Biblica® Open Lao Contemporary Version
ຈົດບັນຊີ 34
ເຂດແດນຕ່າງໆຂອງການາອານ
ພຣະເຈົ້າຢາເວກ່າວແກ່ໂມເຊວ່າ, “ຈົ່ງສັ່ງຄົນອິດສະຣາເອນ ແລະ ກ່າວແກ່ພວກເຂົາວ່າ: ເມື່ອພວກເຈົ້າເຂົ້າໄປການາອານ, ດິນແດນທີ່ຈະຕ້ອງແບ່ງປັນເປັນສ່ວນເພື່ອເປັນມໍລະດົກຂອງພວກເຈົ້ານັ້ນຈະມີເຂດແດນດັ່ງນີ້ຄື:
“ ‘ດິນແດນດ້ານໃຕ້ຂອງພວກເຈົ້າຈະລວມເອົາບາງສ່ວນຂອງຖິ່ນແຫ້ງແລ້ງກັນດານຊິນລຽບໄປຕາມຊາຍແດນຂອງເອໂດມ. ເຂດແດນທາງພາກໃຕ້ຈະເລີ່ມຈາກທິດຕາເວັນອອກຄືຈາກພາກໃຕ້ສຸດຂອງທະເລຕາຍ, ຜ່ານໄປຍັງທິດໃຕ້ຂອງຊ່ອງແຄບແມງງອດ, ຕໍ່ໄປຈົນເຖິງຊິນ ແລະ ລົງໄປທາງທິດໃຕ້ຂອງກາເດັດບາກເນອາ. ຈົນຮອດຮາສາອັດດາ ແລະ ອາສະໂມນ, ໂຄ້ງກັບ, ມາຈຸໃສ່ຮ່ອມພູຂອງເອຢິບ ແລະ ມາສຸດທີ່ທະເລເມດີແຕຣາເນ.
ເຂດແດນດ້ານຕາເວັນຕົກຂອງພວກເຈົ້າຄືຊາຍຝັ່ງທະເລເມດີແຕຣາເນ.
ສຳລັບເຂດແດນທາງດ້ານເໜືອຂອງພວກເຈົ້າ, ເລີ່ມຈາກທະເລເມດີແຕຣາເນໄປເຖິງພູໂຮເຣ ໄປສູ່ເລໂບຮາມັດ, ຈົນເຖິງເຊດາດ, ສືບຕໍ່ໄປເຖິງຊິບຟະໂຣນ ແລະ ສຸດຢູ່ທີ່ຮາຊາເອນານ.
ເຂດແດນທາງດ້ານຕາເວັນອອກຂອງພວກເຈົ້າ, ເລີ່ມຈາກຮາຊາເອນານຈົນເຖິງເຊຟາມ. ຈາກເຊຟາມໄປເຖິງຣິບລາດ້ານຕາເວັນອອກຂອງເມືອງອາອິນ ແລະ ສືບຕໍ່ລຽບໄປຕາມເນີນພູດ້ານຕາເວັນອອກຂອງທະເລຄາລີເລ.1 ລຽບລົງມາຕາມແມ່ນ້ຳຈໍແດນ ແລະ ມາສຸດທີ່ທະເລຕາຍ.
“ ‘ນີ້ຈະເປັນດິນແດນຂອງພວກເຈົ້າພ້ອມກັບຂອບເຂດຊາຍແດນທຸກດ້ານ’ ”.
ໂມເຊໄດ້ສັ່ງຄົນອິດສະຣາເອນວ່າ: “ຈົ່ງຈົກສະຫລາກແບ່ງປັນດິນແດນໃຫ້ເປັນມໍລະດົກ. ພຣະເຈົ້າຢາເວໄດ້ສັ່ງໄວ້ວ່າຈົ່ງມອບດິນແດນໃຫ້ເກົ້າເຜົ່າ ແລະ ອີກເຄິ່ງເຜົ່າ, ເພາະບັນດາຄອບຄົວຂອງເຜົ່າຣູເບັນ, ເຜົ່າກາດ ແລະ ມານາເຊເຄິ່ງເຜົ່າໄດ້ຮັບມໍລະດົກຂອງພວກເຂົາແລ້ວ. ສອງເຜົ່າ ແລະ ເຄິ່ງເຜົ່າເຫລົ່ານີ້ໄດ້ຮັບມໍລະດົກຂອງພວກເຂົາແລ້ວຢູ່ທາງທິດຕາເວັນອອກຂອງແມ່ນ້ຳຈໍແດນກົງກັນຂ້າມກັບເຢຣິໂກ”.
ພຣະເຈົ້າຢາເວກ່າວແກ່ໂມເຊວ່າ, “ຕໍ່ໄປນີ້ແມ່ນລາຍຊື່ຜູ້ທີ່ຈະເຮັດໜ້າທີ່ເພື່ອກຳນົດດິນແດນໃຫ້ເປັນມໍລະດົກສຳລັບພວກເຈົ້າຄື: ປະໂລຫິດເອເລອາຊາ ແລະ ໂຢຊວຍລູກຊາຍຂອງນູນ. ແລະ ຈົ່ງແຕ່ງຕັ້ງຜູ້ນຳໜຶ່ງຄົນຈາກແຕ່ລະເຜົ່າເພື່ອຊ່ວຍກຳນົດດິນແດນນັ້ນ.
“ລາຍຊື່ຂອງພວກເຂົາມີຄື:
“ກາເລັບລູກຊາຍຂອງເຢຟຸນເນ, ຈາກເຜົ່າຢູດາ;
ເຊມູເອນລູກຊາຍຂອງອາມມີຮູດ, ຈາກເຜົ່າຊີເມໂອນ;
ເອລີດາດລູກຊາຍຂອງກີຊະໂລນ, ຈາກເຜົ່າເບັນຢາມິນ;
ບຸກກີລູກຊາຍຂອງໂຢກະລີ, ຜູ້ນຳຈາກເຜົ່າດານ;
ຮານນີເອນລູກຊາຍຂອງເອໂຟດ, ຜູ້ນຳຈາກເຜົ່າມານາເຊລູກຊາຍຂອງໂຢເຊັບ;
ເກມູເອນລູກຊາຍຂອງຊິບຟະຕານ, ຜູ້ນຳຈາກເຜົ່າເອຟຣາອິມລູກຊາຍຂອງໂຢເຊັບ;
ເອລີຊາຟັນລູກຊາຍຂອງປາຣະນັກ, ຜູ້ນຳຈາກເຜົ່າເຊບູໂລນ;
ປານຕີເອນລູກຊາຍຂອງອາຊະຊານ, ຜູ້ນຳຈາກເຜົ່າອິດຊາຄາ;
ອາຮີຮູດລູກຊາຍຂອງເຊໂລມີ, ຜູ້ນຳຈາກເຜົ່າອາເຊີ;
ເປດາເຮນລູກຊາຍຂອງອາມມີຮຸດ, ຜູ້ນຳຈາກເຜົ່າເນັບທາລີ”.
ຄົນເຫລົ່ານີ້ຄືຜູ້ທີ່ພຣະເຈົ້າຢາເວສັ່ງໃຫ້ຈັດສັນມໍລະດົກແກ່ຄົນອິດສະຣາເອນໃນດິນແດນການາອານ.
Source notes (1)
- Footnote ພາສາເຮັບເຣີວ່າ ກິນເນເຣັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.