Biblica® Open Lao Contemporary Version
ສຸພາສິດ 25
ສຸພາສິດເພີ່ມເຕີມຂອງໂຊໂລໂມນ
ຕໍ່ໄປນີ້ ແມ່ນສຸພາສິດເພີ່ມເຕີມຂອງໂຊໂລໂມນ, ທີ່ຄົນຂອງເຮເຊກີຢາກະສັດແຫ່ງຢູດາຍໄດ້ຮວບຮວມໄວ້ດັ່ງນີ້:
ພຣະເຈົ້າໄດ້ຮັບກຽດຈາກການເຊື່ອງບັງສິ່ງຕ່າງໆໄວ້;
ແລະ ບັນດາກະສັດໄດ້ຮັບກຽດຈາກການຄົ້ນພົບສິ່ງທີ່ໄດ້ເກີດຂຶ້ນ.
ຟ້າສະຫວັນສູງເທົ່າໃດ ແລະ ແຜ່ນດິນໂລກກໍເລິກເທົ່າໃດ,
ຄວາມຄິດຂອງບັນດາກະສັດກໍເກີນກວ່າຈະຄົ້ນຫາໄດ້ສັນນັ້ນ.
ເມື່ອກຳຈັດຂີ້ແຮ່ອອກຈາກເງິນແລ້ວ,
ແລະ ຊ່າງຕີເງິນກໍສາມາດເຮັດພາຊະນະໄດ້;
ເມືອຈໍາກັດຂ້າລາຊະການຊົ່ວອອກໄປຈາກບ່ອນທີ່ກະສັດຢູ່ແລ້ວ,
ບັນລັງຂອງເພິ່ນກໍຈະຖືກສ້າງຕັ້ງຂຶ້ນໂດຍຄວາມຊອບທຳ.
ຢ່າຍົກຍໍຕົນເອງຢູ່ຕໍ່ໜ້າກະສັດ,
ຫລື ເວົ້າໂອ້ອວດເຖິງຕົນເອງໃນບ່ອນທີ່ມີຄົນສຳຄັນ;
ຈົ່ງລໍຖ້າກະສັດເວົ້າກັບເຈົ້າວ່າ, “ຈົ່ງມາບ່ອນນີ້”,
ກໍດີກວ່າທີ່ເພິ່ນເຮັດໃຫ້ເຈົ້າອັບອາຍຂາຍໜ້າຕໍ່ໜ້າບັນດາຂຸນນາງຂອງເພິ່ນ.
ເຈົ້າໄດ້ເຫັນຫຍັງດ້ວຍຕາຂອງເຈົ້າເອງ
ຢ່າຟ້າວນຳໄປຟ້ອງ1 ສານ,
ເພາະໃນບັ້ນປາຍເຈົ້າຈະເຮັດແນວໃດ
ຖ້າເພື່ອນບ້ານຂອງເຈົ້າເຮັດໃຫ້ເຈົ້າອັບອາຍຂາຍໜ້າ?
ຖ້າເຈົ້ານໍາເອົາເພື່ອນບ້ານຂອງເຈົ້າໄປຂຶ້ນສານ,
ຢ່າທໍລະຍົດຕໍ່ຄວາມໄວ້ວາງໃຈຂອງຄົນອື່ນ,
ຢ້ານວ່າຜູ້ທີ່ໄດ້ຍິນອາດຈະເຮັດໃຫ້ເຈົ້າຂາຍໜ້າ
ແລະ ຈະກ່າວຫາຕໍ່ສູ້ເຈົ້າບໍ່ຈົບສິ້ນຈັກເທື່ອ.
ການໃຫ້ຄໍາຕັດສິນຢ່າງຖືກຕ້ອງ2
ກໍເໝືອນດັ່ງໝາກແອັບເປີ້ນຄຳທີ່ຫຸ້ມຫໍ່ດ້ວຍເງິນ.
ຄຳຕຳໜິຂອງຜູ້ພິພາກສາມີປັນຍາສຳລັບຫູທີ່ຮັບຟັງ
ກໍເໝືອນດັ່ງຕຸ້ມຫູຄໍາ ຫລື ເຄື່ອງປະດັບທີ່ເຮັດດ້ວຍຄຳບໍລິສຸດ.
ຜູ້ນຳຂ່າວທີ່ສັດຊື່
ເປັນດັ່ງນໍ້າເຢັນຈາກຫິມະໃນລະດູເກັບກ່ຽວ;
ທີ່ເຮັດໃຫ້ນາຍທີ່ສົ່ງລາວໄປນັ້ນຊື່ນບານໃຈ.
ຜູ້ທີ່ໂອ້ອວດເລື່ອງຂອງຂວັນ ທີ່ຕົນບໍ່ໃຫ້ຈັກເທື່ອ
ກໍເໝືອນຟ້າຄື້ມ ແລະ ລົມທີ່ບໍ່ມີຝົນ.
ຄວາມອົດທົນສາມາດເອົາຊະນະໃຈຜູ້ປົກຄອງ,
ລິ້ນທີ່ອ່ອນຫວານສາມາດເຮັດໃຫ້ກະດູກຫັກໄດ້.
ເມື່ອເຈົ້າເຫັນນໍ້າເຜິ້ງ ຈົ່ງກິນໃຫ້ພໍດີ
ຖ້າກິນມັນຫລາຍເກີນໄປ, ແລະ ເຈົ້າຈະຮາກອອກມາ.
ຈົ່ງໄປຢ້ຽມຢາມເພື່ອນບ້ານດົນໆເທື່ອໜຶ່ງ
ຖ້າເຈົ້າໄປດຸຫລາຍ, ພວກເຂົາຈະຊັງເຈົ້າ.
ຜູ້ທີ່ເປັນພະຍານບໍ່ຈິງຕໍ່ສູ້ເພື່ອນບ້ານ
ກໍເໝືອນດັ່ງໄມ້ຄ້ອນ, ດາບ ຫລື ລູກທະນູທີ່ແຫລມຄົມ.
ການເພິ່ງພາຄົນບໍ່ສັດຊື່ໃນຍາມເດືອດຮ້ອນ
ກໍເໝືອນດັ່ງແຂ້ວຫັກ ຫລື ຕີນທີ່ພິການ.
ຜູ້ທີ່ຮ້ອງເພງໃຫ້ຄົນທຸກໃຈຟັງ
ກໍເໝືອນດັ່ງຜູ້ທີ່ແກ້ເສື້ອອອກໃນມື້ທີອາກາດໜາວ,
ຫລື ເອົາເກືອໂຮຍໃສ່ບາດ.
ຖ້າສັດຕູຂອງເຈົ້າຫິວເຂົ້າ, ຈົ່ງເອົາອາຫານໃຫ້ລາວກິນ;
ຖ້າລາວຫິວນໍ້າ, ຈົ່ງເອົານ້ຳໃຫ້ລາວດື່ມ.
ການເຮັດຢ່າງນັ້ນ, ເປັນການທີ່ເຈົ້າໄດ້ກອງຖ່ານໄຟທີ່ລຸກໄໝ້ຢູ່ໃສ່ຫົວຂອງລາວ,
ແລະ ພຣະເຈົ້າຢາເວຈະໃຫ້ບຳເໜັດແກ່ເຈົ້າ.
ຄຳເວົ້າສຽດສີ ທີ່ເຮັດໃຫ້ໜ້າບູດບຶ້ງ
ກໍເປັນເໝືອນລົມທິດເໜືອນຳເອົາຝົນມາໂດຍທີ່ບໍ່ຄາດຄິດ.
ອາໄສຢູ່ເທິງຫລັງຄາເຮືອນ
ກໍດີກວ່າຢູ່ໃນເຮືອນຮ່ວມກັບເມຍທີ່ມັກຜິດຖຽງກັນ.
ຂ່າວດີຈາກແດນໄກ
ກໍເໝືອນດັ່ງເອົານ້ຳເຢັນໃຫ້ແກ່ຈິດໃຈທີ່ອິດເມື່ອຍອ່ອນແຮງ.
ຖ້າຄົນຊອບທຳເຮັດຕາມຄົນຊົ່ວຮ້າຍ
ກໍເໝືອນດັ່ງນ້ຳພຸມີຂີ້ຕົມ ຫລື ນ້ຳສ້າງທີ່ເປື້ອນເປີ.
ກິນນ້ຳເຜິ້ງຫລາຍບໍ່ດີສັນໃດ,
ການຄົ້ນຫາເລື່ອງຕ່າງໆເລິກເກີນໄປກໍເຮັດໃຫ້ເສຍກຽດສັນນັ້ນ.3
ຄົນທີ່ຄວບຄຸມຕົນເອງບໍ່ໄດ້
ກໍເໝືອນດັ່ງເມືອງທີ່ກຳແພງຖືກທຳລາຍ.
Source notes (3)
- Footnote ຫລື ຂຸນນາງ ຜູ້ເຊິ່ງເຈົ້າຈັບຕາເບິ່ງ 8 ຢ່າຮີບຮ້ອນໄປ
- Footnote ຫລື ການຕັດສິນໃຈທີ່ເໝາະສົມກັບສະຖານນະການ
- Footnote ຫລື ການຫາກຽດໃຫ້ໂຕເອງກໍບໍ່ເໝາະສັນນັ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.