Skip to content
BibleKenya

MUNGA TRANSLATION PROJECT

Matta 7

Bǝto Kwan Lǝ Yakun

(Luka 6:37,38, 41,42)

<< Bǝ ɓa to kwan lǝ yakun thǝ, yang Fuh to ɓǝ kwanu langɓǝ. Bakwɔ Fuh a toa kwan manung akwɔ dǝma to kwan lǝ yakun ɓǝ, langkwoi u naa nungtthǝ manungkwɔ dǝmma nalǝ yakun tthǝ ɓǝ.

<< Ən baɓǝ yang, dǝɓa ɓyǝa yui kong kab kwɔ nung youngmǝ yang a la bǝ ɓyǝa gong kong kab kwɔ nungmǝ ɓǝwa? Ən baɓǝ bǝ ma gei youngmǝ mangǝ, <Dǝi sua, ǝn ilǝ yui kong kab kwɔ nungmǝ ɓǝ,>kwɔ gong kong kab nung amǝlǝ ɓa? Ɓǝ ya pǝllǝ! A osi a ilǝ gong kong kab kwɔ nungmǝ ɗǝ, yangbǝ a ɓyǝa kaitthǝ bǝ a ilǝ yui kong kab kwɔ nung youngmǝ ɓǝ.

<<Bǝ ɓa dǝ nung a langǝ i lǝ ɗua thǝ; bǝ ɓa al nung a yummi lǝ thag tthǝ thǝ- i tam i bo i ɓanglǝ.

Yam, Ɗuu, Gabnwakǝm

(Luka 11:9-13)

<<A yam yang i da ǝndǝ; ɗuu yang ma tǝntǝi; a gabnwakǝm yang i ɓkotthǝ ǝn ɓko. Yuu akwɔ ǝndǝi yam nung i du ǝndǝ, langkwoi yuu akwɔ ɗuu a tǝntǝi; yuu akwɔ gabnwakǝm i ɓkotthǝn ɓko.

<<Ənyiǝ dang ɓǝ kwɔlǝ daa adǝ tal lǝ yuiu nǝ u yam nungtang nko ɓa? Ko ma du biǝk nǝ u ɓib pi tthǝng ɓa? Ɓko kwɔ ɓa ɓko kwɔ, ɓa ibǝ bǝ dǝ nung a langǝ i lǝ yathang ɓǝng. Tonǝnǝ tha i Daa ɓǝ wayi kwɔ a dǝ nung a langǝ i lǝ yakwɔ yam nko ɓa! A to nung lǝ ya kuntthǝ manung akwɔ dǝma yiɗi i to tthǝɓǝ: nungkwɔ nungɓǝ lǝ nungkwɔ zuu gi Musa gei langkwoi i bǝ nanatthǝnung ya gei ba a tthasi.

Nwalǝgwoi A Tuab

(Luka 13:24)

<<A muo ttha dang nwalǝgwoi a tuab, bakwɔ nwalǝgwoi kwɔ a tǝlǝ lua a ɗing kwɔ aiɗing langkwoi lǝiɓǝ kwɔ a tǝlǝ kwɔ ziiu, langkwoi yayuu kpaatthǝ dǝna thkotthǝ. Kwoi nwalǝgwoi kwɔ a tǝlǝ nwongǝi kwɔ tabtthǝ langkwoi lǝi kwɔ a tǝlǝ tthǝ kwɔ ziiɗing, langkwoi yayuu kpako kwɔ dǝna tǝiɓǝ.

Kab I Siu

(Luka 6:43,44)

<<Ɓa dǝ kiggǝ ɓǝ ba ya gei ba a tthasi ya pǝllǝ; i wuu tthǝɓǝ mangǝn ɓangam ttha gwam, kwoi ttha dang lǝ i mangǝn ɗua gug. Ɓa iǝ tthǝ nung to gi. Kob si inabiu, lankwoi gug kob si gol lǝu. Kab a langǝ i dǝna si sikab a langǝ i, kwoi kab a ɓko dǝna si sikab a ɓko. Kab a langǝ i ɓuan si sikab a ɓko, langkwoi kab a ɓko ɓuan si sikab a langǝ iu. Langkwoi Kab akwɔ ǝndǝi kwɔ si sikab a langǝ i lǝu i ɓǝrǝu i walǝtǝ dang lua lǝ. Manung akwɔ ni yang, ɓa i ya gei ba a tthasi ya pǝllǝ i nungkwɔ dǝnni toɓǝ.

Ən Iɓǝ Lǝu

(Luka 13:25-27)

<<Ən yayuu ǝndǝi kwɔ dǝna geim angǝ, <Dangbang, Dangbang,> a tǝ bǝikwɔ Fuh lǝ yigwoi ɓǝlǝu, kwoi yakwɔ dǝna to nungkwɔ Daam wayi da yiɗi angǝ i toɓǝ. Kwɔ nǝ vii to kwan nǝ wuo, yayuu kpaatthǝ a geim angǝ, <Dangbang, Dangbang! Dang ɗuǝn mǝ ɓi gei nwaba a langǝ i gi Fuh, i ɗuǝn mǝ ɓi nan wa kpaatthǝ langkwoi ɓi to nung fǝmlo kpaatthǝ!> Yang mǝn geigǝ, ǝn i ɓǝlǝu. Ɓa pa ɓa yimbǝi ya to nung a ɓko!>

Ya Maikǝm Rab

(Luka 6:47-49)

<<Lakwɔ yang, yuu akwɔ nǝ lǝ bam kwɔ tolǝ nung to yang u natha i ya yiggǝi kwɔ mai kǝm gu lo ɓǝmtal ɓǝ. Mung na, dual wuo, langkwoi wa ɓuob lo gwoi lǝ. Kwoi gwoi ɓǝ o lǝu, bakwɔ i li pi kǝm ɓǝ lo ɓǝmtal ɓǝ.

Kwoi yuu akwɔ nǝ lǝ bam kwɔ yang la bǝ tolǝ nung to u natha i ya sullǝ kwɔ mai gwoi gu lo suazuii ɓǝ. Mung na, dual kyal wa ɓuob lo gwoi lǝ gwoi ɓǝ dǝr o ɓko tthǝ!>>

Ttha Gi Yeso

Kwɔ Yeso alo bǝ gei i nungkwɔ, lo kon yayuu ɓǝ fǝmtthǝ bǝ nanatthǝnung gu. U mangǝn ya nanatthǝnung Musa lǝu; manung akwɔ ni yang, dǝu nanatthǝnung i tthǝnyimmi.

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.