MUNGA TRANSLATION PROJECT
Matta 20
Bǝ Liba Loya Tonungto Dang Zug
<<Bǝ lo yigwoi Fuh wayi natha i yuu zug inabi kwɔ ǝrr nungwoi tǝu ee yayuu yangbǝ tǝ lǝbnung zug gu ɓǝ. U gwabǝi nwa angǝ i i kwai dinari viilǝ i pa i tǝ zug gu.
<<A kǝn lona songsob kwɔ fuh lǝ tthǝlǝu yirrǝ lǝu ɓǝ u i gwam tǝu tǝi yakun nwa lomu i dǝi bǝilǝ nǝkwam. U gei angǝ, <Ɓatǝ tǝɓa to nung to zug inabim, yang mǝn kwai ɓǝ matthǝ.> Nungkwɔ i pa i tǝ. U igwam langkwoi fuh kǝn nyi lo lona tai u to manung ɓǝ. A kǝn lona nu u igwam langkwoi tǝu tǝi yakun dǝi nǝkwam. U ɓibǝi angǝ, <Ɓa bǝ ɓa dǝi bǝikwɔ kǝryǝ nǝkwam?>
I gwabnwa angǝ,<Bakwɔ yuu akun yangǝu lǝiɓiu ɓǝ.> U gei angǝ, <Ɓatǝ langɓǝ tǝɓa to nung to dang zugǝm.>
Kwɔ nungluii to, yuu zug gei ya ɓyǝa nung to gu angǝ, < A lubǝ ya nung to kwɔ a kwai nungkurɓǝ nung to gi, baipiu i yakwɔ wuo nǝsua ɓǝ.>
<< Yakwɔ wuo lona nu kwɔ wu muo dinari kun. Nungkwɔ yakwɔ wuo nungsi kwɔ, dǝnni ɓyǝa angǝ lko i tǝi kpaatthǝ. I kwɔ ǝndǝi i ji dinari natha. Kwɔ yakwɔ wuo la nwasiu muo nungkurɓǝ gi, i baipi bǝ to nyi i yuu zuglǝ angǝ. I gei angǝ<Yaɓǝi kwɔ wu nǝsua i to nung to lona kun ɓuo, yang akwai natha i ɓi kwɔ to nung to angǝ a fuh thǝm loɓiɓa!>
<<U gei lǝ yuu kun gi tthǝ angǝ, <Ənthǝm, ǝn to nung a ɓko lǝu. A gwab bǝ to nung to lo dinari lǝu? A muo nungkurɓǝ mǝ a pa. Dǝm yiɗi bǝ dǝ yiɓǝi kwɔ ǝn wulǝ nǝsua natha i akwɔ ǝn da ɓǝ. Ən yangǝu i lǝi kwɔ mǝn to nung a langǝ i kwɔ ǝn yiɗi i nungkurɓǝm wa?>>>
Langkwoi Yeso alo angǝ,<<A nǝsua a mǝrrǝm lǝ a nungsi, langkwoi a nungsi a ǝlǝ a sua.>>
Yeso Gei Ba Ɓua Gu A Nungtai Tthǝu
(Markus 10:32-34; Luka 18:31-34)
Kwɔ Yeso dǝna tǝ Urshalima, u lǝi ya nanung to gu sob iu rab gwu kun u gei angǝ, << Dǝɓi tǝ Urshalima, i ɓanglǝ Yui Yuu i dǝlǝ yakku ya fristoci i ya nanatthǝnung zuu. I ɓangǝulǝ i thǝu yang i dulǝ ya nung yayol i tthǝmmu i ɓuo i piu tthǝ kab gangǝ i. Vii a tai i ǝrru lǝ i nwongǝi.
Bǝ Yamnung Gi Naa
(Markus 10:35-45)
Yang si Zabadi wuo sua Yeso i yathang gu, u bai nwalongǝi sua, u yam Yeso angǝ u nwongǝi. U ɓib angǝ,<<Ən ɓǝ dǝmma yiɗi?>>
Yisi ɓǝ gei angǝ, <<A gwab yang dang yathang a ɓǝim kwɔ rab kwɔ yuu akun ee lo namǝ a nali yuu akun lo namǝ a na mai wayi.
<<Yeso geiu angǝ a ibǝ nungkwɔ dǝma ɗyǝab ɓǝlǝu,>> Yeso gei yathang ɓǝ angǝ. <<Ɓa ɓuan ɓa nwa mung dang ɗǝi kwɔ mǝn nwa ɓǝng nwa?>>
I gwab angǝ,<< Ɓi ɓumɓuan,>>
Yeso gei angǝ, << la langǝ i ɓa ɓuan ɓa tangzuii kwɔ mǝn tangɓǝ, kwoi bǝ ee lo nali ko namai ǝn abǝm mǝn dǝ lǝu. Bǝikwɔ ǝn a bǝ yakwɔ daam mablǝ bagi ɓǝ.>>
Kwɔ sua ya nanung to kwɔ sob kwɔ lǝ nungkwɔ, dang wai ɓanglǝ lǝ ba yakwɔ rab kwɔ ɓǝ i ǝn ya youngtha. Nungkwɔ Yeso lubǝi ǝndǝi gǝm nungtha u gei angǝ, <<Ɓa ibǝ yakku ya wabnung wabǝi ji ttha loi, langkwoi gong yakku toilǝ thǝb. Manung ɓǝ i ɓǝlǝu. Yuu akwɔ dǝna yiɗi bǝ ee lǝ angǝ a dang ɓǝ a ee lǝ thǝb ɓǝ. Langkwoi yuu akun dang ɓǝ dǝna yiɗi bǝ ǝǝlǝ nwasiu a ǝǝ lǝ thǝb Manung akwɔ Kristi Yui Yuu wuo yangbǝ wui du angǝ a lǝu, yangbǝ to nung to, langkwoi dǝ nwongǝi gu nwathan yayuu kpaatthǝ.>>
Yeso Dǝtthǝla Lǝ Ya Nungɓuommi Rab
(Markus 10:46-52; Luka 18:35-43)
Kwɔ Yeso i ya nanung to gu yitthǝ Yariko, gong kon muo sua Yeso. Ya nungɓuommi rab ǝǝ nwalǝi, kwɔ i lǝ angǝ Yeso dǝna pa bǝilǝ, i buogbǝi, <<Dangbang, yui Dawuda, a ɓyǝa nungzuii ɓi.>>
Kon ǝrri lǝ i gei angǝ ɓa kǝr, i ǝrrlǝ yoli ghaatthǝ, <<Dangbang, Yui Dawuda, a ɓyǝa nungzuii ɓi!>>
Yeso dǝi ǝrr lubǝi. U ɓibǝi angǝ,<< Ɓǝ dǝɓa yiɗi ɓangǝ ǝn to ɓǝttha?>>
I gwabnwa angǝ,<<Dangbang, dǝɓi yiɗi bǝ ɓyǝabǝi langkwoi!>>
Yeso ɓyǝa nung zuii gi u kǝn natthǝ nungǝi. Dangtthǝ nungǝi ɓko i ɓyǝabǝi i musuo.
MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.