Hosèa 5

1Inao, ry mpisoroñeo,

mitsendreña ry anjomba’ Israeleo,

manokilaña ravembia ry anjomba’

i mpanjakay, fa ama’ areo i zakay;

amy t’ie fandrik’ amy Mitspà1

naho harato nalafike ho amy Tabore2;

2vaho mpiola miheotse t’ie mandenta

ndra te nendahako.

3Fàntako t’i Efraime naho

tsy mietak’ amako t’Israele;

fa manao hakarapiloan-drehe Efraime,

vaho maleotse t’Israele.

4Tsy ho safirie’ iareo ty himpoly aman’Añahare’ iareo;

fa añivo’ iareo ao ty fañahin-kakarapiloañe,

vaho tsy fohi’ iereo t’Iehovà.

5Mitalily an-dahara’e

ty fiebotsebora’ Israele;

toly ndra hitsikapy an-kakèo

t’Israele naho i Efraime;

hiharo hihotrak’ am’ iereo ka t’Iehodà.

6Hendese’ iereo ty lia-rai’ iareo

naho o mpirai-tro’ iareoo

ho paia’ iereo t’Iehovà,

fe tsy ho oniñe, fa nisitake.

7Fa niola am’ Iehovà iereo,

naho nahatoly anak’amontoñe;

aa le habotse’ ty pea-bolañe

reke-panañañe.

8Tiofo e Gibà3 i antsivay

naho e Ramà4 i soliy;

koiho e Bet’avene ty hankàñe:

mitoliha ry Beniamine5.

9Ho koaheñe t’i Efraime

amy andro fandilovañey;

fa nampahafohineko o fifokoa’

Israeleo ze toe hifetsake.

10Manahake ty mpameve vorovoro

o roandria’ Iehodào;

hadoandoako am’ iereo hoe rano

ty habosehako.

11Forekekèñe t’i Efraime demok’ an-jaka;

ie nañorike haloloañe an-tsatri’e.

12Aa le ho bararaok’ amy Efraime iraho,

naho haloloañe amy anjomba’ Iehodày.

13Ie nahaoniñe i arete’ey t’i Efraime,

naho i fere’ey t’Iehodà,

le nihitrike mb’ Asorey mb’eo,

naho nisangitrife’e i mpanjaka Iaribey6;

f’ie tsy hahajangañ’ azo,

vaho tsy ho melañe’e i fere’oy.

14Ho liona amy Efraime iraho,

naho liona tora’e amy anjomba’ Iehodày;

Izaho le Izaho avao ty handrimitse

vaho hienga;

hinday iraho le ia ty haharombake.

15Homb’eo iraho himpoly

mb’añ’akibako añe,

ampara’ t’ie miantoke o hakeo’eo,

naho mipay ty tareheko;

ie am-poheke ro hitsoek’ahy.