;

e Mikmase8 ao ty nampipoha’e

o harao’eo;

29Nitsahe’ iereo i hebam-bohitsey;

nialeñe e Gèbà9 añe;

nihondrahondra t’i Ramae10;

nibotafotse añe ty Gibae11’ i Saole12.

30Mampikoiaha feo

ry anak’ ampela’ i Galime13:

manokilaña ravembia ry Laise14!

Ry Anatote15 mahaferenaiñeo!

31Fa nivoratsake ty Madmenae16;

fa mitsoloke o mpimone’ i Gebimeo17.

32Hitofa e Nobe18 ao re te anito,

hañonjo-haok’ amy vohi’ i anak’ampela’

i Tsione an-kaboa’ Ierosalaimey.

33Eka, ho birae’ i Talè, Iehovà’ i Màroy

an-kaviñerañe o tsampa’eo;

le ho firaeñe añe o mijoalao,

vaho ho tomoreñe o mininginingio.

34Ho firae’e am-biñe o ala matahetseo,

le hideboñe hoe fanalolahy t’i Lebanone.