MUNGA TRANSLATION PROJECT
HEB 13:8
Verse 8 is marked below, with the whole chapter around it. Read from the start
Nungkwɔ Ma To Fuh Alǝ Tthǝla Mǝ Ɓǝ
Ɓǝya Krista ɓa dǝilo bǝ yiɗi tha mangǝ ɓǝ ǝn yakwɔ dǝ ba a langǝ i tthǝ Kristi ɓǝ.
Ɓa dǝinwa bǝ muo yayol gwoi ɓǝ lǝ. Yakun tthǝ toni i muolǝ ya nwatummi gi Fuh i ibǝi lǝu.
Ɓa nhǝm ba lo yakwɔ dang pursǝna ɓǝ, mangǝttǝn mǝ dang pursǝna suatha i ilǝ. Ɓa nhǝm ba yakwɔ dǝna to zuii ɓǝ, mangǝttǝn dǝma tozuii manung gi.
Ɓadǝ angǝ a lǝ bǝ dǝb tha ɓǝ, langkwoi yaɓǝi i yasi ɓa dǝnyitthǝ tha la langǝ i. Fuh a ɗablua yakwɔ dǝna to nung a ɓko ɓǝ, i yakwɔ dǝna lo i yasi yayuu ɓǝ.
Bǝ kiggǝ ɓǝ ǝǝ lǝ kiggǝ ya yiɗi nungkurɓǝ thǝ, langkwoi ɓa ǝǝ i nungkwɔ naɓǝ matthǝ. Fuh gei angǝ,<<Ən yi ɓǝu; Ən waɓǝ lǝtǝu.>> Ɓi nyimtthǝ ɓi, lakwɔ, ɓi gei ɓi angǝ,
<<Dangbang ǝnya nwongǝm,
Ən sur vulli u.
Ən ɓǝttǝn yuu a tom laa?>>
Ɓa nhǝm balo yakku ɓǝ a nungsi, yakwɔ gei ɓǝ ba gi Fuh tthǝɓǝ. Ɓa nhǝm ba tthasua lo nungkwɔ i to bǝ i ɓuiɓǝ, yang ɓa na nwai. Yeso Kristi natha i a lali, ɗiggǝ, i a laɗing.
Bǝɓa muo bǝ nanatthǝnung afu thǝ. Maɗing kwɔ ɓi muo ttha a dang wa tthǝ bǝ yiɗi bǝi gi Fuh ɓǝ, langkwoi ǝn ba bǝ dǝ angǝ a tthǝ bǝ lo yigwoi wayi lǝ ba nungtang lǝu; ya gwab ba bǝ lo yigwoi wayi kwɔ i tǝi bǝ nwong bǝi lǝu.
Ya nyǝknung kwɔ dǝna to nung to dang tǝbǝ kwɔ ya Yahudawa dǝna wab Fuh tthǝ kwɔ i yangǝu i ttha kwɔ i tang nungkwɔ dǝnni nyǝklǝ nung lo tuu ɓǝu. Yikku ya Yahudawa a wulǝ zii nungbyang lǝ bǝi a langǝ i a nyimmi wa dǝlǝ ba bǝ nyǝknung lǝ ba nung a ɓko, langkwoi yang nyam ɓǝ i suon ttha gwam bǝ nyǝknung ɓǝlǝ. Lǝ ba ɓǝ langkwoi Yeso ɓui ttha gwam gwoi angǝ a, ba yangbǝ i mab yayuu lǝ ya nung a langǝ i i zii gu. Ɓi dǝisua, langkwoi, ɓitǝ tthangǝu ttha gwam yangbǝ tǝɓi gab tthǝku lǝtha i u lǝ.
Bakwɔ ɓi yangǝu i gong gwoi kwɔ lǝ aɓi longwam kwɔ ɓǝu; dǝɓi ɓyǝa nunglǝi gong gwoi kwɔ a wua ɓǝ.
Ɓi dǝisua, langkwoi, vii ǝndǝi nǝɓi kha Fuh lǝ ba bǝ nyǝknung ɓi tthǝ Yeso, ǝn bǝ dǝnung kwɔ ɓi dǝ i lyǝn ɓi lǝ ba ee nwa ba nung a ɓko ɓi tthǝ Dangbang.
Bǝɓa danyitthǝ bǝ to nung a langǝ i i bǝ nwong tha thǝ, bakwɔ ǝn bǝ nyǝknung ɓǝ kwɔ dǝna la nyi Fuh ɓǝ.
Ɓa dǝ angǝ a lǝ ya dǝ kabnwa nung langkwoi ɓalǝ bagi. Dǝnni ɓyǝa lo ɓǝ bǝ nwongǝi gi yangǝu, bakwɔ i gei nwa ba nung to gi lǝ Fuh tthǝ ɓǝ. Nǝɓa lǝ ba gi, yang i to nung to gi i tthǝla; nǝni lǝu, yang i to i dang wa a ɓanglǝ, yang nwong ɓǝu. Ɓa pi ɓi nwatthǝ vii ǝndǝi. Ɓi tthǝ i dang wa a kaikai, bakwɔ dǝɓi yiɗi bǝ to nung to a langǝ i lona lǝ ǝndǝi. Langkwoi dǝmǝn yam ɓǝ dang wa kun ɓa pinwa yangbǝ Fuh kwoim lǝ wullǝ sua ɓǝ nǝnǝng kwɔ.
Bǝ Pinwa
Lakwɔ Fuh ya nung a langǝ i kwɔ ǝrr lǝ Dangbang Yeso ɓi bǝ ɓuiɓua, yuu akwɔ lǝ gong ya gagci ɓangam tthǝ bǝ dǝ zii gu, kwɔ lam lǝ nwa bǝ dǝ ganglang a ɗing. Fuh kwɔ dǝɓǝ nyi tǝmmi dǝɓǝ nung la langǝ i kwɔ ɓa yiɗi yangbǝ ɓa tolǝ nung to gu, langkwoi tthǝ Yeso Kristi, to nung to i ɓilǝ manung kwɔ u lǝ tthǝlko ɓǝ. Langkwoi tthǝ Yeso i nung angǝ a gu vii ǝndǝi langkwoi la ɗing! Dǝitthǝ manungɓǝ.
Bǝ Alo Ba Ən Dǝi
Ya youngǝm, dǝmǝn yam ɓǝ, ɓa lǝm i lonyi a tǝmmi tthǝ ba nyimtthǝ bǝi gi Fuh kwɔ; lǝ ba nungvullǝ kwɔ ǝn vullǝ ɓǝ tthǝ kwɔ Ən ba ɓǝ tulǝu. Dǝmǝn yidɗi bǝ gei ɓǝ geigǝ i yinalǝ young ɓi Timitawos pursǝnǝng. Nǝ u wuo thǝmtthǝ yang, Mǝn wuo suatha i ulǝ wuɓi ɓyǝa ɓǝ.
Ɓa gumbǝ yakku ɓǝ ǝndǝi i yayuu gi Fuh ǝndǝi. Yadǝ ba a langǝ i tthǝ Fuh dang Italiya dǝna gum ɓǝ.
Nung a langǝ i gi Fuh ǝǝ i ɓǝlǝ ǝndǝi laɗing.
MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.