जीवन को वचन
लैव्यव्यवस्था 21
याजकों की पवित्रता
फिर परमेश्वर न मूसा सी कह्यो, “हारून को टुरा जो याजक हय उन्कोसी कहजो कि तुम्हरो लोगों म सी कोयी भी मरेंन, त ओको वजह तुम म सी कोयी अपनो ख अशुद्ध नहीं करे; अपनो जवर को कुटुम्बियों, मतलब माय, बाप, टुरा, टुरी, यां भाऊ को लायी, या अपनी कुंवारी बहिन जेको बिहाव नहीं भयो होना, जिन्को जवर को सम्बन्ध हय; जेको कोयी पति नहाय उन्को लायी अपनो ख अशुद्ध कर सकय हय। पर याजक होन को वजह अपनो लोगों म मुखिया हय, येकोलायी ऊ अपनो आप ख असो अशुद्ध नहीं करे कि अपवित्र होय जाय।
“याजक अपनो मुंड को बाल नहीं मुंडाये, अऊर नहीं अपनी दाढ़ी मुंडाये, अऊर नहीं अपनो शरीर पर चिरा लगवाये। हि अपनो परमेश्वर लायी पवित्र बन्यो रहे, अऊर अपनो परमेश्वर को नाम अपवित्र नहीं करे; कहालीकि हि प्रभु की भेंट ख जो उन्को परमेश्वर को भोजन आय, चढ़ायो करय हय; यो वजह हि पवित्र बन्यो रहेंन। हि वेश्या यां भ्रष्ट बाई सी बिहाव नहीं करे, अऊर नहीं छोड़ी हुयी बाई सी बिहाव करे; कहालीकि याजक अपनो परमेश्वर लायी पवित्र होवय हय। येकोलायी तय याजक ख पवित्र मानो, कहालीकि ऊ तुम्हरो परमेश्वर को भोजन चढ़ायो करय हय; येकोलायी ऊ तोरी नजर म पवित्र ठहरे; कहालीकि मय यहोवा, जो तुम्ख पवित्र करू हय, मय पवित्र हय। 1अऊर याजक की टुरी वेश्या बन क अपनो आप ख अपवित्र करेंन, त वा अपनो बाप ख अपवित्र ठहरावय हय; ओख आगी म जलायो जाय।
“जो अपनो भाऊवों म महायाजक होना, जेको मुंड पर अभिषेक को तेल डाल्यो गयो होना, अऊर जेको पवित्र कपड़ा पहिनन लायी संस्कार करयो गयो होना ऊ अपनो मुंड को बाल बिखरन नहीं देयेंन, अऊर नहीं अपनो कपड़ा फाड़े; अऊर नहीं कोयी लाश को जवर जाय, अऊर नहीं अपनो बाप यां माय को वजह अपनो ख अशुद्ध करे; अऊर ऊ पवित्र जागा सी बाहेर नहीं जाये, अऊर नहीं अपनो परमेश्वर को पवित्र जागा ख अपवित्र ठहराये; कहालीकि ओको पर अपनो परमेश्वर को अभिषेक को तेल डाल्यो गयो हय; मय परमेश्वर आय। अऊर ऊ कुंवारी बाई सीच बिहाव करे। जो विधवा, यां छोड़ी हुयी, यां भ्रष्ट, यां वेश्या होना, असी बाई सी ऊ बिहाव नहीं करे, ऊ अपनोच लोगों को बीच म की कोयी कुंवारी टुरी सी बिहाव करे। अऊर ऊ अपनी सन्तान ख अपनो लोगों म अपवित्र नहीं करे; कहालीकि मय ओको पवित्र करन वालो परमेश्वर आय।”
फिर परमेश्वर न मूसा सी कह्यो, “हारून सी यो कहजो तोरो वंश म पीढ़ी सी पीढ़ी तक यदि कोयी म कोयी शारीरिक दोष होना, त ऊ अपनो परमेश्वर को भोजन चढ़ावन लायी जवर नहीं आयेंन। कोयी आदमी जेको म शारीरिक दोष होना ऊ जवर नहीं आये, चाहे ऊ अन्धा होना, चाहे लंगड़ा, चाहे चपटी नाक वालो होना, चाहे ओख कुछ जादा अंग होना, यां ओको पाय, यां हाथ विकलांग होना, यां कुबड़ो, यां ठिंगनो होना, यां ऊ आदमी ख खुजली होना, यां ऊ नपुसक होना; हारून याजक को वंश म सी जेको म शारीरिक दोष हय ऊ प्रभु लायी होमबलि चढ़ावन लायी जवर नहीं आये; जो दोषयुक्त हय ऊ कभी भी अपनो परमेश्वर को भोजन चढ़ावन लायी जवर नहीं आये। ऊ अपनो परमेश्वर को पवित्र अऊर परमपवित्र दोयी तरह को भोजन खाये, पर ओको दोष को वजह ऊ नहीं बीचवालो परदा को अन्दर आये अऊर नहीं वेदी को जवर, जेकोसी असो नहीं होय कि ऊ मोरो पवित्र जागा ख अपवित्र करे; कहालीकि मय उन्को पवित्र करन वालो परमेश्वर आय।”
येकोलायी मूसा न हारून अऊर ओको टुरावों ख अऊर सब इस्राएलियों ख या बाते कहीं।
Source notes (1)
- Cross-reference प्रकाशितवाक्य 17:16
जीवन को वचन. Copyright © 2020-2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.