Biblica® Open Lao Contemporary Version
ປະຖົມມະການ 9
ພຣະເຈົ້າເຮັດພັນທະສັນຍາກັບໂນອາ
ແລ້ວພຣະເຈົ້າໄດ້ອວຍພອນໂນອາ ແລະ ບັນດາລູກຊາຍຂອງເພິ່ນ ໂດຍກ່າວຕໍ່ພວກເຂົາວ່າ, “ຈົ່ງມີລູກຫລານ ແລະ ມີຈໍານວນເພີ່ມຂຶ້ນຈົນເຕັມແຜ່ນດິນໂລກ. ສັດທັງໝົດທີ່ຢູ່ເທິງແຜ່ນດິນໂລກນີ້ ແລະ ນົກທັງໝົດໃນທ້ອງຟ້າ, ສັດເລືອຄານທັງໝົດ ແລະ ປາທັງໝົດໃນທະເລຈະຢ້ານ ແລະ ຫວາດກົວພວກເຈົ້າ; ພວກມັນຖືກມອບໄວ້ໃນມືຂອງພວກເຈົ້າ. ທຸກສິ່ງທີ່ມີຊີວິດ ແລະ ເຄື່ອນໄຫວໄປມາຈະເປັນອາຫານຂອງພວກເຈົ້າ. ເຮົາໄດ້ມອບພືດສີຂຽວໃຫ້ແກ່ພວກເຈົ້າແລ້ວຢ່າງໃດ, ບັດນີ້ ເຮົາກໍມອບທຸກສິ່ງແກ່ພວກເຈົ້າຢ່າງນັ້ນ.
“ແຕ່ເຈົ້າຈະຕ້ອງບໍ່ກິນຊີ້ນທີ່ມີເລືອດອັນເປັນຊີວິດຢູ່ໃນຊີ້ນນັ້ນ. ແລະ ຜູ້ໃດກໍຕາມທີ່ຂ້າພວກເຈົ້າ ບໍ່ວ່າຈະເປັນຄົນ ຫລື ຈະເປັນສັດ ເຮົາຈະໃຫ້ມີການຊົດໃຊ້ຢ່າງແນ່ນອນ. ເຮົາຈະໃຫ້ມີການຊົດໃຊ້ຊີວິດຂອງຄົນອື່ນເໝືອນກັນ.
“ຜູ້ໃດກໍຕາມທີ່ຂ້າມະນຸດ,
ພວກເຂົາກໍຈະຖືກມະນຸດຂ້າ;
ເພາະພຣະເຈົ້າໄດ້ສ້າງມະນຸດຂຶ້ນ
ເປັນພາບສະທ້ອນຂອງພຣະອົງ.
ສ່ວນພວກເຈົ້າ, ຈົ່ງມີລູກຫລານ ແລະ ເພີ່ມຈຳນວນຂຶ້ນ; ທະວີຂຶ້ນ ແລະ ເພີ່ມຫລາຍຂຶ້ນເທິງແຜ່ນດິນໂລກ”.
ແລ້ວພຣະເຈົ້າໄດ້ກ່າວກັບໂນອາ ແລະ ບັນດາລູກຂອງເພິ່ນວ່າ: “ບັດນີ້ ເຮົາຕັ້ງພັນທະສັນຍາຂອງເຮົາກັບພວກເຈົ້າ ແລະ ກັບເຊື້ອສາຍຂອງພວກເຈົ້າຕໍ່ຈາກພວກເຈົ້າ ແລະ ກັບທຸກສິ່ງມີຊີວິດທີ່ຢູ່ກັບພວກເຈົ້າຄື: ບັນດານົກ, ສັດລ້ຽງ ແລະ ສັດປ່າທັງໝົດ, ສັດທັງປວງທີ່ອອກຈາກເຮືອກັບພວກເຈົ້າ ສິ່ງມີຊີວິດທຸກຊະນິດເທິງໂລກນີ້. ເຮົາຕັ້ງພັນທະສັນຍາກັບພວກເຈົ້າວ່າ: ທຸກຊີວິດຈະບໍ່ຖືກທຳລາຍໂດຍນ້ຳຖ້ວມອີກຈັກເທື່ອ; ນ້ຳຈະບໍ່ຖ້ວມ ແລະ ທຳລາຍໂລກອີກຈັກເທື່ອ”.
ແລະ ພຣະເຈົ້າໄດ້ກ່າວວ່າ, “ນີ້ຄືສັນຍາລັກແຫ່ງພັນທະສັນຍາທີ່ເຮົາກຳລັງເຮັດລະຫວ່າງເຮົາກັບເຈົ້າ ແລະ ກັບສິ່ງມີຊີວິດທຸກສິ່ງທີ່ຢູ່ກັບເຈົ້າ, ເປັນພັນທະສັນຍາສຳລັບທຸກຍຸກທີ່ຈະມາເຖິງຄື: ເຮົາໄດ້ຕັ້ງຮຸ້ງກິນນໍ້າຂອງເຮົາໄວ້ໃນເມກ ແລະ ຮຸ້ງກິນນໍ້ານີ້ຈະເປັນສັນຍາລັກແຫ່ງພັນທະສັນຍາລະຫວ່າງເຮົາ ແລະ ໂລກ. ເມື່ອໃດກໍຕາມທີ່ເຮົານຳເມກມາເໜືອໂລກ ແລະ ເມື່ອຮຸ້ງກິນນໍ້າປາກົດຂຶ້ນໃນເມກ, ເຮົາຈະລະນຶກເຖິງພັນທະສັນຍາຂອງເຮົາລະຫວ່າງເຮົາກັບເຈົ້າ ແລະ ກັບສິ່ງມີຊີວິດທຸກຊະນິດ. ນ້ຳຈະບໍ່ມາຖ້ວມເພື່ອທຳລາຍທຸກຊີວິດອີກ. ເມື່ອໃດທີ່ຮຸ້ງກິນນໍ້າປາກົດໃນເມກ, ເຮົາຈະເຫັນຮຸ້ງກິນນໍ້ານັ້ນ ແລະ ຈະລະນຶກເຖິງພັນທະສັນຍານິລັນດອນລະຫວ່າງພຣະເຈົ້າກັບສິ່ງມີຊີວິດທຸກຊະນິດທີ່ຢູ່ເທິງໂລກ”.
ດັ່ງນັ້ນ ພຣະເຈົ້າຈຶ່ງກ່າວແກ່ໂນອາວ່າ, “ນີ້ຄືສັນຍາລັກແຫ່ງພັນທະສັນຍາທີ່ເຮົາໄດ້ຕັ້ງໄວ້ລະຫວ່າງເຮົາກັບທຸກຊີວິດເທິງໂລກ”.
ບັນດາລູກຊາຍຂອງໂນອາ
ບັນດາລູກຊາຍຂອງໂນອາທີ່ອອກມາຈາກເຮືອຄື: ເຊມ, ຮາມ ແລະ ຢາເຟດ. (ຮາມເປັນພໍ່ຂອງການາອານ.) ນີ້ຄືລູກຊາຍທັງສາມຂອງໂນອາ ແລະ ຄົນທັງຫລາຍທີ່ກະແຈກກະຈາຍໄປທົ່ວແຜ່ນດິນໂລກກໍມາຈາກພວກເຂົາ.
ໂນອາ ເປັນຊາວໄຮ່ຊາວນາ, ເພິ່ນເລີ່ມ1ເຮັດສວນອະງຸ່ນ. ເມື່ອເພິ່ນດື່ມເຫລົ້າອະງຸ່ນຂອງສວນອະງຸ່ນແລ້ວ, ເພິ່ນກໍເມົາ ແລະ ນອນເປືອຍກາຍຢູ່ໃນເຕັນຂອງເພິ່ນ. ເມື່ອຮາມຜູ້ເປັນພໍ່ຂອງການາອານເຫັນພໍ່ຂອງຕົນເປືອຍກາຍຢູ່ຈຶ່ງບອກອ້າຍທັງສອງຂອງຕົນທີ່ຢູ່ຂ້າງນອກ. ແຕ່ເຊມກັບຢາເຟດໄດ້ເອົາເຄື່ອງນຸ່ງ ແລະ ພາດເຄື່ອງນຸ່ງນັ້ນໃສ່ບ່າຂອງຕົນ, ແລ້ວພວກເຂົາກໍຍ່າງຖອຍຫລັງ ແລະ ປົກຮ່າງກາຍທີ່ເປືອຍຂອງພໍ່ຂອງຕົນ. ໜ້າຂອງພວກເຂົາແມ່ນຫັນໄປທາງອື່ນເພື່ອຈະໄດ້ບໍ່ເຫັນກາຍຂອງພໍ່ຕົນທີ່ເປືອຍຢູ່.
ເມື່ອໂນອາຕື່ນຈາກເມົາເຫລົ້າອະງຸ່ນ ແລະ ຮູ້ໃນສິ່ງທີ່ລູກຊາຍຫລ້າໄດ້ເຮັດຕໍ່ເພິ່ນ, ເພິ່ນໄດ້ກ່າວວ່າ,
“ຂໍສາບແຊ່ງການາອານ!
ໃຫ້ເປັນຂ້າທາດຕ່ຳຕ້ອຍທີ່ສຸດ
ໃນພີ່ນ້ອງຂອງລາວ”.
ເພິ່ນໄດ້ກ່າວອີກວ່າ,
“ສັນລະເສີນພຣະເຈົ້າຢາເວ, ພຣະເຈົ້າຂອງເຊມ!
ຂໍໃຫ້ການາອານເປັນຂ້າທາດຂອງເຊມ.
ຂໍພຣະເຈົ້າໄດ້ຂະຫຍາຍເຂດແດນຂອງຢາເຟດ.2
ຂໍໃຫ້ຢາເຟດອາໄສຢູ່ໃນເຕັນຂອງເຊມ,
ແລະ ຂໍໃຫ້ການາອານເປັນຂ້າທາດຂອງຢາເຟດ”.
ຫລັງຈາກນ້ຳຖ້ວມ ໂນອາກໍມີຊີວິດຕໍ່ໄປອີກ 350 ປີ. ໂນອາມີຊີວິດຢູ່ລວມທັງໝົດ 950 ປີ, ແລ້ວເພິ່ນກໍໄດ້ຕາຍໄປ.
Source notes (2)
- Footnote ຫລື ເປັນຄົນທຳອິດທີ່
- Footnote ຄຳວ່າ ຢາເຟດ ມີສຽງຄ້າຍຄຳໃນພາສາເຮັບເຣີທີ່ມີຄວາມໝາຍວ່າ ຂະຫຍາຍອອກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.