Biblica® Open Lao Contemporary Version
ເຢເຣມີຢາ 12
ຄຳຮ້ອງທຸກຂອງເຢເຣມີຢາ
ຂ້າແດ່ພຣະເຈົ້າຢາເວ, ພຣະອົງຊອບທຳຢູ່ສະເໝີ,
ເມື່ອຂ້ານ້ອຍນຳຄະດີມາຕໍ່ໜ້າພຣະອົງ.
ແຕ່ຂ້ານ້ອຍກໍຈະຖາມພຣະອົງກ່ຽວກັບເລື່ອງຄວາມຍຸຕິທຳຂອງພຣະອົງວ່າ:
ເປັນຫຍັງທາງຂອງຄົນຊົ່ວຮ້າຍຈຶ່ງຈະເລີນຂຶ້ນ?
ເປັນຫຍັງຄົນບໍ່ສັດຊື່ທຸກຄົນຈຶ່ງດໍາເນີນຊີວິດຢ່າງສຸກສະບາຍ?
ພຣະອົງໄດ້ປູກພວກເຂົາໄວ້ ແລະ ພວກເຂົາໄດ້ຢັ່ງຮາກ;
ພວກເຂົາໃຫຍ່ຂຶ້ນ ແລະ ເກີດຜົນ.
ພວກເຂົາມັກເວົ້າເຖິງພຣະອົງຢູ່ສະເໝີ
ແຕ່ຈິດໃຈຂອງພວກເຂົາຫ່າງໄກຈາກພຣະອົງ.
ຂ້າແດ່ພຣະເຈົ້າຢາເວ, ແຕ່ພຣະອົງຮູ້ຈັກຂ້ານ້ອຍ;
ພຣະອົງເຫັນຂ້ານ້ອຍ ແລະ ທົດສອບຄວາມຄິດຂອງຂ້ານ້ອຍກ່ຽວກັບພຣະອົງ.
ຂໍໂຜດລາກພວກເຂົາອອກໄປເໝືອນດັ່ງແກະຖືກນໍາເອົາໄປຂ້າ!
ຂໍໂຜດແຍກພວກເຂົາໄວ້ສຳລັບວັນປະຫານ!
ດິນແດນນີ້ຈະແຕກແຫງ1ອີກດົນປານໃດ?
ແລະ ຫຍ້າທຸກທົ່ງຈະຫ່ຽວແຫ້ງອີກດົນປານໃດ?
ເພາະບັນດາຄົນທີ່ອາໄສໃນດິນແດນນີ້ກໍຊົ່ວຮ້າຍ,
ຝູງສັດ ແລະ ຝູງນົກໄດ້ຈິບຫາຍໄປ.
ຫລາຍກວ່ານັ້ນ, ປະຊາຊົນກໍາລັງເວົ້າວ່າ,
“ພຣະອົງບໍ່ເຫັນດອກວ່າເກີດຫຍັງຂຶ້ນກັບພວກຂ້ານ້ອຍ”.
ຄຳຕອບຂອງພຣະເຈົ້າ
“ຖ້າເຈົ້າແລ່ນແຂ່ງກັບມະນຸດ
ແລະ ພວກເຂົາຈະເຮັດໃຫ້ເຈົ້າໝົດແຮງ,
ເຈົ້າຈະແລ່ນແຂ່ງຂັນກັບມ້າໄດ້ແນວໃດ?
ຖ້າເຈົ້າສະດຸດລົ້ມ2ໃນດິນແດນທີ່ປອດໄພ,
ເຈົ້າຈະຈັດການຢ່າງໃດໃນປ່າທີ່ແຄມແມ່ນໍ້າຈໍແດນ?3
ແມ່ນແຕ່ຍາດພີ່ນ້ອງ ແລະ ຄົນໃນຄອບຄົວຂອງເຈົ້າເອງ
ພວກເຂົາກໍໄດ້ທໍລະຍົດເຈົ້າ;
ພວກເຂົາໄດ້ຮ້ອງສຽງດັງຕໍ່ສູ້ເຈົ້າ.
ຢ່າໄວ້ວາງໃຈພວກເຂົາ,
ເຖິງແມ່ນວ່າພວກເຂົາຈະເວົ້າດີກັບເຈົ້າກໍຕາມ.
“ເຮົາຈະປະຖິ້ມວິຫານຂອງເຮົາ,
ເຮົາຈະປະຖິ້ມມໍລະດົກຂອງເຮົາ;
ເຮົາຈະມອບຜູ້ທີ່ເຮົາຮັກ
ໄວ້ໃນມືຂອງບັນດາສັດຕູຂອງນາງ.
ມໍລະດົກຂອງເຮົາໄດ້ກາຍ
ເປັນເໝືອນສິງໂຕໜຶ່ງໃນປ່າສຳລັບເຮົາ.
ນາງຮ້ອງແຜດສຽງໃສ່ເຮົາ;
ເຫດສະນັ້ນ ເຮົາຈຶ່ງກຽດຊັງນາງ.
ມໍລະດົກຂອງເຮົາບໍ່ໄດ້ເປັນຂອງເຮົາ
ເປັນເໝືອນນົກລ່າເຫຍື່ອໂຕໜຶ່ງ
ທີ່ນົກລ່າເຫຍື່ອໂຕອື່ນຫຸ້ມລ້ອມ ແລະ ໂຈມຕີມັນບໍ່ແມ່ນບໍ?
ຈົ່ງໄປ ແລະ ຮວບຮວມສັດປ່າທີ່ໂຫດຮ້າຍທັງໝົດ;
ນໍາພວກມັນມາກິນ.
ຄົນລ້ຽງແກະຫລາຍຄົນຈະທຳລາຍສວນອະງຸ່ນຂອງເຮົາ
ແລະ ຈະຢຽບຢໍ່າທົ່ງນາຂອງເຮົາລົງ;
ພວກເຂົາຈະປ່ຽນທົ່ງນາອັນໜ້າຊື່ນຊົມຂອງເຮົາ
ກາຍເປັນບ່ອນທີ່ຮົກຮ້າງເພພັງ.
ມັນຈະກາຍເປັນຖິ່ນແຫ້ງແລ້ງກັນດານ,
ເປັນດິນທີ່ແຕກແຫງ ແລະ ຖືກປະຖິ້ມໃຫ້ຮົກຮ້າງຕໍ່ໜ້າເຮົາ;
ທົ່ວແຜ່ນດິນຖືກປະຖິ້ມໄວ້ໃຫ້ຮົກຮ້າງ
ເພາະບໍ່ມີຜູ້ໃດເບິ່ງແຍງ.
ພວກຜູ້ທຳລາຍຈະປິດລ້ອມ
ເນີນພູສູງທັງໝົດໃນຖິ່ນແຫ້ງແລ້ງກັນດານ,
ເພາະດາບຂອງພຣະເຈົ້າຢາເວຈະທຳລາຍ
ຈາກສຸດປາຍຂອງດິນແດນດ້ານໜຶ່ງໄປຫາອີກດ້ານໜຶ່ງ;
ຈະບໍ່ມີຜູ້ໃດປອດໄພ.
ພວກເຂົາຈະຫວ່ານເຂົ້າຫວີດ ແຕ່ເກັບກ່ຽວໜາມ;
ພວກເຂົາຈະເຮັດວຽກຢ່າງໜັກ ແຕ່ບໍ່ໄດ້ຫຍັງເລີຍ.
ດັ່ງນັ້ນ ພວກເຂົາຈະໄດ້ຄວາມອັບອາຍຈາກການເກັບກ່ຽວຂອງຕົນ
ຍ້ອນຄວາມໃຈຮ້າຍອັນຮຸນແຮງຂອງພຣະເຈົ້າຢາເວ”.
ພຣະເຈົ້າຢາເວກ່າວວ່າ: “ສ່ວນເພື່ອນບ້ານທີ່ຊົ່ວຮ້າຍທັງໝົດຂອງເຮົາທີ່ຢຶດຊັບສົມບັດຂອງເຮົາໄປນັ້ນ ເຮົາໄດ້ມອບໃຫ້ອິດສະຣາເອນປະຊາຊົນຂອງເຮົາ, ເຮົາຈະຖອນຮາກຄົນຊົ່ວຮ້າຍອອກຈາກດິນແດນຂອງພວກເຂົາ ແລະ ເຮົາຈະຖອນຮາກປະຊາຊົນຢູດາຍອອກຈາກທ່າມກາງພວກເຂົາ. ແຕ່ຫລັງຈາກທີ່ເຮົາຖອນຮາກພວກເຂົາແລ້ວ, ເຮົາຈະໃຫ້ຄວາມເມດຕາແກ່ພວກເຂົາ ແລະ ນຳພວກເຂົາແຕ່ລະຄົນກັບສູ່ຊັບສົມບັດ ແລະ ດິນແດນຂອງພວກເຂົາເອງອີກ. ແລະ ຖ້າພວກເຂົາຮຽນຮູ້ວິຖີທາງຂອງປະຊາຊົນຂອງເຮົາໄດ້ດີ ແລະ ສາບານໂດຍນາມຂອງເຮົາວ່າ, ‘ພຣະເຈົ້າຢາເວມີຊີວິດຢູ່ສັນໃດ’ ເໝືອນດັ່ງທີ່ພວກເຂົາເຄີຍສອນປະຊາຊົນຂອງເຮົາໃຫ້ສາບານໂດຍນາມຂອງພະບາອານເມື່ອນັ້ນພວກເຂົາຈະໄດ້ຮັບການສະຖາປະນາໄວ້ທ່າມກາງປະຊາຊົນຂອງເຮົາ. ແຕ່ຖ້າຊົນຊາດໃດບໍ່ຍອມຟັງ, ເຮົາຈະຖອນຮາກຂອງພວກເຂົາ ແລະ ທຳລາຍຊົນຊາດນັ້ນຈົນໝົດສິ້ນ”, ພຣະເຈົ້າຢາເວປະກາດດັ່ງນີ້.
Source notes (3)
- Footnote ຫລື ຄ່ຳຄວນ
- Footnote ຫລື ເຈົ້າຮູ້ສຶກປອດໄພເທົ່ານັ້ນ
- Footnote ຫລື ເຈົ້າຈະເຮັດຢ່າງໃດເມື່ອແມ່ນ້ຳຈໍແດນເອີ່ຖ້ວມ?
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.