Biblica® Open Lao Contemporary Version
ພວກຜູ້ປົກຄອງ 7
ກີເດໂອນຊະນະຊາວມີດີອານ
ໃນຕອນເຊົ້າໆ ເຢຣຸບບາອານ (ຄືກີເດໂອນ) ແລະ ຄົນຂອງລາວທັງໝົດອອກມາຕັ້ງຄ້າຍທີ່ບໍ່ນໍ້າຮາໂຣດ. ຄ້າຍຂອງຊາວມີດີອານຕັ້ງຢູ່ໃນຮ່ອມພູທາງເໜືອຂອງພວກເຂົາ ເຊິ່ງໃກ້ເນີນພູໂມເຣ. ພຣະເຈົ້າຢາເວກ່າວຕໍ່ກີເດໂອນວ່າ, “ເຈົ້າມີກຳລັງຄົນຫລາຍເກີນໄປ. ເຮົາຈະບໍ່ໃຫ້ເຈົ້າຊະນະຊາວມີດີອານດ້ວຍມືຂອງພວກເຂົາ, ເພື່ອຊາວອິດສະຣາເອນຈະບໍ່ໂອ້ອວດຕໍ່ເຮົາວ່າ, ພວກຕົນໄດ້ຊ່ວຍດ້ວຍກຳລັງຂອງພວກຕົນເອງ ດັ່ງນັ້ນ ຈົ່ງປະກາດແກ່ກອງທັບວ່າ ‘ຜູ້ໃດຢ້ານໃຫ້ກັບຄືນເມືອ ແລະ ອອກໄປຈາກພູກີເລອາດ’ ”. ດັ່ງນັ້ນ ຈຶ່ງມີຊາວສອງພັນຄົນກັບບ້ານ, ຍັງເຫລືອຢູ່ສິບພັນຄົນ.
ແຕ່ພຣະເຈົ້າຢາເວກໍກ່າວກັບກີເດໂອນວ່າ, “ຍັງມີຄົນຫລາຍເກີນໄປ. ຈົ່ງພາພວກເຂົາລົງໄປທີ່ນ້ຳ ແລະ ເຮົາຈະເລືອກພວກເຂົາໃຫ້ເຈົ້າຢູ່ທີ່ນັ້ນ. ຖ້າເຮົາວ່າ ‘ຄົນນີ້ຈະໄປກັບເຈົ້າ’ ລາວກໍຈະໄປ ແຕ່ຖ້າເຮົາບອກວ່າ ‘ຄົນນີ້ຈະບໍ່ໄປກັບເຈົ້າ’ ລາວກໍຈະບໍ່ໄປ”.
ດັ່ງນັ້ນ ກີເດໂອນຈຶ່ງພາຄົນຂອງລາວລົງມາທີ່ນ້ຳ. ພຣະເຈົ້າຢາເວກ່າວກັບລາວຢູ່ທີ່ນັ້ນວ່າ, “ຈົ່ງແຍກພວກທີ່ເອົາມືຂອງພວກເຂົາກອບນໍ້າຂຶ້ນມາເລຍນ້ຳເໝືອນໝາອອກຈາກພວກທີ່ຄຸເຂົ່າລົງດື່ມນໍ້າ”. ມີພຽງສາມຮ້ອຍກອບນໍ້າຂຶ້ນມາເລຍນ້ຳເໝືອນໝາ. ສ່ວນທີ່ເຫລືອແມ່ນພວກທີ່ຄຸເຂົ່າລົງດື່ມນໍ້າ.
ພຣະເຈົ້າຢາເວກ່າວກັບກີເດໂອນວ່າ, “ເຮົາຈະຊ່ວຍກູ້ເອົາເຈົ້າ ແລະ ມອບຊາວມີດີອານໄວ້ໃນມືຂອງເຈົ້າດ້ວຍຄົນສາມຮ້ອຍຄົນນີ້. ຈົ່ງໃຫ້ຄົນອື່ນທີ່ເຫລືອທັງໝົດກັບຄືນເມືອບ້ານ”. ສະນັ້ນ ກີເດໂອນຈຶ່ງສົ່ງຊາວອິດສະຣາເອນທີ່ເຫລືອກັບເມືອ ແຕ່ສາມຮ້ອຍຄົນຍັງຢູ່, ເພື່ອຮັກສາອາຫານກັບແກຂອງພວກເຂົາໄວ້.
ຊາວມີດີອານຕັ້ງຄ້າຍພັກຢູ່ດ້ານລຸ່ມກີເດໂອນໃນຮ່ອມພູ. ໃນຄືນນັ້ນ ພຣະເຈົ້າຢາເວກ່າວຕໍ່ກີເດໂອນວ່າ, “ຈົ່ງລຸກຂຶ້ນ, ລົງໄປຕໍ່ສູ້ກັບຄ້າຍນັ້ນ, ເພາະວ່າເຮົາກຳລັງຈະມອບພວກເຂົາໄວ້ໃນມືຂອງເຈົ້າ. ແຕ່ຖ້າເຈົ້າບໍ່ກ້າໂຈມຕີ, ຈົ່ງລົງໄປທີ່ຄ້າຍຂອງຊາວມີດີອານກັບປູຣາຄົນຮັບໃຊ້ຂອງເຈົ້າ. ແລ້ວຈົ່ງຟັງສິ່ງທີ່ພວກເຂົາກຳລັງເວົ້າກັນ. ຫລັງຈາກນັ້ນເຈົ້າຈະໄດ້ຮັບກຳລັງໃຈເພື່ອຈະໂຈມຕີຄ້າຍນັ້ນ”. ສະນັ້ນ ລາວ ແລະ ປູຣາຄົນຮັບໃຊ້ຂອງລາວ ຈຶ່ງລົງໄປທີ່ດ້ານໜ້າຂອງຄ້າຍ. ຊາວມີດີອານ, ຊາວອາມາເຫລັກ ແລະ ຄົນເຜົ່າອື່ນໆທັງໝົດທາງດ້ານຕາເວັນອອກໄດ້ຕັ້ງຄ້າຍຢູ່ໃນຮ່ອມພູຢ່າງໜາແໜ້ນເໝືອນດັ່ງຝູງຕັກແຕນ. ຝູງອູດຂອງພວກເຂົາມີຢ່າງຫລວງຫລາຍຈົນນັບບໍ່ໄດ້ເໝືອນດັ່ງດິນຊາຍຢູ່ທີ່ທະເລຊາຍ.
ພໍແຕ່ກີເດໂອນມາຮອດໃນຂະນະທີ່ຊາຍຄົນໜຶ່ງກຳລັງເລົ່າເລື່ອງຄວາມຝັນຂອງລາວໃຫ້ໝູ່ຟັງ. ລາວກໍາລັງເວົ້າວ່າ “ຂ້າໄດ້ຝັນວ່າ, ມີເຂົ້າຈີ່ບາເລກ້ອນກົມໆກ້ອນໜຶ່ງກິ້ງເຂົ້າມາໃນຄ້າຍຂອງຊາວມີດີອານ. ເຂົ້າຈີ່ນັ້ນກິ້ງມາຕຳຜ້າເຕັນຢ່າງແຮງຈົນເຮັດໃຫ້ຢ່າງແຮງຈົນເຕັນລົ້ມ ແລະ ຫັກພັງລົງໝົດ”.
ໝູ່ຂອງລາວຕອບວ່າ “ນີ້ຈະເປັນຢ່າງອື່ນບໍ່ໄດ້ ນອກຈາກເປັນດາບຂອງກີເດໂອນລູກຊາຍຂອງໂຢອາດ ຊາວອິດສະຣາເອນ. ພຣະເຈົ້າໄດ້ມອບຊາວມີດີອານ ແລະ ຄ້າຍທັງໝົດໄວ້ໃນມືຂອງລາວແລ້ວ”.
ເມື່ອກີເດໂອນໄດ້ຍິນຄວາມຝັນ ແລະ ຄວາມໝາຍຂອງຄວາມຝັນນັ້ນ, ລາວຈຶ່ງຄຸເຂົ່າລົງ ແລະ ນະມັດສະການພຣະເຈົ້າ. ຫລັງຈາກນັ້ນລາວກໍໄດ້ກັບໄປທີ່ຄ້າຍຂອງອິດສະຣາເອນ ແລ້ວກໍຮ້ອງຂຶ້ນວ່າ, “ຈຶ່ງລຸກຂຶ້ນ! ພຣະເຈົ້າຢາເວໄດ້ມອບຄ້າຍຂອງຊາວມີດີອານໄວ້ໃນມືຂອງພວກເຈົ້າແລ້ວ”. ກີເດໂອນແບ່ງຄົນສາມຮ້ອຍຄົນອອກເປັນສາມກຸ່ມ, ລາວແຈກຢາຍແກກັບໄຫເປົ່າໃຫ້ພວກເຂົາ, ພ້ອມທັງກະບອງທີ່ມີໄຟລຸກຢູ່ໃຫ້ກັບທຸກຄົນ.
ລາວບອກພວກເຂົາວ່າ “ຈົ່ງເບິ່ງຂ້ອຍ ແລະ ຈົ່ງເຮັດຕາມຂ້ອຍທຸກປະການ, ເມື່ອຂ້ອຍໄປເຖິງແຄມຄ້າຍ. ເມື່ອຂ້ອຍ ແລະ ພວກທີ່ຢູ່ຂ້ອຍເປົ່າແກ, ແລ້ວພວກເຈົ້າທຸກຄົນທີ່ອ້ອມຄ້າຍຈົ່ງເປົ່າແກຂອງພວກເຈົ້າ ແລະ ຮ້ອງຂຶ້ນວ່າ, ‘ເພື່ອພຣະເຈົ້າຢາເວ ແລະ ເພື່ອກີເດໂອນ’ ”.
ກີເດໂອນ ແລະ ຄົນໜຶ່ງຮ້ອຍຄົນທີ່ຢູ່ກັບລາວກໍມາຮອດແຄມຄ້າຍພໍຮອດທ່ຽງຄືນ, ຫລັງຈາກທະຫານເຝົ້າຍາມໄດ້ປ່ຽນເວນຍາມ. ພວກເຂົາກໍເປົ່າແກຂຶ້ນ ແລະ ທຸບໄຫທີ່ຢູ່ໃນມືຂອງພວກເຂົາ. ທັງສາມກຸ່ມກໍເປົ່າແກ ແລະ ທຸບໄຫ. ມືຊ້າຍຂອງພວກເຂົາຖືກະບອງ ແລະ ມືຂວາຖືແກ ແລະ ຮ້ອງຂຶ້ນວ່າ, “ດາບເພື່ອພຣະເຈົ້າຢາເວ ແລະ ເພື່ອກີເດໂອນ!” ຈາກນັ້ນ ພວກທີ່ຢືນປະຈໍາການຂອງໃຜລາວທີ່ຢູ່ອ້ອມຄ້າຍ, ຊາວມີດີອານທັງໝົດຈຶ່ງແລ່ນໜີໄປ ພ້ອມທັງສົ່ງສຽງຮ້ອງເມື່ອພວກເຂົາໜີໄປ.
ເມື່ອຄົນສາມຮ້ອຍຄົນນັ້ນກໍເປົ່າແກຂຶ້ນດັງ, ພຣະເຈົ້າຢາເວບັນດານໃຫ້ພວກມີດີອານຫັນມາຕໍ່ສູ້ກັນເອງ. ແລ້ວກອງທັບຊາວມີດີອານໜີໄປທີ່ເບັດຊິດຕາ ເຊິ່ງມຸ່ງໜ້າໄປເຊເຣຣາໄປຈົນເຖິງເຂດແດນຊາຍຂອງອາເບັນເມໂຮລາໃກ້ຕັບບັດ. ຊາວອິດສະຣາເອນມາຈາກເນັບທາລີ, ອາເຊ ແລະ ມານາເຊທັງໝົດຖືກເອີ້ນໃຫ້ອອກມາ, ພວກເຂົາໄລ່ຕາມຊາວມີດີອານ ກີເດໂອນໄດ້ສົ່ງຜູ້ນຳຂ່າວໄປບອກທົ່ວທັງເຂດເນີນພູແຫ່ງເອຟຣາອິມວ່າ, “ຈົ່ງລົງມາຕໍ່ສູ້ກັບຊາວມີດີອານ ແລະ ໃຫ້ຢຶດທ່ານໍ້າຂອງແມ່ນໍ້າຈໍແດນໄປຈົນເຖິງເບັດບາຣາກ່ອນພວກເຂົາ”.
ດັ່ງນັ້ນ ຄົນເອຟຣາອິມທັງໝົດຈຶ່ງຖືກເອີ້ນອອກມາ ແລະ ພວກເຂົາຢຶດທ່ານໍ້າຂອງແມ່ນ້ຳຈໍແດນໄປຈົນເຖິງເບັດບາຣາ. ພວກເຂົາຍັງຈັບຜູ້ນຳຊາວມີດີອານສອງຄົນໄດ້ຄື ໂອເຣັບ ແລະ ເຊເອັບ. ພວກເຂົາໄດ້ຂ້າໂອເຣັບທີ່ໂງ່ນຫີນໂອເຣັບ ແລະ ຂ້າເຊເອັບຢູ່ທີ່ບ່ອນບີບໝາກອະງຸ່ນຂອງເຊເອັບ. ພວກເຂົາໄລ່ຕາມຊາວມີດີອານ ແລະ ໄດ້ນຳຫົວຂອງໂອເຣັບ ແລະ ເຊເອັບໄປໃຫ້ກີເດໂອນຢູ່ທີ່ແຄມແມ່ນ້ຳຈໍແດນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.