Biblica® Open Lao Contemporary Version
ເຮັບເຣີ 5
ມະຫາປະໂລຫິດທຸກຄົນໄດ້ຖືກເລືອກຈາກມະນຸດ ແລະ ໄດ້ຮັບການແຕ່ງຕັ້ງໃຫ້ເຮັດໜ້າທີ່ແທນມະນຸດໃນສິ່ງສາລະພັດທີ່ກຽ່ວກັບພຣະເຈົ້າ ຄືການຖວາຍເຄື່ອງບູຊາ ແລະ ຂອງຖວາຍສຳລັບການອະໄພບາບ. ເພິ່ນສາມາດປະຕິບັດຢ່າງອ່ອນໂຍນຕໍ່ຄົນທີ່ຮູ້ເທົ່າບໍ່ເຖິງການ ແລະ ຄົນຫລົງຜິດໄດ້ ເພາະເພິ່ນເອງກໍມີຄວາມອ່ອນແອເໝືອນກັນ. ດ້ວຍເຫດນີ້ ມະຫາປະໂລຫິດຈຶ່ງຕ້ອງຖວາຍເຄື່ອງບູຊາສຳລັບບາບຂອງຕົນເອງເຊັ່ນດຽວກັນກັບບາບຂອງປະຊາຊົນ. ບໍ່ມີຜູ້ໃດເອົາຕຳແໜ່ງອັນມີກຽດນີ້ມາເປັນຂອງຕົນເອງໄດ້, ແຕ່ລາວໄດ້ຮັບກຽດນີ້ເມື່ອພຣະເຈົ້າເອີ້ນ ເໝືອນກັບທີ່ອາໂຣນໄດ້ຮັບ.
ໃນທຳນອງດຽວກັນ, ພຣະຄຣິດເຈົ້າບໍ່ໄດ້ຍົກພຣະອົງເອງຂຶ້ນຮັບກຽດແຫ່ງການເປັນມະຫາປະໂລຫິດ. ແຕ່ພຣະເຈົ້າກ່າວກັບພຣະອົງວ່າ,
“ທ່ານເປັນບຸດຂອງເຮົາ,
ວັນນີ້ເຮົາໄດ້ກາຍເປັນບິດາຂອງທ່ານ”.1
ແລະ ພຣະອົງກ່າວໄວ້ໃນອີກຕອນໜຶ່ງວ່າ,
“ທ່ານເປັນປະໂລຫິດຕະຫລອດໄປ,
ໃນລຳດັບດຽວກັນກັບເມຄີເຊເດັກ”.2
ໃນລະຫວ່າງວັນທີ່ພຣະເຢຊູເຈົ້າຢູ່ໃນໂລກ, ພຣະອົງໄດ້ຖວາຍຄຳອະທິຖານ ແລະ ຄຳອ້ອນວອນດ້ວຍການຮ້ອງໄຫ້ຢ່າງໜັກ ແລະ ນໍ້າຕາໄຫລຕໍ່ພຣະເຈົ້າຜູ້ສາມາດຊ່ວຍພຣະອົງໃຫ້ພົ້ນຈາກຄວາມຕາຍ ແລະ ພຣະເຈົ້າຮັບຟັງເພາະພຣະເຢຊູເຈົ້າຍອມເຊື່ອຟັງ. ເຖິງແມ່ນວ່າພຣະອົງເປັນພຣະບຸດກໍຕາມ ພຣະອົງກໍຮຽນຮູ້ທີ່ຈະເຊື່ອຟັງຈາກຄວາມທຸກທີ່ພຣະອົງປະເຊີນ. ແລະ ເມື່ອພຣະເຈົ້າໄດ້ເຮັດໃຫ້ພຣະເຢຊູເຈົ້າສົມບູນແບບແລ້ວ ພຣະອົງຈຶ່ງເປັນແຫລ່ງຄວາມພົ້ນນິລັນດອນສຳລັບທຸກຄົນທີ່ເຊື່ອຟັງພຣະອົງ ແລະ ພຣະເຈົ້າແຕ່ງຕັ້ງພຣະອົງເປັນມະຫາປະໂລຫິດໃນລຳດັບດຽວກັນກັບເມຄີເຊເດັກ.
ການເຕືອນບໍ່ໃຫ້ຫລົງໄປ
ພວກເຮົາຍັງມີອີກຫລາຍຢ່າງທີ່ຈະກ່າວກ່ຽວກັບເລື່ອງນີ້, ແຕ່ກໍຍາກທີ່ຈະອະທິບາຍໃຫ້ຈະແຈ້ງແກ່ພວກເຈົ້າ ເພາະວ່າພວກເຈົ້າບໍ່ໄດ້ພະຍາຍາມທີ່ຈະເຂົ້າໃຈ. ແທ້ຈິງແລ້ວ, ເຖິງແມ່ນວ່າຂະນະນີ້ພວກເຈົ້າສົມຄວນຈະເປັນຄູໄດ້ແລ້ວ, ແຕ່ພວກເຈົ້າຍັງຕ້ອງໃຫ້ຄົນອື່ນມາສອນຫລັກຄວາມຈິງເບື້ອງຕົ້ນຂອງພຣະຄຳຂອງພຣະເຈົ້າທັງໝົດອີກຢູ່. ພວກເຈົ້າຍັງຕ້ອງການນ້ຳນົມ ບໍ່ແມ່ນອາຫານແຂງ! ຜູ້ໃດທີ່ຍັງກິນນົມຢູ່, ກໍຍັງເປັນເດັກນ້ອຍ ແລະ ບໍ່ຄຸ້ນເຄີຍກັບຄຳສອນເລື່ອງຄວາມຊອບທຳ. ແຕ່ອາຫານແຂງນັ້ນມີໄວ້ສຳລັບຜູ້ໃຫຍ່, ຜູ້ທີ່ໄດ້ຝຶກຝົນຕົນເອງຢູ່ສະເໝີເພື່ອຈະໄຈ້ແຍກຄວາມດີອອກຈາກຄວາມຊົ່ວ.
Source notes (2)
- Footnote ພສສ 2:7
- Footnote ພສສ 110:4
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.