Bibbia Vulgata Clementina na 1598
PSALMORUM 20
In finem. Psalmus David.1
[Domine, in virtute tua lætabitur rex, et super salutare tuum exsultabit vehementer.2
Desiderium cordis ejus tribuisti ei, et voluntate labiorum ejus non fraudasti eum.
Quoniam prævenisti eum in benedictionibus dulcedinis; posuisti in capite ejus coronam de lapide pretioso.3
Vitam petiit a te, et tribuisti ei longitudinem dierum, in sæculum, et in sæculum sæculi.
Magna est gloria ejus in salutari tuo; gloriam et magnum decorem impones super eum.4
Quoniam dabis eum in benedictionem in sæculum sæculi; lætificabis eum in gaudio cum vultu tuo.5
Quoniam rex sperat in Domino, et in misericordia Altissimi non commovebitur.
Inveniatur manus tua omnibus inimicis tuis; dextera tua inveniat omnes qui te oderunt.6
Pones eos ut clibanum ignis in tempore vultus tui: Dominus in ira sua conturbabit eos, et devorabit eos ignis.
Fructum eorum de terra perdes, et semen eorum a filiis hominum,7
quoniam declinaverunt in te mala; cogitaverunt consilia quæ non potuerunt stabilire.
Quoniam pones eos dorsum; in reliquiis tuis præparabis vultum eorum.8
Exaltare, Domine, in virtute tua; cantabimus et psallemus virtutes tuas.]9
Source notes (9)
- Footnote In finem. Tertius psalmus de duabus naturis in Christo, cœlestem regem describit, ut auditu credat mundus, quem visum contemnit Judæus. Demonstrativam facit orationem in laudem Dei.
- Footnote Domine in virtute tua lætabitur. CASS. Summam proponit, scilicet, meritum et præmium.
- Footnote Quoniam prævenisti. CASS. Diapsalma; virtutes ejus et gloriam describit, etc., usque ad quasi capiti in coronam. Coronam. Ibid. Quia circumitus Apostolorum docentem ambiebat, vel totus mundi circulus, id est, Ecclesia generalis.
- Footnote In salutari tuo: gloriam et magnum decorem, etc. CASS. Verbo Patris, quæ inde gloria. Gloriam de judicio, quia in Deitate judicabit. Decorem in majestate, quæ tunc apparebit. Gloriam et magnum decorem, etc. Gloriosus, ut Petrus, cujus umbra infirmi sanabantur; et decor est super eum, præter quem non est aliud fundamentum. Ideo super eum, quoniam dabis.
- Footnote In gaudio cum vultu tuo. Quoniam rex sperat in Domino, et in misericordia, etc. ID.. Id est, de hoc quod sui gaudebunt cum tua præsentia, quando eris omnia in omnibus.
- Footnote Inveniatur manus tua, etc. ID. De pœnis inimicorum, ut supra de laudibus Christi.
- Footnote Fructum eorum de terra perdes, et semen eorum. Non erit eis fructus beatitudinis in terra viventium.
- Footnote Quoniam pones. CASS. Dicta de futura, etc., usque ad ut cum putarent occidere, salus fieret.
- Footnote Exaltare. ID. Conclusio.
Bibbia Vulgata Clementina na 1598. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.