Biblica® Open Lao Contemporary Version
ລະບຽບພວກເລວີ 12
ການຊຳລະຕົນຫລັງເກີດລູກ
ພຣະເຈົ້າຢາເວກ່າວແກ່ໂມເຊວ່າ, “ຈົ່ງບອກຊາວອິດສະຣາເອນດັ່ງນີ້: ຍິງຄົນໃດທີ່ຖືພາ ແລະ ເກີດລູກຊາຍ, ຍິງຜູ້ນັ້ນຈະເປັນມົນທິນຕາມລະບຽບພິທີກຳເປັນເວລາເຈັດວັນ, ເຊັ່ນດຽວກັບຊ່ວງເວລາທີ່ນາງມີປະຈຳເດືອນ. ໃນວັນທີແປດໃຫ້ນຳເດັກນ້ອຍຄົນນັ້ນເຂົ້າສູ່ພິທີຕັດ. ຈາກນັ້ນນາງຕ້ອງລໍຖ້າສາມສິບສາມວັນເພື່ອຊຳລະຕົນຈາກການເສຍເລືອດ. ນາງຈະບໍ່ສຳພັດສິ່ງສັກສິດ ຫລື ເຂົ້າໄປໃນສະຖານທີ່ສັກສິດຈົນກວ່າຈະຄົບກຳນົດການຊຳລະຕົນຂອງນາງ. ຖ້ານາງເກີດລູກສາວ, ນາງຈະເປັນມົນທິນຢູ່ສອງອາທິດ, ເຊັ່ນດຽວກັບຊ່ວງທີ່ນາງມີປະຈຳເດືອນ. ຈາກນັ້ນນາງຈະຕ້ອງລໍຖ້າຫົກສິບຫົກວັນເພື່ອຊຳລະຕົນເນື່ອງຈາກການເສຍເລືອດ.
“ ‘ເມື່ອວັນແຫ່ງການຊຳລະຕົນຜ່ານພົ້ນໄປແລ້ວ ບໍ່ວ່ານາງຈະເກີດລູກເປັນຍິງ ຫລື ເປັນຊາຍກໍຕາມ, ນາງຈະຕ້ອງນຳເອົາລູກແກະອາຍຸໜຶ່ງປີໜຶ່ງໂຕມາເປັນເຄື່ອງເຜົາບູຊາ ແລະ ນົກກາງແກໜຸ່ມ ຫລື ນົກເຂົາໜຶ່ງໂຕມາເປັນເຄື່ອງບູຊາໄຖ່ບາບ1ມາມອບໃຫ້ແກ່ປະໂລຫິດທີ່ທາງເຂົ້າເຕັນນັດພົບ. ປະໂລຫິດຈະຖວາຍເຄື່ອງບູຊາຕໍ່ໜ້າພຣະເຈົ້າຢາເວເພື່ອເຮັດພິທີລຶບລ້າງບາບຂອງນາງ ແລະ ຈາກນັ້ນນາງຈະພົ້ນຈາກການເປັນມົນທິນຕາມລະບຽບພິທີກຳຈາກການທີ່ນາງໄດ້ເສຍເລືອດ.
“ ‘ສິ່ງເຫລົ່ານີ້ຄືກົດລະບຽບສຳລັບຍິງທີ່ເກີດລູກ ບໍ່ວ່າຈະເປັນລູກຊາຍ ຫລື ລູກຍິງ. ແຕ່ຖ້ານາງບໍ່ສາມາດຈະຖວາຍລູກແກະໜຶ່ງໂຕ ກໍໃຫ້ນາງນຳເອົານົກເຂົາ ຫລື ນົກກາງແກໜຸ່ມສອງໂຕມາແທນກໍໄດ້ຄື: ໂຕໜຶ່ງໃຫ້ເປັນເຄື່ອງເຜົາບູຊາ ສ່ວນອີກໂຕໜຶ່ງໃຫ້ເປັນເຄື່ອງບູຊາໄຖ່ບາບ. ປະໂລຫິດຈະເຮັດພິທີລຶບລ້າງບາບໂດຍວິທີນີ້ໃຫ້ນາງ ແລະ ນາງຈະບໍ່ເປັນມົນທິນ’ ”.
Source notes (1)
- Footnote ຫລືວ່າ ເພື່ອເປັນການຖວາຍຊຳລະລ້າງ, ເໝືອນກັນໃນຂໍ້ 8
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.