लैव्यव्यवस्था 15

शरीर सी बहन वालो अशुद्ध स्राव

1फिर परमेश्वर न मूसा अऊर हारून सी कह्यो, 2“इस्राएली लोगों सी कहो, कि जो कोयी आदमी को शरीर सी धात बहय हय, त ओको धात अशुद्ध हय। 3ऊ धात चाहे बहतो रहे, यां बहनो बन्द भी होय जाये, तब भी ओकी अशुद्धता बनी रहेंन। 4धात बहन वालो आदमी जो बिस्तर पर आराम करय हय ऊ बिस्तर अशुद्ध होय जावय हय, अऊर हर एक चिज जेको पर ऊ बैठय हय ऊ भी अशुद्ध होय जावय हय। 5अऊर जो कोयी ओको बिस्तर ख छुवय ऊ भी अपनो कपड़ा ख धोय क पानी सी नहाय ले, अऊर ऊ शाम तक अशुद्ध रहेंन। 6अऊर जो चिज पर ऊ धात बहन वालो आदमी बैठय हय, ऊ चिज पर दूसरो कोयी आदमी बैठय हय त ऊ भी अपनो कपड़ा धोय क पानी सी नहाये, अऊर शाम तक अशुद्ध रहे। 7अऊर धात बहन वालो आदमी को शरीर ख कोयी छुय ले त ऊ भी अपनो कपड़ा धोय क पानी सी नहाय क अऊर शाम तक अशुद्ध रहे। 8यदि धात बहन वालो आदमी कोयी शुद्ध आदमी पर थूक देवय हय, त ऊ अपनो कपड़ा धोय क पानी सी नहाय क शाम तक अशुद्ध रहे। 9अऊर जो वाहन पर ऊ बैठय हय त ऊ चिज अशुद्ध ठहरे। 10यदि कोयी आदमी उन चिजों म सी कोयी ख भी छुय लेवय हय, जो धात बहन वालो आदमी को खल्लो की हय त ऊ शाम तक अशुद्ध रहेंन। अऊर जो कोयी आदमी ऊ चिज ख उठावय हय त ऊ अपनो कपड़ा ख धोय क पानी सी नहाय ले, अऊर शाम तक अशुद्ध रहे। 11यदि धात बहन वालो आदमी बिना हाथ धोयो कोयी ख छुय लेवय त ऊ अपनो कपड़ा धोय क पानी सी नहाय क शाम तक अशुद्ध रहे। 12अऊर धात बहन वालो आदमी कोयी माटी को बर्तन ख छुय लेवय हय त ओख तोड़ दियो जाये, अऊर यदि लकड़ी को बर्तन हय त उन सब बर्तन ख पानी सी धोयो जाय।

13“जब धात बहन वालो आदमी अपनो धात सी शुद्ध होय जाये, तब ऊ अपनो शुद्ध होन लायी सात दिन गिन ले, अऊर ऊ दिन बीतन पर अपनो कपड़ा ख धोय क बहतो हुयो पानी सी नहाय ले; तब ऊ शुद्ध ठहरेंन। 14अऊर आठवों दिन ऊ दोय पंडुक यां कबूत्तरी को दोय बच्चा लाय क मिलाप वालो तम्बू को फाटक पर परमेश्वर को सामने याजक ख दे। 15तब याजक उन म सी एक पापबलि लायी, अऊर दूसरो होमबलि लायी भेंट चढ़ाये; अऊर याजक ओको लायी धात को वजह परमेश्वर को सामने प्रायश्चित करे।

16“फिर यदि कोयी आदमी को वीर्यपात होय जावय हय, त ऊ अपनो पूरो शरीर ख पानी सी धोये, अऊर ऊ शाम तक अशुद्ध रहेंन। 17अऊर जो कोयी कपड़ा पर यां चमड़ा पर ऊ वीर्य गिरय हय त ओख पानी सी धोयो जाये, अऊर शाम तक अशुद्ध रहेंन। 18यदि कोयी आदमी कोयी बाई सी सहवास करय अऊर यो प्रक्रिया म ओको वीर्यपात भयो होना, त हि दोयी पानी सी नहाये, अऊर शाम तक अशुद्ध रहे।

19“फिर जब कोयी बाई मासिक धर्म म रहे, त वा सात दिन तक अशुद्ध ठहरी रहे, अऊर जो कोयी ओख छुयेंन ऊ शाम तक अशुद्ध रहेंन। 20अऊर वा अपनो मासिक धर्म म जो चिज पर वा सोवय हय यां बैठय हय, त ऊ सब चिज अशुद्ध ठहरेंन। 21अऊर जो कोयी ओको बिस्तर ख छुयेंन ऊ अपनो कपड़ा धोय क पानी सी नहाये, अऊर शाम तक अशुद्ध रहे। 22अऊर जो कोयी ऊ चिज ख छुय लेवय हय जेको पर वा बैठय हय त ऊ अपनो कपड़ा धोय क पानी सी नहाये, अऊर शाम तक अशुद्ध रहेंन। 23चाहे यो ओको बिस्तर यां कोयी भी चिज होना जेको पर वा बैठय हय, यदि कोयी ओख छुय लेवय हय, त ऊ शाम तक अशुद्ध रहेंन। 24यदि कोयी आदमी ओको संग हकिकत म सहवास कर लेवय हय अऊर वा बाई की मासिक धर्म अशुद्धता ओको पर आय जावय हय, त ऊ सात दिन तक अशुद्ध रहेंन, अऊर हर एक बिस्तर पर ऊ सोवय हय अशुद्ध ठहरेंन।

25“यदि कोयी बाई ख खून बहनो ओको मासिक धर्म अशुद्धता को समय मच नहीं बल्की ओको अलावा भी जादा दिनों तक खून बहतो रहे, त वा मासिक धर्म अशुद्धता को जसी अशुद्ध रहेंन। 26जो जो बिस्तर पर वा अपनो खून बहन को दिनों म सोवय हय, त वा मासिक धर्म को जसी अशुद्ध ठहरेंन; अऊर जो बिस्तर पर वा बैठेंन, हि भी ओको मासिक धर्म रहन को दिनों को जसो अशुद्ध ठहरेंन। 27अऊर जो कोयी उन चिजों ख छुयेंन ऊ अशुद्ध ठहरेंन, येकोलायी ऊ अपनो कपड़ा धोय क पानी सी नहाये, अऊर शाम तक अशुद्ध रहेंन। 28पर जब वा बाई अपनो मासिक धर्म सी शुद्ध होय जाये, तब सी वा सात दिन गिन ले, उन दिनों को बितन को बाद वा शुद्ध ठहरेंन। 29फिर वा आठवों दिन दोय पंडुक यां कबूत्तर को दोय बच्चा लाय क मिलाप वालो तम्बू को फाटक पर याजक को जवर लाये। 30तब याजक एक ख पापबलि अऊर दूसरों ख होमबलि लायी चढ़ाये; अऊर याजक ओको मासिक धर्म अशुद्धता को लायी परमेश्वर को सामने प्रायश्चित करे।

31“यो तरह तुम इस्राएली समाज ख उन्की अशुद्धता सी अलग रखो, कहीं असो नहीं होय कि हि मोरो तम्बू ख जो उन्को बीच म हय, अशुद्ध करे अऊर अपनी अशुद्धता को वजह मर जाय।”

32जेको धात बह रह्यो हय अऊर जो आदमी को वीर्यपात होन को वजह ऊ अशुद्ध होय जावय हय, 33अऊर जो बाई मासिक धर्म अशुद्धता को वजह अस्वस्थ होना; पर चाहे आदमी होना यां बाई होना, जो कोयी ख धात रोग होना, अऊर जो आदमी अशुद्ध बाई सी सहवास करय हय, त इन सब लायी याच व्यवस्था आय।