Biblica® Open Lao Contemporary Version
ໂຢຊວຍ 21
ເມືອງສຳລັບເຜົ່າເລວີ
(1ຂຄ 6:54-80)
ບັນດາຫົວໜ້າຄອບຄົວຂອງເຜົ່າເລວີໄດ້ມາຫາລືກັບປະໂລຫິດເອເລອາຊາ, ໂຢຊວຍ ລູກຊາຍຂອງນູນ ແລະ ບັນດາຫົວໜ້າຄອບຄົວຂອງເຜົ່າອື່ນໆຂອງອິດສະຣາເອນ ທີ່ຊີໂລໃນການາອານ ແລະ ໄດ້ເວົ້າກັບພວກເຂົາວ່າ “ພຣະເຈົ້າຢາເວໄດ້ສັ່ງໂມເຊໃຫ້ມອບເມືອງຕ່າງໆໃຫ້ແກ່ພວກຂ້ານ້ອຍ ເພື່ອເປັນບ່ອນອາໄສ ພ້ອມກັບທົ່ງຫຍ້າສຳລັບສັດລ້ຽງຂອງພວກຂ້ານ້ອຍ”.
ດັ່ງນັ້ນ ຊາວອິດສະຣາເອນຈຶ່ງໄດ້ມອບເມືອງຕ່າງໆ ແລະ ທົ່ງຫຍ້າໃນເຂດທີ່ເປັນກຳມະສິດຂອງຕົນໃຫ້ແກ່ເຜົ່າເລວີ ຕາມທີ່ພຣະເຈົ້າຢາເວໄດ້ສັ່ງໄວ້.
ຈັບສະຫລາກຄັ້ງທຳອິດແມ່ນໄດ້ແກ່ຕະກຸນໂກຮາດ, ຕາມແຕ່ລະຕະກຸນຂອງພວກເຂົາ. ເຜົ່າເລວີທີ່ເປັນເຊື້ອສາຍຂອງປະໂລຫິດອາໂຣນແມ່ນໄດ້ຮັບ 13 ເມືອງຈາກເຜົ່າຢູດາ, ຊີເມໂອນ ແລະ ເບັນຢາມິນ.
ສ່ວນລູກຫລານທີ່ເຫລືອຂອງໂກຮາດແມ່ນໄດ້ຮັບ 10 ເມືອງ ຈາກຕະກຸນຕ່າງໆຂອງເຜົ່າເອຟຣາອິມ, ດານ ແລະ ມານາເຊເຄິ່ງເຜົ່າ.
ເຊື້ອສາຍເກໂຊນແມ່ນໄດ້ຮັບ 13 ເມືອງ ຈາກຕະກຸນຕ່າງໆຂອງເຜົ່າອິດຊາຄາ, ອາເຊ, ເນັບທາລີ ແລະ ມານາເຊອີກເຄິ່ງເຜົ່າໃນບາຊານ.
ເຊື້ອສາຍເມຣາຣິຕາມແຕ່ລະຕະກຸນຂອງພວກເຂົາແມ່ນໄດ້ຮັບ 12 ເມືອງ ຈາກເຜົ່າຣູເບັນ, ກາດ ແລະ ເຊບູໂລນ.
ດັ່ງນັ້ນ ຊາວອິດສະຣາເອນຈຶ່ງໄດ້ແບ່ງເມືອງ ແລະ ທົ່ງຫຍ້າເຫລົ່ານີ້ຂອງພວກເຂົາໃຫ້ແກ່ຄົນເລວີ, ຕາມທີ່ພຣະເຈົ້າຢາເວ ໄດ້ສັ່ງໂມເຊໄວ້.
ພວກເຂົາໄດ້ແບ່ງເມືອງຈາກເຜົ່າຢູດາ ແລະ ຊີເມໂອນຕາມລາຍຊື່. ເມືອງເຫລົ່ານີ້ໄດ້ຖືກມອບໃຫ້ແກ່ລູກຫລານຂອງອາໂຣນ ເຊິ່ງມາຈາກຕະກຸນໂກຮາດຂອງເຜົ່າເລວີ, ເພາະວ່າການຈັບສະຫລາກຄັ້ງທຳອິດນັ້ນແມ່ນຕົກຖືກພວກເຂົາ.
ພວກເຂົາໄດ້ມອບເມືອງກີຣິອາດອາກບາ (ຄືເຮັບໂຣນ), ພ້ອມດ້ວຍທົ່ງຫຍ້າທີ່ຢູ່ອ້ອມແອ້ມນັ້ນ, ເຊິ່ງຢູ່ໃນແຖບພູເຂົາແຫ່ງຢູດາ ໃຫ້ແກ່ລູກຫລານຂອງອາໂຣນ. (ອາກບາເປັນບັນພະບຸລຸດຂອງຊາວອານາກ). ແຕ່ທົ່ງນາ ແລະ ໝູ່ບ້ານຕ່າງໆທີ່ຢູ່ໃນເມືອງນັ້ນໄດ້ມອບໃຫ້ແກ່ກາເລັບ ເຊິ່ງເປັນລູກຊາຍຂອງເຢຟຸນເນ ໃຫ້ເປັນກຳມະສິດຂອງລາວ. ດັ່ງນັ້ນ ເຊື້ອສາຍຂອງປະໂລຫິດອາໂຣນຈຶ່ງໄດ້ຮັບເມືອງເຮັບໂຣນ (ເປັນເມືອງລີ້ໄພສຳລັບຜູ້ທີ່ຖືກກ່າວຫາວ່າເຮັດຄາດຕະກຳ), ລິບນາ, ຢັດທີ, ເອຊະເຕມົວ, ໂຮໂລນ, ເດບີ, ອາອິນ, ຢຸດຕາ ແລະ ເບັດເຊເມດ. ລວມທັງໝົດມີ 9 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ ຈາກສອງເຜົ່າ.
ແລະ ຈາກເຜົ່າເບັນຢາມິນ ພວກເຂົາໄດ້ມອບໃຫ້ແກ່ລູກຫລານຂອງອາໂຣນ ດັ່ງນີ້:
ກີເບໂອນ, ເກບາ, ອານາທົດ ແລະ ອານໂມນ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ເມືອງທີ່ໄດ້ມອບໃຫ້ແກ່ບັນດາປະໂລຫິດ, ເຊິ່ງເປັນເຊື້ອສາຍຂອງອາໂຣນ ລວມທັງໝົດມີ 13 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ສ່ວນຄອບຄົວອື່ນໆຂອງຕະກຸນໂກຮາດຂອງເຜົ່າເລວີແມ່ນໄດ້ຮັບເມືອງຕ່າງໆຈາກເຜົ່າເອຟຣາອິມ ມີດັ່ງນີ້:
ໃນແຖບພູເຂົາແຫ່ງເອຟຣາອິມ ພວກເຂົາໄດ້ຮັບມີດັ່ງນີ້:
ຊີເຄມ (ເປັນເມືອງລີ້ໄພສຳລັບຜູ້ທີ່ຖືກກ່າວຫາວ່າເຮັດຄາດຕະກຳ) ແລະ ເກເຊ, ກິບສາອິມ ແລະ ເບັດໂຮໂຣນ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ຈາກເຜົ່າດານ ພວກເຂົາໄດ້ຮັບມີດັ່ງນີ້:
ເມືອງເອນເຕເກ, ກິບເບໂທນ, ໄອຢາໂລນ ແລະ ກາດຣິມໂມນ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ຈາກມານາເຊອີກເຄິ່ງເຜົ່າ ພວກເຂົາໄດ້ຮັບມີດັ່ງນີ້:
ເມືອງຕາອານັກ ແລະ ກາດຣິມໂມນ ລວມທັງໝົດມີ 2 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ດັ່ງນັ້ນ ທັງໝົດ 10 ເມືອງ ແລະ ທົ່ງຫຍ້າຕ່າງໆຂອງເມືອງເຫລົ່ານີ້ແມ່ນໄດ້ມອບໃຫ້ຄອບຄົວອື່ນໆຂອງຕະກຸນໂກຮາດ.
ຕະກຸນເກໂຊນຂອງເຜົ່າເລວີແມ່ນໄດ້ຮັບດັ່ງນີ້:
ຈາກມານາເຊເຄິ່ງເຜົ່າມີຄື:
ໂກລານໃນບາຊານ (ເປັນເມືອງລີ້ໄພສຳລັບຜູ້ທີ່ຖືກກ່າວຫາວ່າເປັນຜູ້ຂ້າຄົນ) ແລະ ເບຊະເຕຣາ ລວມທັງໝົດມີ 2 ເມືອງ ພ້ອມດ້ວຍທົ່ງຫຍ້າຂອງເມືອງເຫລົ່ານັ້ນ;
ຈາກເຜົ່າອິດຊາຄາມີຄື:
ກີຊີໂອນ, ດາເບຣັດ, ຢາຣະມຸດ ແລະ ເອັນກັນນິມ, ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ;
ຈາກເຜົ່າອາເຊມີຄື:
ມີຊັນ, ອັບໂດນ, ເຮນກາດ ແລະ ເຣໂຮບ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ;
ຈາກເຜົ່າເນັບທາລີມີຄື:
ເກເດັດໃນຄາລີເລ (ເປັນເມືອງລີ້ໄພສຳລັບຜູ້ທີ່ຖືກກ່າວຫາວ່າເປັນຜູ້ຂ້າຄົນ), ຮາມໂມດໂດເຣ ແລະ ກາກຕານ ລວມ 3 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ຈຳນວນເມືອງທັງໝົດທີ່ຕະກຸນເກໂຊນໄດ້ຮັບມີ 13 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ຕະກຸນເມຣາຣິ (ເຜົ່າເລວີທີ່ເຫລືອ) ແມ່ນໄດ້ຮັບຄື:
ຈາກເຜົ່າເຊບູໂລນມີຄື:
ໂຢກເນອາມ, ກາກຕາ, ດີມນາ ແລະ ນາຮາລັນ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ;
ຈາກເຜົ່າຣູເບັນມີຄື:
ເບເຊ, ຢາຮາດ, ເກເດໂມດ ແລະ ເມຟາອາດ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ;
ຈາກເຜົ່າກາດມີຄື:
ຣາໂມດໃນກີເລອາດ (ເປັນເມືອງລີ້ໄພສຳລັບຜູ້ທີ່ຖືກກ່າວຫາວ່າເປັນຜູ້ຂ້າຄົນ), ມະຫານາອິມ, ເຮັດຊະໂບນ ແລະ ຢາເສ ລວມທັງໝົດມີ 4 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນ.
ຈຳນວນເມືອງທັງໝົດທີ່ໄດ້ຮັບການແບ່ງໃຫ້ຕະກຸນເມຣາຣິ ເຊິ່ງເປັນຄົນເລວີສ່ວນທີ່ເຫລືອ ມີ 12 ເມືອງ.
ເມືອງທີ່ເຜົ່າເລວີໄດ້ຮັບທັງໝົດມີ 48 ເມືອງ ພ້ອມດ້ວຍທົ່ງຫຍ້າຕ່າງໆຂອງເມືອງເຫລົ່ານັ້ນທີ່ຢູ່ໃນດິນແດນທີ່ຊາວອິດສະຣາເອນຢຶດຄອງ. ເມືອງເຫລົ່ານີ້ມີທົ່ງຫຍ້າອ້ອມຮອບທຸກເມືອງ; ນີ້ເປັນຄວາມຈິງຂອງບັນດາເມືອງເຫລົ່ານີ້.
ດັ່ງນັ້ນ ພຣະເຈົ້າຢາເວຈຶ່ງໄດ້ມອບດິນແດນທັງໝົດນີ້ໃຫ້ແກ່ອິດສະຣາເອນ ຕາມທີ່ພຣະອົງໄດ້ປະຕິຍານໄວ້ກັບບັນພະບຸລຸດຂອງພວກເຂົາ ແລະ ພວກເຂົາກໍໄດ້ເຂົ້າໄປຢຶດຄອງດິນແດນນີ້ ແລະ ຕັ້ງຖິ່ນຖານຢູ່ທີ່ນັ້ນ. ພຣະເຈົ້າຢາເວໄດ້ມອບຄວາມສະຫງົບສຸກທຸກດ້ານໃຫ້ແກ່ພວກເຂົາ, ຕາມທີ່ພຣະອົງໄດ້ປະຕິຍານໄວ້ກັບບັນພະບຸລຸດຂອງພວກເຂົາ; ບໍ່ມີສັດຕູຄົນໃດຢືນຕໍ່ສູ້ພວກເຂົາໄດ້; ພຣະເຈົ້າຢາເວໄດ້ມອບສັດຕູທັງໝົດຂອງພວກເຂົາໄວ້ໃນມືຂອງພວກເຂົາ. ສິ່ງດີທັງໝົດທີ່ພຣະເຈົ້າຢາເວໄດ້ສັນຍາໄວ້ກັບຊົນຊາດອິດສະຣາເອນລ້ວນແຕ່ສຳເລັດ; ບໍ່ມີຂາດຕົກບົກຜ່ອງໄປແມ່ນແຕ່ຂໍ້ດຽວ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.