Biblica® Open Lao Contemporary Version
ເພງສັນລະເສີນ 116
ຂ້ານ້ອຍຮັກພຣະເຈົ້າຢາເວ ເພາະພຣະອົງໄດ້ຍິນສຽງຂອງຂ້ານ້ອຍ
ພຣະອົງໄດ້ຍິນຄຳຮ້ອງຂໍຄວາມເມດຕາຂອງຂ້ານ້ອຍ.
ເພາະພຣະອົງໄດ້ງ່ຽງຫູຟັງຂ້ານ້ອຍ,
ຂ້ານ້ອຍຈະຮ້ອງຫາພຣະອົງຕາບໃດທີ່ຂ້ານ້ອຍຍັງມີຊີວິດຢູ່.
ເຊືອກແຫ່ງຄວາມຕາຍໄດ້ຜູກມັດຂ້ານ້ອຍໄວ້,
ຄວາມທຸກທໍລະມານແຫ່ງຂຸມຝັງສົບໄດ້ມາເຖິງຂ້ານ້ອຍ;
ຄວາມທຸກ ແລະ ຄວາມໂສກເສົ້າໄດ້ເອົາຊະນະຂ້ານ້ອຍ.
ແລ້ວຂ້ານ້ອຍກໍຮ້ອງອອກນາມພຣະເຈົ້າຢາເວວ່າ:
“ຂ້າແດ່ພຣະເຈົ້າຢາເວ ໂຜດຊ່ວຍຂ້ານ້ອຍໃຫ້ພົ້ນດ້ວຍ!”
ພຣະເຈົ້າຢາເວມີຄວາມກະລຸນາ ແລະ ຊອບທຳ;
ພຣະເຈົ້າຂອງພວກເຮົາເຕັມດ້ວຍຄວາມເມດຕາສົງສານ.
ພຣະເຈົ້າຢາເວປົກປ້ອງຄຸ້ມຄອງຄົນຊື່
ເມື່ອຂ້ານ້ອຍຕົກຕ່ຳ ພຣະອົງກໍໄດ້ຊ່ວຍຂ້ານ້ອຍໃຫ້ພົ້ນ.
ຈິດວິນຍານຂອງຂ້ານ້ອຍ ຈົ່ງກັບໄປພັກສະຫງົບຄືນ,
ເພາະພຣະເຈົ້າຢາເວດີຕໍ່ເຈົ້າສະເໝີມາ.
ເພາະພຣະອົງໄດ້ປົດປ່ອຍຈິດວິນຍານຂອງຂ້ານ້ອຍໃຫ້ພົ້ນຈາກຄວາມຕາຍ,
ປົກປ້ອງຕາຂອງຂ້ານ້ອຍໃຫ້ພົ້ນຈາກນ້ຳຕາ
ປົກປ້ອງຕີນຂອງຂ້ານ້ອຍບໍ່ໃຫ້ສະດຸດລົ້ມ,
ເພື່ອຂ້ານ້ອຍຈະເດີນຢູ່ຕໍ່ໜ້າພຣະເຈົ້າຢາເວ
ໃນດິນແດນຂອງຜູ້ມີຊີວິດຢູ່.
ຂ້ານ້ອຍໄດ້ເຊື່ອໃນພຣະເຈົ້າຢາເວ ເຖິງແມ່ນວ່າຂ້ານ້ອຍໄດ້ເວົ້າວ່າ:
“ຂ້ານ້ອຍທຸກທໍລະມານຫລາຍ”;
ແມ່ນວ່າໃນຍາມທໍ້ໃຈ ຂ້ານ້ອຍໄດ້ເວົ້າວ່າ:
“ທຸກຄົນເປັນຄົນຕົວະ”.
ຂ້ານ້ອຍຈະຕອບແທນພຣະເຈົ້າຢາເວຢ່າງໃດ
ໃຫ້ສົມກັບຄວາມດີຂອງພຣະອົງທັງໝົດທີ່ມີຕໍ່ຂ້ານ້ອຍ?
ຂ້ານ້ອຍຈະຍົກຈອກແຫ່ງຄວາມພົ້ນຂຶ້ນ
ແລະ ຮ້ອງອອກນາມຂອງພຣະເຈົ້າຢາເວ.
ຂ້ານ້ອຍຈະເຮັດຕາມທີ່ໄດ້ປະຕິຍານໄວ້ຕໍ່ພຣະເຈົ້າຢາເວ
ຕໍ່ໜ້າປະຊາຊົນຂອງພຣະອົງທຸກຄົນ.
ຄວາມຕາຍຂອງບັນດາຜູ້ຮັບໃຊ້ທີ່ສັດຊື່ຂອງພຣະອົງນັ້ນ
ມີຄ່າໃນສາຍຕາຂອງພຣະເຈົ້າຢາເວ.
ຂ້າແດ່ພຣະເຈົ້າຢາເວ ແທ້ຈິງຂ້ານ້ອຍເປັນຜູ້ຮັບໃຊ້ຂອງພຣະອົງ;
ຂ້ານ້ອຍຮັບໃຊ້ຂອງພຣະອົງ ເໝືອນດັ່ງທີ່ແມ່ຂອງຂ້ານ້ອຍໄດ້ເຮັດພຣະອົງ;
ພຣະອົງໄດ້ປົດປ່ອຍຂ້ານ້ອຍອອກຈາກໂສ້ທັງຫລາຍ.
ຂ້ານ້ອຍຈະຖວາຍເຄື່ອງບູຊາຂອບພຣະຄຸນແກ່ພຣະອົງ
ແລະ ຮ້ອງອອກນາມຂອງພຣະເຈົ້າຢາເວ.
ຂ້ານ້ອຍຈະເຮັດຕາມທີ່ໄດ້ປະຕິຍານໄວ້ຕໍ່ພຣະເຈົ້າຢາເວ
ຕໍ່ໜ້າປະຊາຊົນຂອງພຣະອົງທຸກຄົນ.
ໃນລານແຫ່ງວິຫານຂອງພຣະເຈົ້າຢາເວ
ໃນທ່າມກາງເຈົ້າ, ເຢຣູຊາເລັມ.
ຈົ່ງສັນລະເສີນພຣະເຈົ້າຢາເວ.1
Source notes (1)
- Footnote ພາສາເຮັບເຣີວ່າ ຮາເລລູຢາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.