उत्पत्ति 42

यूसुफ को भाऊवों को मिस्र म अनाज लेन लायी आनो

1जब याकूब न सुन्यो कि मिस्र म अनाज हय, तब ओन अपनो बेटावों सी कह्यो, “तुम एक दूसरो को मुंह कहाली देख रह्यो हय।” 21तब ओन कह्यो, “मय न सुन्यो हय कि मिस्र म अनाज हय; येकोलायी तुम लोग वहां जाय क हमरो लायी अनाज ले क आवो, जेको सी हम मरबो नहीं, बल्की जीन्दो रह्यबोंन।” 3तब यूसुफ को दस भाऊ अनाज लेन लायी मिस्र देश ख गयो। 4पर यूसुफ को भाऊ बिन्यामीन ख याकूब न यो सोच क भाऊवों को संग नहीं भेज्यो कि कही असो नहीं होय कि ओको पर कोयी संकट आय पड़े।

5यो तरह जो लोग अनाज लेन आयो उन्को संग याकूब को बेटा भी आयो; कहालीकि कनान देश म भी भारी अकाल होतो। 6यूसुफ त मिस्र देश को प्रधान मन्त्री होतो, अऊर ऊ देश को सब लोगों ख उच अनाज बेचत रह्य; येकोलायी जब यूसुफ को भाऊ आयो तब जमीन को तरफ मुंड झुकाय क ओख दण्डवत करयो। 7उन्ख देख क यूसुफ न पहिचान त लियो, पर उन्को आगु भोलो बन क् मजबूती को संग उन्को सी पुच्छ्यो, “तुम कित सी आयो हय?”

उन्न कह्यो, “हम कनान देश सी अनाज लेन लायी आयो हंय।”

8यूसुफ न अपनो भाऊवों ख पहिचान लियो, पर उन्न ओख नहीं पहिचान्यो। 92तब यूसुफ अपनो उन सपनो ख याद कर क् जो ओन ओको बारे म देख्यो होतो, उन्को सी कहन लग्यो, “तुम लोग भेद जानन लायी आयो हय; यो मिस्र देश की दुर्दशा को।”

10उन्न ओको सी कह्यो, “नहीं, नहीं, स्वामी, तोरो दास जेवन की चिज ख लेन लायी आयो हंय। 11हम सब एकच बाप को बेटा आय, हम सीधो आदमी हंय; तोरो दास भेद जानन वालो नोहोय।”

12यूसुफ न उन्को सी कह्यो, “नहीं, नहीं, तुम यो देश की दुर्दशा देखन लायीच आयो हय।”

13उन्न कह्यो, “हम तोरो दास बारा भाऊ हंय, अऊर कनान देश को हम एकच आदमी को बेटा आय, अऊर छोटो भाऊ यो समय हमरो बाप को जवर हय, अऊर एक भाऊ मर गयो हय।”

14तब यूसुफ न उन्को सी कह्यो, “मय न तुम सी कह्य दियो कि तुम भेद जानन वालो आय; 15तब योच रीति सी तुम्हरी जांच करी जायेंन, फिरौन की जीवन की कसम, जब तक तुम्हरो छोटो भाऊ इत नहीं आय जाये तब तक तुम इत सी नहीं निकल पावों। 16येकोलायी अपनो म सी एक ख भेज देवो कि ऊ तुम्हरो भाऊ ख ले आये, अऊर तुम लोग हमरी देख भाल म रहो; यो तरह तुम्हरी बाते जाची जायेंन कि तुम म सच्चायी हय का नहाय। यदि सच्चो नहीं निकल्यो तब त फिरौन को जीवन की कसम तुम सही मच भेद जानन वालो समझ्यो जावो।” 17तब यूसुफ न उन्ख तीन दिन तक जेलखाना म रख्यो।

18तीसरो दिन यूसुफ न उन्को सी कह्यो, “एक काम करो तब जीन्दो रहो; कहालीकि मय परमेश्वर को डर मानु हय; 19यदि तुम सीधो आदमी हय, त तुम सब भाऊवों म सी एक जन यो जेलखाना म बन्दी रहे; अऊर तुम अपनो घर वालो की भूख मिटान लायी अनाज ले जावो, 20अऊर अपनो छोटो भाऊ ख मोरो जवर ले आवो; यो तरह तुम्हरी बाते सच्ची ठहरेंन, अऊर तुम मार डाल्यो नहीं जावो।”

तब उन्न वसोच करयो। 21उन्न आपस म कह्यो, “कोयी सक नहाय कि हम अपनो भाऊ को बारे म दोषी हंय, कहालीकि जब ओन हम सी गिड़गिड़ाय क बिनती करी, तब भी हम न यो देख क कि ओको जीवन कसो संकट म पड़्यो हय, तब भी हम न ओकी नहीं सुनी; योच वजह हम भी अब यो संकट म पड़्यो हंय।” 223

रूबेन न ओको सी कह्यो, “का मय न तुम सी नहीं कह्यो होतो कि टुरा को अपराधी मत बनो? पर तुम न नहीं सुन्यो। देखो, अब ओको खून को बदला लियो जाय रह्यो हय।” 23यूसुफ की अऊर उन्की बातचीत एक दोय भाषियों को द्वारा होत रह्य; येको सी उन्ख मालूम नहीं भयो कि ऊ उन्की बोली समझय हय। 24तब यूसुफ उन्को जवर सी हट क रोवन लग्यो; तब अऊर उन्को जवर लौट क उन्को सी बातचीत कर क् उन्म सी शिमोन ख निकाल्यो अऊर उन्को आगु ओख बन्दी बनाय लियो।

यूसुफ को भाऊवों को कनान लौटनो

25तब यूसुफ न आज्ञा दी कि उन्को बोरा अनाज सी भरो अऊर एक एक जन को बोरा म ओको रुपया ख भी रख देवो, तब उन्ख रस्ता लायी भी जेवन की चिजे भी देवो। तब उन्को संग असोच करयो गयो। 26तब हि अपनो अनाज को बोरा अपनो गधा पर लाद क उत सी चली गयो। 27सराय म जब एक न अपनो गधा ख चारा देन लायी अपनो बोरा खोल्यो, तब ओको रुपया बोरा को ऊपर रख्यो हुयो देख्यो। 28तब ओन अपनो भाऊवों सी कह्यो, “मोरो रुपया त लौटाय दियो गयो हय; देखो, ऊ मोरो बोरा म हय,” तब उन्को जीव म जीव नहीं रह्यो, अऊर हि एक दूसरो को तरफ डर सी देखन लग्यो, अऊर बोल्यो, “परमेश्वर न यो हम सी का करयो हय।”

29तब हि कनान देश म अपनो बाप याकूब को जवर आयो, अऊर अपनी पूरी बात ओख यो तरह सुनायो : 30“जो आदमी मिस्र देश को स्वामी हय, ओन हम सी मजबूती को संग बाते करी, अऊर हम ख ओन ऊ देश को भेद जानन वालो कह्यो। 31तब हम न ओको सी कह्यो, ‘हम सीधो लोग हंय, भेद जानन वालो नहीं। 32हम बारा भाऊ एकच बाप को बेटा आय; एक त मर गयो, पर छोटो भाऊ कनान देश म बाप को जवर हय।’ 33तब ऊ आदमी न, जो ऊ देश को स्वामी हय, हम सी कह्यो, ‘येको सी मालूम होय जायेंन कि तुम सीधो आदमी हय; तुम अपनो म सी एक ख मोरो जवर छोड़ क अपनो घर वालो की भूख मिटान लायी कुछ ले क जावो, 34अऊर अपनो छोटो भाऊ ख मोरो जवर ले क आवो। तब मोख विश्वास होय जायेंन कि तुम भेद जानन वालो नोहोय, पर सीधो लोग आय। तब मय तुम्हरो भाऊ ख तुम्ख सौंप देऊं, अऊर तुम यो देश म लेन देन भी कर सको’।”

35यो बताय क हि अपनो अपनो बोरा सी अनाज निकालन लग्यो, तब देख्यो कि एक एक जन को रुपया की झोली ओकोच बोरा म रखी हय। तब रुपया की झोलियों ख देख क हि अऊर उन्को बाप बहुत डर गयो। 36तब उन्को बाप याकूब न उन्को सी कह्यो, “मोख तुम न बिना सन्तान को कर दियो, देखो, यूसुफ नहीं रह्यो, अऊर शिमोन भी नहीं आयो, अऊर तुम बिन्यामीन ख भी लि जानो चाहवय हय। यो सब विपत्तियां मोरो ऊपर आय पड़ी हंय।”

37रूबेन न अपनो बाप सी कह्यो, “यदि मय ओख तोरो जवर नहीं लाऊ, त मोरो दोयी टुरावों ख मार डालजो; तय ओख मोरो हाथ म सौंप दे, मय ओख तोरो जवर फिर लाय देऊं।”

38याकूब न कह्यो, “मोरो बेटा तुम्हरो संग नहीं जायेंन; कहालीकि ओको भाऊ मर गयो हय अऊर ऊ अब अकेलो रह्य गयो हय : येकोलायी जो रस्ता सी तुम जावो, ओको म यदि ओको पर कोयी विपत्ति आय गयी, तब त तुम्हरो वजह मय यो बुढ़ापा को दिन म दु:ख को संग अधोलोक म उतर जाऊं।”