Biblica® Open Lao Contemporary Version
ນາງຣຸດ 4
ໂບອາດແຕ່ງງານກັບນາງຣຸດ
ໃນຂະນະນັ້ນ ໂບອາດໄດ້ໄປທີ່ປະຕູເມືອງ ແລະ ນັ່ງລົງທີ່ນັ້ນ ເມື່ອຍາດພີ່ນ້ອງໃກ້ຊິດຄົນທີ່ມີສິດໄຖ່ຖອນ ເຊິ່ງໂບອາດໄດ້ເວົ້າເຖິງນັ້ນໄດ້ຜ່ານມາ, ໂບອາດກໍໄດ້ເວົ້າວ່າ, “ສະຫາຍ, ເຊີນມາທີ່ນີ້ ແລະ ນັ່ງລົງກ່ອນ”. ດັ່ງນັ້ນ ລາວຈຶ່ງມາ ແລະ ນັ່ງລົງ.
ໂບອາດໄດ້ເຊີນຜູ້ອາວຸໂສຂອງເມືອງນັ້ນມາສິບຄົນ ແລະ ເວົ້າວ່າ, “ຂໍເຊີນນັ່ງຢູ່ບ່ອນນີ້” ແລ້ວພວກເຂົາກໍນັ່ງລົງ. ດັ່ງນັ້ນ ໂບອາດຈຶ່ງເວົ້າກັບຍາດພີ່ນ້ອງຜູ້ມີສິດໄຖ່ຖອນນັ້ນວ່າ, “ນາງນາໂອມີ, ຜູ້ກັບມາຈາກໂມອາບ ກໍກຳລັງຈະຂາຍທີ່ດິນຕອນໜຶ່ງ ເຊິ່ງເປັນຂອງເອລີເມເຫລັກ ຍາດພີ່ນ້ອງຂອງພວກເຮົາ. ຂ້ອຍຄິດວ່າຂ້ອຍຄວນຈະເວົ້າເລື່ອງນີ້ກັບເຈົ້າ ແລະ ແນະນຳໃຫ້ເຈົ້າຊື້ທີ່ດິນຕໍ່ໜ້າບັນດາຄົນທີ່ນັ່ງຢູ່ບ່ອນນີ້ ແລະ ຕໍ່ໜ້າບັນດາຜູ້ອາວຸໂສຂອງຂ້ອຍ. ຖ້າເຈົ້າຢາກຈະໄຖ່ ກໍຂໍໃຫ້ໄຖ່. ແຕ່ຖ້າເຈົ້າບໍ່ຢາກໄຖ່ ກໍຂໍໃຫ້ບອກຂ້ອຍ ເພື່ອຂ້ອຍຈະໄດ້ຮູ້. ເພາະບໍ່ມີຜູ້ໃດມີສິດໄຖ່ ຍົກເວັ້ນເຈົ້າ ແລະ ຮອງລົງມາຈາກເຈົ້າກໍແມ່ນຂ້ອຍ”.
ລາວໄດ້ຕອບວ່າ, “ຂ້ອຍຈະໄຖ່”.
ຫລັງຈາກນັ້ນ ໂບອາດຈຶ່ງເວົ້າວ່າ, “ໃນວັນທີ່ເຈົ້າຊື້ທີ່ດິນຈາກນາງນາໂອມີ ເຈົ້າຍັງຈະໄດ້ນາງຣຸດທີ່ເປັນຊາວໂມອາບ, ເຊິ່ງເປັນເມຍຂອງຜູ້ຕາຍທີ່ເປັນຍິງໝ້າຍດ້ວຍ, ເພື່ອສືບນາມຂອງຜູ້ຕາຍຕໍ່ໄປເທິງທີ່ດິນອັນເປັນກຳມະສິດຂອງລາວ”.
ຜູ້ມີສິດໄຖ່ຖອນນັ້ນໄດ້ຕອບວ່າ, “ຖ້າເປັນເຊັ່ນນັ້ນຂ້ອຍບໍ່ສາມາດໄຖ່ທີ່ດິນນັ້ນໄດ້ ເພາະຊັບສິນສ່ວນທີ່ເປັນຂອງຂ້ອຍກໍອາດຈະເສຍໄປ. ຂໍໃຫ້ເຈົ້າໄຖ່ທີ່ດິນນັ້ນເອົາໄວ້ເອງສາ. ຂ້ອຍບໍ່ສາມາດເຮັດໄດ້”.
(ໃນສະໄໝນັ້ນ ເປັນທຳນຽມໃນອິດສະຣາເອນສຳລັບການໄຖ່ ແລະ ການຕົກລົງໂອນສິດໃນຊັບສິນ, ໂດຍຝ່າຍໜຶ່ງຖອດເກີບອອກມາ ແລະ ມອບເກີບນັ້ນໃຫ້ອີກຝ່າຍໜຶ່ງ. ນີ້ແມ່ນການຢືນຢັນຂໍ້ຕົກລົງຕາມກົດໝາຍໃນອິດສະຣາເອນ).
ດັ່ງນັ້ນ ຂະນະທີ່ຜູ້ມີສິດໄຖ່ເວົ້າກັບໂບອາດວ່າ, “ໃຫ້ເຈົ້າຊື້ເອງສາ”. ແລ້ວລາວກໍໄດ້ຖອດເກີບອອກມາ.
ຫລັງຈາກນັ້ນ ໂບອາດຈຶ່ງປະກາດກັບບັນດາຜູ້ອາວຸໂສ ແລະ ຄົນທັງໝົດວ່າ, “ພວກທ່ານທັງຫລາຍເປັນພະຍານວ່າໃນມື້ນີ້ຂ້າພະເຈົ້າໄດ້ຊື້ຊັບສິນທັງໝົດຂອງເອລີເມເຫລັກ, ກີລີໂອນ ແລະ ມາໂລນ ຈາກນາງນາໂອມີ. ພ້ອມກັນນີ້ຂ້າພະເຈົ້າໄດ້ຂໍຮັບນາງຣຸດຍິງຊາວໂມອາບ, ເມຍໝ້າຍຂອງມາໂລນ ມາເປັນເມຍຂອງຂ້າພະເຈົ້າດ້ວຍ, ເພື່ອນາງຈະໄດ້ມີບຸດສືບເຊື້ອສາຍຂອງຜູ້ຕາຍພ້ອມດ້ວຍກຳມະສິດຂອງລາວ, ເພື່ອເຊື້ອສາຍຂອງລາວຈະບໍ່ຂາດຫາຍໄປຈາກທ່າມກາງຄອບຄົວຂອງລາວ ຫລື ຫາຍໄປຈາກບ້ານເມືອງຂອງລາວ. ພວກທ່ານທັງຫລາຍໄດ້ເປັນພະຍານໃນວັນນີ້!”
ບັນດາຜູ້ອາວຸໂສ ແລະ ຄົນທັງໝົດທີ່ຢືນຢູ່ທີ່ປະຕູເມືອງຈຶ່ງໄດ້ເວົ້າວ່າ, “ພວກເຮົາເປັນພະຍານ. ຂໍພຣະເຈົ້າຢາເວໂຜດເຮັດໃຫ້ຍິງຄົນນີ້ ເຊິ່ງກ້າວເຂົ້າມາສູ່ເຮືອນຂອງທ່ານຈົ່ງເປັນເໝືອນນາງຣາເຊັນ ແລະ ນາງເລອາ, ຜູ້ທີ່ຮ່ວມກັນສ້າງຄອບຄົວອິດສະຣາເອນ. ຂໍໃຫ້ທ່ານຍິ່ງໃຫຍ່ໃນເອຟະລາທາ ແລະ ມີຊື່ສຽງດີໃນເບັດເລເຮັມ. ໂດຍຜ່ານທາງລູກຫລານທີ່ພຣະເຈົ້າຢາເວຈະມອບໃຫ້ແກ່ທ່ານຈາກຍິງສາວຄົນນີ້, ຂໍໃຫ້ຄອບຄົວຂອງທ່ານເປັນເໝືອນດັ່ງຄອບຄົວຂອງເປເຣັດ, ເຊິ່ງນາງຕາມາໄດ້ກຳເນີດລູກໃຫ້ແກ່ຢູດາ”.
ນາງນາໂອມີໄດ້ຮັບລູກຊາຍ
(1ຂຄ 2:5-15; ມທ 1:3-6; ລກ 3:31-33)
ດັ່ງນັ້ນ ໂບອາດຈຶ່ງໄດ້ຮັບເອົານາງຣຸດມາ ແລະ ນາງຈຶ່ງກາຍເປັນເມຍຂອງເພິ່ນ. ເມື່ອໂບອາດໄດ້ສະແດງຄວາມຮັກຕໍ່ນາງ, ພຣະເຈົ້າຢາເວຈຶ່ງໃຫ້ນາງຖືພາ ແລະ ເກີດລູກຊາຍຄົນໜຶ່ງ. ພວກແມ່ຍິງໄດ້ເວົ້າກັບນາງນາໂອມີວ່າ: “ສັນລະເສີນພຣະເຈົ້າຢາເວ, ຜູ້ທີ່ໃນມື້ນີ້ບໍ່ໄດ້ປະໃຫ້ເຈົ້າປາດສະຈາກຍາດພີ່ນ້ອງທີ່ມີສິດໄຖ່. ຂໍໃຫ້ລາວມີຊື່ສຽງຊ່າລືທົ່ວອິດສະຣາເອນ! ລາວຈະຟື້ນຟູຊີວິດຂອງເຈົ້າ ແລະ ຄ້ຳຊູເຈົ້າໃນຍາມທີ່ເຈົ້າເຖົ້າແກ່. ເພາະລູກໄພ້ຂອງເຈົ້າ, ຜູ້ທີ່ຮັກເຈົ້າ ແລະ ຜູ້ທີ່ດີຕໍ່ເຈົ້າຫລາຍກວ່າລູກຊາຍເຈັດຄົນທີ່ໄດ້ໃຫ້ກຳເນີດ”.
ນາງນາໂອມີກໍໄດ້ອູ້ມເດັກນ້ອຍໄວ້ໃນແຂນຂອງຕົນ ແລະ ລ້ຽງດູລາວ. ຜູ້ຍິງທີ່ອາໄສຢູ່ທີ່ນັ້ນໄດ້ເວົ້າວ່າ, “ນາງນາໂອມີມີລູກຊາຍ!” ແລະ ພວກເຂົາໄດ້ຕັ້ງຊື່ໃຫ້ເດັກນ້ອຍນັ້ນວ່າໂອເບັດ. ໂອເບັດເປັນພໍ່ຂອງເຢຊີ, ເຊິ່ງເປັນພໍ່ຂອງດາວິດ.
ເຊື້ອສາຍຂອງດາວິດ
ລຳດັບເຊື້ອສາຍຂອງເປເຣັດມີດັ່ງນີ້:
ເປເຣັດເປັນພໍ່ຂອງເຮຊະໂຣນ
ເຮຊະໂຣນເປັນພໍ່ຂອງຣາມ
ຣາມເປັນພໍ່ຂອງອຳມີນາດາບ
ອຳມີນາດາບເປັນພໍ່ຂອງນາໂຊນ
ນາໂຊນເປັນພໍ່ຂອງຊານໂມນ1
ຊານໂມນເປັນພໍ່ຂອງໂບອາດ
ໂບອາດເປັນພໍ່ຂອງໂອເບັດ
ໂອເບັດເປັນພໍ່ຂອງເຢຊີ
ແລະ ເຢຊີເປັນພໍ່ຂອງດາວິດ.
Source notes (1)
- Footnote ຫລື ສັນມາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.