उत्पत्ति 46

याकूब ख पूरो परिवार सहीत मिस्र ख जानो

1तब याकूब अपनो सब कुछ ले क बेर्शेबा ख गयो, अऊर उत अपनो बाप इसहाक को परमेश्वर ख बलिदान चढ़ायो। 2तब परमेश्वर न याकूब सी रात ख दर्शन म कह्यो, “हे याकूब, हे याकूब।”

ओन कह्यो, “का आज्ञा हय।”

3परमेश्वर न कह्यो, “मय परमेश्वर आय, तोरो बाप को परमेश्वर; तय मिस्र म जान सी मत डर; कहालीकि मय तोरो सी उत एक बड़ी जाति बनाऊं। 4मय तोरो संग संग मिस्र ख चलू हय, अऊर मय तोख उत सी फिर सी वापस ले आऊं; अऊर यूसुफ अपनो हाथ सी तोरी आंखी ख बन्द करेंन।”

5तब याकूब बेर्शेबा सी चल्यो; अऊर याकूब को टुरा अपनो बाप याकूब अऊर अपनो टुरावों न, अऊर बाईयों ख उन गाड़ियों पर बैठायो, जो फिरौन न उन्ख लिजान लायी भेजी होती। 61हि अपनी शेरी मेंढी गाय बईल, अऊर कनान देश म अपनो जमा करयो हुयो पूरो धन ख ले क मिस्र म आयो; 7अऊर याकूब अपनो टुरा टुरियां, नाती नातिन, यानेकि अपनो पूरो वंश ख अपनो संग मिस्र देश म ले आयो।

8याकूब को संग जो इस्राएली, यानेकि याकूब को टुरा, नाती पहिले, मिस्र देश म आयो, उन्को नाम यो हंय : याकूब को बड़ो टुरा रूबेन होतो; 9अऊर रूबेन को टुरा हनोक, पल्लू, हेस्रोन अऊर कर्म्मी होतो। 10शिमोन को टुरा यमूएल यामीन, ओहद, याकीन, सोहर, अऊर एक कनानी बाई सी जनम्यो हुयो शाऊल भी होतो। 11लेवी को टुरा गेर्शोन, कहात, अऊर मरारी होतो। 12यहूदा को टुरा एर, ओनान, शेला, पेरेस, अऊर जेरह नाम को टुरा भयो त होतो पर एर अऊर ओनान कनान देश म मर गयो होतो; अऊर पेरेस को टुरा हेस्रोन अऊर हामूल होतो। 13इस्साकार को टुरा तोला, पुब्बा, योब, अऊर शिम्रोन होतो। 14जबूलून को टुरा सेरेद एलोन, अऊर यहलेल होतो। 15लिआ : को टुरा जो याकूब सी पद्दनराम म पैदा भयो होतो, उन्को बेटा अऊर नाती हिच होतो, अऊर इन्को सी जादा ओन ओको संग एक बेटी दीना ख भी जनम दियो। यहां तक त याकूब को सब वंश वालो तैंतीस लोग भयो।

16तब गाद को टुरा सिय्योन, हाग्गी, शूनी, एसबोन, एरी, अरोदी, अऊर अरेली होतो। 17आशेर को टुरा यिम्ना, यिश्वा, यिस्वी, अऊर उन्की बहिन सेरह होती; अऊर बरीआ को टुरा हेबेर अऊर मल्कीएल होतो। 18जिल्पा, जेक लाबान न अपनी बेटी लिआ : ख दी होती, ओको बेटा अऊर नाती पहिले हिच होतो; अऊर ओको द्वारा याकूब को सोला लोग पैदा भयो।

19तब याकूब की पत्नी राहेल को टुरा यूसुफ अऊर बिन्यामीन होतो। 202अऊर मिस्र देश म ओन को याजक पोतीपेरा की बेटी आसनत सी यूसुफ को यो बेटा पैदा भयो, यानेकि मनश्शे अऊर एप्रैम। 21अऊर बिन्यामीन को टुरा बेला, बेकेर, अश्बेल, गेरा, नामान, एही, रोश, मुप्पीम, हुप्पीम अऊर आर्द होतो। 22राहेल को टुरा जो याकूब सी पैदा भयो ओको योच टुरा होतो; ओको यो सब बेटा अऊर नाती चौदा लोग भयो।

23तब दान को टुरा हूशीम होतो। 24नप्ताली को टुरा यहसेल, गूनी, सेसेर, अऊर शिल्लेम होतो। 25बिल्हा दासी, जेक लाबान न अपनी बेटी राहेल ख दियो, ओको बेटा अऊर नाती हिच आय; ओको द्वारा याकूब को वंश म सात लोग भयो।

26याकूब को वंश को पूरो लोग जो उन्को संग मिस्र म आयो होतो, याकूब की बहुवों ख छोड़ क सब मिल क छियासठ लोग होतो। 273अऊर यूसुफ को बेटा, जो मिस्र म ओको सी पैदा भयो, हि दोय लोग होतो; यो तरह याकूब को घरानो को जो लोग मिस्र म आयो हि सब मिल क सत्तर भयो।

याकूब अऊर ओको परिवार मिस्र पहुंच्यो

28तब याकूब न यहूदा ख अपनो आगु यूसुफ को जवर भेज दियो कि ऊ ओख गोशेन की रस्ता दिखाये; अऊर हि गोशेन देश म आयो। 29तब यूसुफ अपनो रथ जुतवाय क अपनो बाप याकूब सी भेंट करन लायी गोशेन देश ख गयो, अऊर याकूब सी भेंट कर क् ओको गलो सी लपट्यो, अऊर बहुत देर तक याकूब को गलो सी लपट्यो हुयो रोतो रह्यो। 30तब याकूब न यूसुफ सी कह्यो, “मय अब मरनो सी भी प्रसन्न हय, कहालीकि तोख जीन्दो पायो अऊर तोरो मुंह देख लियो।”

31तब यूसुफ न अपनो भाऊवों सी अऊर अपनो बाप को घरानो सी कह्यो, “मय जाय क फिरौन ख यो कह्य क समाचार देऊं, ‘मोरो भाऊ अऊर मोरो बाप को पूरो घरानो को लोग, जो कनान देश म रहत होतो, हि मोरो जवर आय गयो हंय; 32अऊर हि लोग चरवाहे हंय, कहालीकि हि जनावरों ख पालतो आयो हंय; येकोलायी हि अपनी शेरी मेंढी, गाय बईल, अऊर जो कुछ उन्को हय, सब ले आयो हंय।’ 33जब फिरौन तुम ख बुलाय क पूछे, ‘तुम्हरो धन्दा का हय?’ 34तब यो कह्यजो, ‘तोरो दास बचपन सी ले क अज तक जनावरों ख पालतो आयो हंय, बल्की हमरो पूर्वज भी असोच करत होतो।’ येको सी तुम गोशेन देश म रहनो पावों; कहालीकि सब चरवाहों सी मिस्री लोग घृना करय हंय।”