Biblica® Open Lao Contemporary Version
ພຣະນິມິດ 18
ສຽງຄ່ຳຄວນເໜືອບາບີໂລນທີ່ຫລົ້ມຈົມ
ຫລັງຈາກນີ້ ຂ້າພະເຈົ້າໄດ້ເຫັນເທວະດາອີກຕົນໜຶ່ງລົງມາຈາກສະຫວັນ. ເທວະດາຕົນນີ້ມີສິດອຳນາດອັນຍິ່ງໃຫຍ່ ແລະ ແຜ່ນດິນໂລກໄດ້ສະຫວ່າງຂຶ້ນດ້ວຍລັດສະໝີຂອງເພິ່ນ. ເທວະດາຕົນນັ້ນໄດ້ຮ້ອງຂຶ້ນດ້ວຍສຽງອັນມີພະລັງວ່າ:
“ຫລົ້ມຈົມແລ້ວ! ບາບີໂລນນະຄອນຍິ່ງໃຫຍ່ໄດ້ຫລົ້ມຈົມແລ້ວ!1
ນາງ2ນີ້ໄດ້ກາຍເປັນບ່ອນອາໄສຂອງພວກຜີມານຮ້າຍ
ແລະ ເປັນບ່ອນສິງຢູ່ຂອງວິນຍານສົກກະປົກທຸກຢ່າງ,
ເປັນບ່ອນສິງຢູ່ຂອງນົກທຸກຊະນິດທີ່ເປັນມົນທິນ,
ເປັນບ່ອນສິງຢູ່ຂອງສັດທຸກຊະນິດທີ່ເປັນມົນທິນ ແລະ ໜ້າກຽດຊັງ
ເພາະທຸກປະຊາຊາດໄດ້ດື່ມ
ເຫລົ້າອະງຸ່ນປຸກແຫ່ງການຫລິ້ນຊູ້ຂອງນາງ.
ບັນດາກະສັດແຫ່ງແຜ່ນດິນໂລກກໍໄດ້ຮ່ວມຫລິ້ນຊູ້ກັບນາງ
ແລະ ພໍ່ຄ້າທັງຫລາຍຂອງໂລກໄດ້ຮັ່ງມີຂຶ້ນດ້ວຍຄວາມຟຸມເຟືອຍອັນລົ້ນເຫລືອຂອງນາງ”.
ເຕືອນໃຫ້ຫລີກໜີຈາກການພິພາກສາຂອງບາບີໂລນ
ແລ້ວຂ້າພະເຈົ້າກໍໄດ້ຍິນອີກສຽງໜຶ່ງດັງມາຈາກສະຫວັນກ່າວວ່າ:
“ບັນດາຄົນຂອງເຮົາ, ຈົ່ງອອກມາຈາກເມືອງນັ້ນ,3
ເພື່ອວ່າພວກເຈົ້າທັງຫລາຍຈະບໍ່ໄດ້ມີສ່ວນຮ່ວມໃນການບາບຂອງນາງ,
ເພື່ອວ່າພວກເຈົ້າຈະບໍ່ຕ້ອງຮັບໄພພິບັດໃດໆທີ່ຈະເກີດຂຶ້ນກັບນາງ,
ເພາະບາບຂອງນາງນັ້ນກອງສູງຂຶ້ນເຖິງສະຫວັນ,
ແລະ ພຣະເຈົ້າຈື່ຈຳຄວາມຜິດອັນຊົ່ວຮ້າຍຂອງນາງໄດ້.
ຈົ່ງຕອບແທນນາງເໝືອນດັ່ງທີ່ມັນໄດ້ໃຫ້ແກ່ຜູ້ອື່ນ.
ຈົ່ງຕອບແທນນາງສອງເທົ່າຂອງສິ່ງທີ່ນາງໄດ້ເຮັດ.
ຈົ່ງຖອກຄືນເປັນສອງເທົ່າຂອງຈອກທີ່ນາງປະສົມໄວ້.
ຈົ່ງໃຫ້ນາງທໍລະມານ ແລະ ໂສກເສົ້າຫລາຍເທົ່າ
ເໝືອນດັ່ງກຽດ ແລະ ຄວາມສະໜຸກສະໜານທີ່ນາງໄດ້ມອບໃຫ້ກັບຕົນເອງ.
ນາງອວດອ້າງໃນໃຈວ່າ,
‘ຂ້ອຍນັ່ງບັນລັງເປັນລາຊີນີ.
ຂ້ອຍບໍ່ແມ່ນແມ່ໝ້າຍ,4
ຂ້ອຍຈະບໍ່ມີມື້ໂສກເສົ້າ’
ເຫດສະນັ້ນ ພາຍໃນມື້ດຽວໄພພິບັດຕ່າງໆຂອງນາງຈະຕົກຖືກນາງຄື:
ຄວາມຕາຍ, ຄວາມໂສກເສົ້າ ແລະ ຄວາມອຶດຢາກ.
ນາງຈະຖືກເຜົາຜານດ້ວຍໄຟ
ເພາະອົງພຣະຜູ້ເປັນເຈົ້າ ພຣະເຈົ້າຜູ້ພິພາກສານາງນັ້ນມີລິດອຳນາດຍິ່ງໃຫຍ່.
ວິບັດສາມຢ່າງເໜືອການຫລົ້ມຈົມຂອງບາບີໂລນ
“ເມື່ອບັນດາກະສັດຂອງໂລກທີ່ໄດ້ມີສ່ວນຮ່ວມຫລິ້ນຊູ້ ແລະ ຮ່ວມສະໜຸກສະໜານກັບນາງເຫັນຄວັນໄຟທີ່ກຳລັງເຜົາຜານນາງຢູ່, ພວກເຂົາຈະຮ້ອງໄຫ້ ແລະ ໄວ້ອາໄລໃຫ້ນາງ. ພວກເຂົາຢ້ານກົວຕໍ່ຄວາມທໍລະມານຂອງນາງ ພວກເຂົາຈະຢືນຢູ່ຫ່າງໆ ແລະ ຮ້ອງວ່າ:
“ ‘ວິບັດ! ວິບັດແກ່ເຈົ້າ, ນະຄອນຍິ່ງໃຫຍ່ເອີຍ!
ບາບີໂລນ ນະຄອນທີ່ເຕັມໄປດ້ວຍອຳນາດເອີຍ!
ພຽງຊົ່ວໂມງດຽວການພິພາກສາກໍມາເຖິງເຈົ້າ!’
“ພໍ່ຄ້າທັງຫລາຍຂອງໂລກຈະຮ້ອງໄຫ້ໄວ້ອາໄລນະຄອນນັ້ນເພາະບໍ່ມີຜູ້ໃດຊື້ສິນຄ້າຂອງພວກເຂົາອີກແລ້ວ ສິນຄ້າເຫລົ່ານັ້ນຄື: ຄຳ, ເງິນ, ອັນຍະມະນີ ແລະ ໄຂ່ມຸກ, ຜ້າຝ້າຍລິນິນເນື້ອລະອຽດດີ, ຜ້າສີມ່ວງ, ຜ້າໄໝ ແລະ ຜ້າສີແດງເຂັ້ມ, ໄມ້ຫອມທຸກຊະນິດ ແລະ ຜະລິດຕະພັນທຸກຊະນິດທີ່ເຮັດດ້ວຍງາຊ້າງ, ໄມ້ລາຄາແພງ, ທອງສຳລິດ, ເຫລັກ ແລະ ຫີນອ່ອນ, ສິນຄ້າອື່ນອີກຄື: ອົບເຊີຍ ແລະ ເຄື່ອງເທດ, ເຄື່ອງຫອມ ແລະ ກຳຍານ, ເຫລົ້າອະງຸ່ນ, ນ້ຳມັນໝາກກອກ, ແປ້ງລະອຽດ ແລະ ເຂົ້າຫວີດ, ງົວ ແລະ ແກະ, ມ້າ, ລົດມ້າ ແລະ ມະນຸດທີ່ຖືກຂາຍເປັນຂ້າທາດດ້ວຍ.
“ພວກເຂົາຈະກ່າວວ່າ, ‘ຜົນທີ່ເຈົ້າປາຖະໜາຫາກໍໝົດໄປຈາກເຈົ້າແລ້ວ. ຄວາມຫລູຫລາ ແລະ ຄວາມງົດງາມຂອງເຈົ້າທັງໝົດໄດ້ສູນຫາຍໄປ, ຢ່າງບໍ່ມີວັນກັບຄືນມາ’. ບັນດາພໍ່ຄ້າທີ່ຂາຍສິ່ງຂອງເຫລົ່ານີ້ ແລະ ໄດ້ຮັບຄວາມຮັ່ງມີຈາກນະຄອນນັ້ນຈະຢືນຢູ່ຫ່າງໆ ເພາະຢ້ານຄວາມທໍລະມານຂອງມັນ. ພວກເຂົາຈະຮ້ອງໄຫ້ໄວ້ອາໄລ ແລະ ຮ້ອງອອກວ່າ:
“ ‘ວິບັດ! ວິບັດແກ່ເຈົ້າ, ນະຄອນຍິ່ງໃຫຍ່ເອີຍ,
ເຈົ້ານຸ່ງຫົ່ມຜ້າຝ້າຍລິນິນເນື້ອລະອຽດດີ, ຜ້າສີມ່ວງ ແລະ ຜ້າສີແດງເຂັ້ມ,
ແລະ ເປັ່ງປະກາຍດ້ວຍຄຳ, ອັນຍະມະນີ5 ແລະ ໄຂ່ມຸກ!
ພາຍໃນຊົ່ວໂມງດຽວຊັບສົມບັດອັນມະຫາສານກໍໄດ້ຖືກທຳລາຍ!’
“ນາຍເຮືອທຸກຄົນ, ທຸກຄົນທີ່ເດີນທາງດ້ວຍເຮືອ, ທະຫານເຮືອ ແລະ ຄົນທັງປວງທີ່ຫາລ້ຽງຊີບຈາກທະເລຈະຢືນຢູ່ຫ່າງໆ. ເມື່ອພວກເຂົາເຫັນຄວັນທີ່ກຳລັງເຜົານະຄອນນັ້ນ ພວກເຂົາຈະຮ້ອງວ່າ, ‘ເຄີຍມີນະຄອນໃດທີ່ເໝືອນນະຄອນຍິ່ງໃຫຍ່ນີ້?’ ພວກເຂົາຈະໂຮຍຂີ້ຝຸ່ນດິນໃສ່ຫົວຂອງຕົນ, ຮ້ອງໄຫ້, ໂສກເສົ້າ ແລະ ຮ້ອງວ່າ:
“ ‘ວິບັດ! ວິບັດແກ່ເຈົ້າ, ນະຄອນຍິ່ງໃຫຍ່ເອີຍ,
ບ່ອນທີ່ເຮັດໃຫ້ທຸກຄົນຜູ້ມີເຮືອເດີນທະເລ
ຮັ່ງມີໂດຍຄວາມຮັ່ງມີຂອງມັນ
ພາຍໃນຊົ່ວໂມງດຽວມັນກໍຖືກທຳລາຍ!’
“ຟ້າສະຫວັນເອີຍ! ຈົ່ງຊື່ນຊົມຍິນດີເພາະນະຄອນນີ້,
ຄົນຂອງພຣະເຈົ້າເອີຍ! ຈົ່ງຊື່ນຊົມຍິນດີ,
ບັນດາອັກຄະສາວົກ ແລະ ບັນດາຜູ້ທຳນວາຍເອີຍ! ຈົ່ງຊື່ນຊົມຍິນດີ,
ເພາະພຣະເຈົ້າໄດ້ພິພາກສານະຄອນນີ້ແລ້ວ
ດ້ວຍການລົງໂທດນະຄອນນີ້ທີ່ໄດ້ເຮັດຜິດກັບພວກເຈົ້າ”.
ການພິພາກສາສຸດທ້າຍຂອງບາບີໂລນ
ຫລັງຈາກນັ້ນ ເທວະດາຜູ້ມີລິດຕົນໜຶ່ງໄດ້ຍົກກ້ອນຫີນຂະໜາດເທົ່າຫີນໂມ້ໃຫຍ່ຖິ້ມລົງໃນທະເລ ແລະ ກ່າວວ່າ:
“ບາບີໂລນນະຄອນຍິ່ງໃຫຍ່ຈະຖືກຖິ້ມລົງ
ດ້ວຍຄວາມຮຸນແຮງຢ່າງນີ້ແຫລະ,
ຈະບໍ່ມີຜູ້ໃດເຫັນມັນອີກຈັກເທື່ອ.
ສຽງດົນຕີຈາກນັກດີດພິນ ແລະ ນັກດົນຕີ, ຄົນເປົ່າຂຸ່ຍ ແລະ ຄົນເປົ່າແກ,
ຈະບໍ່ໄດ້ຍິນໃນນະຄອນນີ້ອີກຈັກເທື່ອ.
ບໍ່ມີຄົນງານຂອງການຄ້າໃດໆ
ທີ່ຈະພົບໃນນະຄອນນີ້ອີກ.
ສຽງຂອງຫີນໂມ້ແປ້ງ
ຈະບໍ່ໄດ້ຍິນໃນນະຄອນນີ້ອີກ.
ແສງຂອງຕະກຽງ
ຈະບໍ່ສ່ອງແສງໃນນະຄອນນີ້ອີກ.
ສຽງຂອງເຈົ້າບ່າວ ແລະ ເຈົ້າສາວ
ຈະບໍ່ໄດ້ຍິນໃນເຈົ້າອີກຈັກເທື່ອ.
ພໍ່ຄ້າທັງຫລາຍຂອງເຈົ້າໄດ້ເປັນຄົນສຳຄັນຂອງໂລກ.
ເຈົ້າໄດ້ໃຊ້ເວດມົນຄາຖາຫລອກລວງບັນດາປະຊາຊາດໃຫ້ຫລົງໄປ.
ໃນເມືອງນີ້ພົບໄດ້ແຕ່ເລືອດຂອງບັນດາຜູ້ທຳນວາຍ ແລະ ເລືອດຂອງຜູ້ບໍລິສຸດຂອງພຣະເຈົ້າ
ແລະ ເລືອດຂອງທຸກຄົນທີ່ຖືກຂ້າເທິງແຜ່ນດິນໂລກ”.
Source notes (5)
- Footnote ອຊຢ 21:9
- Footnote ຫລື ນະຄອນ
- Footnote ຢມຢ 51:45
- Footnote ອຊຢ 47:7,8
- Footnote ຫລື ເພັດພອຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.