जीवन को वचन
उत्पत्ति 5
आदम की वंशावली
(१ इतिहास 1:1-4)
आदम की वंशावली को विवरन यो तरह हय। जब परमेश्वर न आदम ख बनायो त ओन उन्ख अपनो जसो बनायो। ओन उन्ख नर अऊर नारी बनायो, जब हि दोयी बनायो गयो, तब ओन ओको नाम आदम रख्यो अऊर उन्ख आशीर्वाद दियो। जब आदम एक सौ तीस साल को भयो, तब ओको सी ओको जसो एक टुरा पैदा भयो जो ओको समान होतो, अऊर ओन ओको नाम शेत रख्यो। अऊर शेत को जनम को बाद आदम आठ सौ साल तक जीन्दो रह्यो, अऊर ओख अऊर भी टुरा टुरी पैदा भयो। यो तरह आदम कुल नव सौ तीस साल जीन्दो रह्यो, तब बाद म ओकी मृत्यु भय गयी।
जब शेत एक सौ पाच साल को भयो, तब ओको सी एनोश पैदा भयो। एनोश को जनम को बाद शेत आठ सौ सात साल तक जीन्दो रह्यो, अऊर ओख अऊर भी टुरा टुरी पैदा भयी। यो तरह शेत कुल नव सौ बारा साल जीन्दो रह्यो; ओको बाद ओकी मृत्यु भय गयी।
जब एनोश नब्बे साल को भयो, तब ओन केनान ख पैदा करयो। केनान को जनम को बाद एनोश आठ सौ पन्द्रा साल तक जीन्दो रह्यो, अऊर ओख अऊर भी टुरा टुरी पैदा भयी यो तरह एनोश कुल नव सौ पाच साल जीन्दो रह्यो; ओको बाद ओकी मृत्यु भय गयी।
जब केनान सत्तर साल को भयो, तब ओन महल्लेल ख पैदा करयो। महल्लेल को जनम को बाद केनान आठ सौ चालीस साल तक जीन्दो रह्यो, अऊर ओख अऊर भी टुरा टुरी पैदा भयी। यो तरह केनान कुल नव सौ दस साल जीन्दो रह्यो; ओको बाद ओकी मृत्यु भय गयी।
जब महल्लेल पैसठ साल को भयो, तब ओन येरेद ख पैदा करयो। येरेद को जनम को बाद महल्लेल आठ सौ तीस साल तक जीन्दो रह्यो, अऊर ओख अऊर भी टुरा टुरी भयी। यो तरह महल्लेल कुल आठ सौ पंचानबे साल जीन्दो रह्यो; ओको बाद ओकी मृत्यु भय गयी।
जब येरेद एक सौ बाहसठ साल को भयो, तब ओन हनोक ख पैदा करयो। हनोक को जनम को बाद येरेद आठ सौ साल तक जीन्दो रह्यो, अऊर ओख अऊर भी टुरा टुरी भयी। यो तरह येरेद कुल नव सौ बाहसठ साल जीन्दो रह्यो; ओको बाद ओकी मृत्यु भय गयी।
जब हनोक पैसठ साल को भयो, तब ओन मतूशेलह ख पैदा करयो। मतूशेलह को जनम को बाद हनोक तीन सौ साल तक परमेश्वर को संग संग चलतो रह्यो, अऊर ओख अऊर भी टुरा टुरी भयी। यो तरह हनोक कुल तीन सौ पैसठ साल जीन्दो रह्यो। हनोक परमेश्वर को संग संग चलत होतो; तब ऊ गायब भय गयो, कहालीकि परमेश्वर न ओख उठाय लियो।2
जब मतूशेलह एक सौ सत्तासी साल को भयो, तब ओको सी लेमेक ख पैदा करयो। लेमेक को जनम को बाद मतूशेलह सात सौ बयासी साल तक जीन्दो रह्यो, अऊर ओख अऊर भी टुरा टुरी भयी। यो तरह मतूशेलह कुल नव सौ उनसत्तर साल जीन्दो रह्यो; ओको बाद ओकी मृत्यु भय गयी।
जब लेमेक एक सौ बयासी साल को भयो, तब ओन एक बच्चा पैदा करयो। अऊर ओन ओको नाम नूह रख्यो, अऊर कह्यो, “जो जमीन ख प्रभु न श्राप दियो हय, ओको बारे म यो लड़का हमरो कार्य करतो समय हमरो कठिन कामों म जो हम करजे हंय, यो हम्ख आराम देयेंन।” नूह को जनम को बाद लेमेक पाच सौ पंचानबे साल तक जीन्दो रह्यो, अऊर ओख अऊर भी टुरा टुरी भयी। यो तरह लेमेक कुल सात सौ सतहत्तर साल जीन्दो रह्यो; ओको बाद ओकी मृत्यु भय गयी।
अऊर जब नूह पाच सौ साल को भयो, तब ओन शेम, हाम अऊर येपेत ख पैदा करयो।
Source notes (2)
- Cross-reference उत्पत्ति 1:27
- Cross-reference इब्रानियों 11:5; यहोशू 14; यूहन्ना 14
जीवन को वचन. Copyright © 2020-2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.