Biblica® Open Lao Contemporary Version
ພຣະນິມິດ 1
ບົດບັນຍາຍ
ນີ້ຄືການເປີດເຜີຍຈາກພຣະເຢຊູຄຣິດເຈົ້າ, ເຊິ່ງພຣະເຈົ້າໄດ້ມອບໃຫ້ແກ່ພຣະອົງເພື່ອສະແດງໃຫ້ບັນດາຜູ້ຮັບໃຊ້ຂອງພຣະອົງເຫັນສິ່ງທີ່ຈະຕ້ອງເກີດຂຶ້ນໃນບໍ່ຊ້ານີ້. ພຣະອົງໄດ້ໃຊ້ເທວະດາຂອງພຣະອົງໄປສະແດງແກ່ໂຢຮັນຜູ້ຮັບໃຊ້ຂອງພຣະອົງ, ໂຢຮັນໄດ້ເປັນພະຍານທຸກສິ່ງທີ່ເພິ່ນໄດ້ເຫັນ ນັ້ນແມ່ນຖ້ອຍຄຳຂອງພຣະເຈົ້າ ແລະ ຄຳພະຍານຂອງພຣະເຢຊູຄຣິດເຈົ້າ. ຄວາມສຸກມີແກ່ຜູ້ທີ່ອ່ານຖ້ອຍຄຳຂອງຄຳທຳນວາຍນີ້ດ້ວຍສຽງດັງໆ ແລະ ຄວາມສຸກເປັນຂອງຜູ້ທີ່ໄດ້ຍິນແລ້ວຈື່ຈຳໃສ່ໃຈໃນສິ່ງທີ່ໄດ້ຂຽນໄວ້ໃນພຣະຄຳພີນີ້, ເພາະເວລານັ້ນໃກ້ເຂົ້າມາແລ້ວ.
ຄຳທັກທາຍ ແລະ ບົດເພງສັນເສີນ
ຈົດໝາຍສະບັບນີ້ຈາກເຮົາໂຢຮັນ,
ເຖິງຄຣິສຕະຈັກທັງເຈັດໃນແຂວງເອເຊຍ.
ຂໍໃຫ້ພຣະຄຸນ ແລະ ສັນຕິສຸກຈົ່ງມີແກ່ພວກເຈົ້າທັງຫລາຍຈາກພຣະອົງຜູ້ດຳລົງຢູ່ໃນປັດຈຸບັນ, ຜູ້ດຳລົງຢູ່ໃນອະດີດ, ຜູ້ຈະມາ ແລະ ຈາກວິນຍານ1ທັງເຈັດທີ່ຢູ່ຕໍ່ໜ້າບັນລັງຂອງພຣະອົງ, ແລະ ຈາກພຣະເຢຊູຄຣິດເຈົ້າຜູ້ເປັນພະຍານທີ່ສັດຊື່, ຜູ້ເປັນບຸດກົກຈາກບັນດາຄົນຕາຍ2 ແລະ ເປັນຜູ້ປົກຄອງເໜືອກະສັດທັງຫລາຍຂອງໂລກ.
ແດ່ພຣະອົງຜູ້ຮັກພວກເຮົາທັງຫລາຍ ແລະ ໄດ້ປົດປ່ອຍພວກເຮົາໃຫ້ພົ້ນຈາກຄວາມບາບຂອງພວກເຮົາໂດຍໂລຫິດຂອງພຣະອົງ, ແລະ ພຣະອົງໄດ້ຕັ້ງພວກເຮົາໃຫ້ເປັນອານາຈັກ ແລະ ເປັນປະໂລຫິດເພື່ອຮັບໃຊ້ພຣະເຈົ້າ ແລະ ພຣະບິດາຂອງພຣະອົງ, ຂໍໃຫ້ກຽດ ແລະ ລິດອຳນາດຈົ່ງມີແກ່ພຣະອົງຕະຫລອດໄປເປັນນິດ! ອາແມນ.
“ເບິ່ງແມ, ພຣະອົງກຳລັງມາພ້ອມກັບເມກທັງຫລາຍ,”3
ແລະ “ຕາທຸກໜ່ວຍຈະເຫັນພຣະອົງ,
ແມ່ນແຕ່ຄົນເຫລົ່ານັ້ນທີ່ໄດ້ແທງພຣະອົງ,”
ແລະ ມະນຸດທັງໝົດເທິງແຜ່ນດິນໂລກ “ຈະໂສກເສົ້າເພາະພຣະອົງ”.4
ແລ້ວຈະເປັນໄປຢ່າງນັ້ນ! ອາແມນ.
ອົງພຣະຜູ້ເປັນເຈົ້າພຣະເຈົ້າກ່າວວ່າ, “ເຮົາເປັນອາລະຟາ5 ແລະ ໂອເມຄາ6 ຜູ້ດຳລົງຢູ່ໃນປັດຈຸບັນ, ຜູ້ດຳລົງຢູ່ໃນອະດີດ ແລະ ຜູ້ຈະມາ, ເຮົາຄືອົງລິດອຳນາດຍິ່ງໃຫຍ່”.
ນິມິດຂອງໂຢຮັນກ່ຽວກັບພຣະຄຣິດເຈົ້າ
ຂ້າພະເຈົ້າຄືໂຢຮັນ ຜູ້ເປັນພີ່ນ້ອງ ແລະ ເປັນເພື່ອນຂອງພວກເຈົ້າ ຜູ້ຮ່ວມໃນການທົນທຸກທໍລະມານ ແລະ ໃນອານາຈັກ ແລະ ໃນອົດທົນອົດກັ້ນທີ່ເກີດຂຶ້ນກັບພວກເຮົາໃນພຣະເຢຊູເຈົ້າ, ຂ້າພະເຈົ້າມາຢູ່ທີ່ເກາະປັດໂມເພາະພຣະຄຳຂອງພຣະເຈົ້າ ແລະ ຄຳພະຍານຂອງພຣະເຢຊູເຈົ້າ. ໃນວັນຂອງອົງພຣະຜູ້ເປັນເຈົ້າ ຂ້າພະເຈົ້າຢູ່ໃນພຣະວິນຍານ ແລະ ໄດ້ຍິນສຽງຄ້າຍຄືສຽງແກດັງຂຶ້ນທາງດ້ານຫລັງຂອງຂ້າພະເຈົ້າ, ເຊິ່ງກ່າວວ່າ: “ຈົ່ງຂຽນສິ່ງທີ່ເຈົ້າເຫັນນັ້ນລົງໃນໜັງສືມ້ວນ ແລະ ສົ່ງໄປຍັງຄຣິສຕະຈັກທັງເຈັດຄື: ຄຣິສຕະຈັກທີ່ຢູ່ໃນເມືອງເອເຟໂຊ, ເມືອງຊະມີນາ, ເມືອງເປຄາໂມ, ເມືອງທົວເຕຣາ, ເມືອງຊາເດ, ເມືອງຟີລາເດັນເຟຍ ແລະ ເມືອງລາວດີເກອາ”.
ຂ້າພະເຈົ້າຫັນໄປເບິ່ງສຽງທີ່ກຳລັງເວົ້າກັບຂ້າພະເຈົ້າ. ແລະ ເມື່ອຂ້າພະເຈົ້າຫັນໄປຂ້າພະເຈົ້າໄດ້ເຫັນຫລັກຕະກຽງຄຳເຈັດອັນ, ແລະ ໃນທ່າມກາງຫລັກຕະກຽງເຫລົ່ານັ້ນມີຜູ້ໜຶ່ງ “ເໝືອນດັ່ງບຸດມະນຸດ,”7 ນຸ່ງເສື້ອຄຸມຍາວຈົນເຖິງຕີນ ແລະ ມີສາຍສະພາຍຄຳພາດອ້ອມເອິກຂອງພຣະອົງ. ຜົມຢູ່ເທິງຫົວຂອງພຣະອົງຂາວເໝືອນດັ່ງຂົນແກະ, ຂາວເໝືອນດັ່ງຫິມະ, ຕາຂອງພຣະອົງເໝືອນດັ່ງໄຟທີ່ກຳລັງລຸກໄໝ້. ຕີນຂອງພຣະອົງເໝືອນດັ່ງທອງສຳລິດທີ່ເຮືອງແສງຢູ່ໃນເຕົາຫລອມ ແລະ ສຽງຂອງພຣະອົງເໝືອນດັ່ງສຽງນ້ຳທີ່ໄຫລແຮງ. ພຣະອົງຖືດາວເຈັດດວງໄວ້ໃນມືຂວາຂອງພຣະອົງ ແລະ ມີດາບສອງຄົມອອກມາຈາກປາກຂອງພຣະອົງ. ໃບໜ້າຂອງພຣະອົງເໝືອນດັ່ງດວງຕາເວັນທີ່ສ່ອງແສງກ້າ.
ເມື່ອຂ້າພະເຈົ້າເຫັນພຣະອົງ ຂ້າພະເຈົ້າກໍລົ້ມລົງທີ່ຕີນຂອງພຣະອົງເໝືອນກັບຄົນທີ່ຕາຍແລ້ວ. ຫລັງຈາກນັ້ນ ພຣະອົງວາງມືຂວາຂອງພຣະອົງເທິງຂ້າພະເຈົ້າ ແລະ ກ່າວວ່າ: “ຢ່າຢ້ານເລີຍ. ເຮົາເປັນເບື້ອງຕົ້ນ ແລະ ເປັນເບື້ອງປາຍ. ເຮົາເປັນອົງຜູ້ດຳລົງຊີວິດຢູ່; ເຮົາໄດ້ຕາຍແລ້ວ ແລະ ບັດນີ້ ເບິ່ງແມ, ເຮົາຍັງມີຊີວິດຢູ່ຕະຫລອດໄປເປັນນິດ! ແລະ ເຮົາຖືກະແຈແຫ່ງຄວາມຕາຍ ແລະ ແດນມໍລະນາ.
“ເຫດສະນັ້ນ, ຈົ່ງຂຽນສິ່ງທີ່ເຈົ້າໄດ້ເຫັນ, ສິ່ງທີ່ເປັນຢູ່ຂະນະນີ້ ແລະ ສິ່ງທີ່ຈະເກີດຂຶ້ນໃນພາຍໜ້າ. ຄວາມເລິກລັບຂອງດາວເຈັດດວງທີ່ເຈົ້າເຫັນຢູ່ໃນມືຂວາຂອງເຮົາ ແລະ ຄວາມເລິກລັບຂອງຫລັກຕະກຽງຄຳທັງເຈັດມີດັ່ງນີ້: ດາວເຈັດດວງຄືເທວະດາ8ແຫ່ງຄຣິສຕະຈັກທັງເຈັດ ແລະ ຫລັກຕະກຽງຄຳເຈັດອັນຄືຄຣິສຕະຈັກທັງເຈັດ.
Source notes (8)
- Footnote ຫລື ພຣະວິນຍານທັງເຈັດ
- Footnote ຫລື ເປັນຜູ້ທຳອິດທີ່ເປັນຄືນມາຈາກຕາຍ
- Footnote ດນອ 7:13
- Footnote ຊກຢ 12:10
- Footnote ເປັນອັກສອນໂຕທຳອິດໃນພາສາກຣີກ
- Footnote ເປັນອັກສອນໂຕສຸດທ້າຍໃນພາສາກຣີກ
- Footnote ດນອ 7:13
- Footnote ຫລື ຜູ້ສົ່ງຂ່າວ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.