Skip to content
BibleKenya

MUNGA TRANSLATION PROJECT

Matta 28

Bǝ Ərr Gi Yeso

(Markus 16:1-10; Luka 24:1-12; Yohanna 20:1-10)

Tthasua vii nwongǝi ya Yahudawa, kwɔ bǝi dǝna kan vii Lahadi, Maryamu Magadaliya i Maryamu akun itǝ bǝ ɓyǝa juǝn ɓǝ.

Dangtthǝ ni yang pangsua thǝuri ghaatthǝ; ya nwatummi gi Dangbang pin wayi wuo pangsua, kǝlǝng tal ɓǝ u kwoilǝ, langkwoi ǝǝ lolǝ. Bǝ i gu mangǝng lua gap bǝi, nunglitthǝ gu vǝrrǝm mang mual landa. Vulli muo ya ki jun ɓǝ tthǝi dǝna ɓuobtthǝm i mǝrrǝm mangǝn kwamɓui yayuu.

Ya nwatummi gi Fuh gei ba lǝ yasi ɓǝ angǝ,<<Bǝɓa sur vulli thǝ, ǝn ibǝi dǝɓa ɗubǝi Yeso, kwɔ i piu lo kab gangǝ i ɓǝ. U yangǝu bǝikwɔu; i ǝrrǝu lǝng bǝ ɓuiɓua, manung akwɔ u gei ɓǝ. Ɓa wɔ wuɓa ɓyǝa bǝikwɔ i dutthǝ ɓǝ. Ɓa tǝ thǝm tthǝ lakwɔ tǝɓa gei lǝ ya nanung to gu tthǝ, <I ǝrrǝu lǝng bǝ ɓuiɓua, langkwoi lakwɔ u tthasi ɓǝ dǝu tǝ Galili; ɓa tǝiu bǝilǝ!> Ɓa nhǝm nungkwɔ ǝn gei ɓǝ tthǝɓǝ.>>

Nungkwɔ yasi ɓǝ pa thǝmtthǝ nwa juǝn lǝ, dǝi lǝ tthǝ vulli langkwoi dǝi lǝ tthǝla, i surdum yangbǝ tǝi geilǝ ya nanung to gu tthǝ.

Dangtthǝ ni Yeso fuk tthǝi gei angǝ,<<Dǝmǝn gum ɓǝ.>> Ərr i wuo tthangǝu, dǝi yiɗi bǝ muo kabo yangbǝ i wabbu. Yang Yeso gei angǝ,<<Bǝ ɓa sur vulli thǝ, Tǝɓa gei lǝ ya youngǝm tthǝ i tǝ Galili, langkwoi bǝilǝ kwɔ tǝi ɓyǝam.>>

Nwaba Ya Ki jun

Kwɔ yasi ɓǝ lo nunglǝi gi, yakun dang ya soja ya ki jun ɓa ǝrr tǝ dang gwoi angǝ a tǝ gei baɓǝ lǝ yakku ya nyǝknung tthǝ nungkwɔ to nung ǝndǝi ɓǝ. Yakku ya nyǝknung kǝbtha i yakku nungkwɔ i mab ba gi; i dǝ nungkurɓǝ kpaatthǝ lǝ ya soja i gei angǝ,<<Ɓa gei ɓangǝ, Ya nanung to gu wuo nung vii wui iu i palǝ dǝɓi lonung lo. Nǝ nilǝu nǝ bakwɔ tǝ sui Yikku losua angǝ a, yang ɓi geiu ɓingǝ ɓa ibǝ nung akun lǝu, yang nung akun yangǝu a tǝi ɓǝu.>>

Ya soja ɓǝ muo nungkurɓǝ ɓǝ nungkwɔ i to manung akwɔ i gei tthǝ ɓǝ. Nungkwɔ lǝ nwaba kwɔ lǝi dang ya Yahudawa ǝndǝi wullǝ vii a ɗiggǝ kwɔɓǝ.

Yeso Fuk Tthǝ Ya NanunTo Gu

(Markus 16:14-18; Luka 24:36-49; Yohanna 20:19-23; Acts 1:6-8)

Yang ya nanung to kwɔ sob iu kun kwɔ patǝ lo ɓǝmtal Galili bǝikwɔ Yeso gei angǝ i tǝ ɓǝ. Kwɔ i ɓyǝko, i wabbu, yakun dǝba a langǝ i tthǝ lǝu. Yeso wuo suai wu gei angǝ,<<I dǝ ttha wayi i a longwam ǝndǝi dang nam. Ɓatǝ, sua yayuu ǝndǝi losua kwɔ ǝndǝi tǝɓa mǝrrǝm mǝi lǝ ya nanungtom: ɓa wollimung dang ɗuǝn Daa, i Yui i Ɓyang a Langǝ i, langkwoi ɓa nǝinatthǝ i to nungto i nungkwɔ ǝndǝi ǝn gei ɓǝtthǝ ɓǝ. Langkwoi ɓang i ɓǝlǝ vii ǝndǝi, tǝlǝ nwa longwam.>>

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.