Biblica® Open Lao Contemporary Version
ອົບພະຍົບ 30
ແທ່ນບູຊາສຳລັບເຜົາເຄື່ອງຫອມ
(ອພຍ 37:25-28)
“ຈົ່ງໃຊ້ໄມ້ກະຖິນເຮັດແທ່ນບູຊາສຳລັບເຜົາເຄື່ອງຫອມ. ແທ່ນນັ້ນຈະຕ້ອງເຮັດເປັນສີ່ຫລ່ຽມ, ຍາວ 1 ສອກ, ກວ້າງ 1 ສອກ ແລະ ສູງ 2 ສອກ1 ເຂົາຂອງແທ່ນໃຫ້ເຮັດເປັນເນື້ອດຽວກັນກັບແທ່ນ. ຈົ່ງໂອບດ້ານເທິງ, ດ້ານຂ້າງທຸກດ້ານ ແລະ ເຂົາຕ່າງໆດ້ວຍຄຳບໍລິສຸດ, ແລ້ວເຮັດຂອບຄຳອ້ອມແທ່ນບູຊາ. ຈົ່ງເຮັດບ້ວງຄຳສອງອັນໃສ່ກ້ອງຂອບແທ່ນທັງສອງດ້ານ ຄືຂ້າງລະສອງອັນ ເພື່ອສອດຄານຫາມເວລາເຄື່ອນຍ້າຍແທ່ນ. ຈົ່ງເຮັດຄານຫາມດ້ວຍໄມ້ກະຖິນ ແລະ ໂອບຄານຫາມນັ້ນດ້ວຍຄຳ. ຈົ່ງຕັ້ງແທ່ນບູຊານີ້ໄວ້ຕໍ່ໜ້າຜ້າກັ້ງທີ່ບັງຫີບພັນທະສັນຍາ ຄືຢູ່ຕໍ່ໜ້າທີ່ນັ່ງແຫ່ງພຣະຄຸນທີ່ຢູ່ເໜືອແຜ່ນຫີນແຫ່ງພັນທະສັນຍາ ບ່ອນທີ່ເຮົາຈະພົບກັບເຈົ້າ.
“ອາໂຣນຕ້ອງເຜົາເຄື່ອງຫອມເທິງແທ່ນບູຊາທຸກໆເຊົ້າເວລາທີ່ລາວມາບົວລະບັດຕະກຽງ. ລາວຕ້ອງເຜົາເຄື່ອງຫອມອີກເທື່ອໜຶ່ງເວລາທີ່ລາວມາໄຕ້ຕະກຽງໃນເວລາເລີ່ມຄໍ່າ ເພື່ອເຄື່ອງຫອມນັ້ນຈະໄໝ້ຢູ່ສະເໝີຕໍ່ໜ້າພຣະເຈົ້າຢາເວຕະລອດໄປທຸກຊົ່ວອາຍຸ. ຢ່າຖວາຍເຄື່ອງຫອມ ຫລື ເຄື່ອງເຜົາບູຊາ ຫລື ເຄື່ອງຖວາຍພືດຜົນເປັນເມັດໃດໆເທິງແທ່ນບູຊານີ້ ແລະ ຢ່າເທເຄື່ອງດື່ມຖວາຍບູຊາເທິງແທ່ນບູຊານີ້. ອາໂຣນຈະເຮັດພິທີຊຳລະມົນທິນຂອງເຂົາທີ່ຢູ່ແທ່ນບູຊາປີລະເທື່ອ. ການເຮັດພິທີຊຳລະມົນທິນປະຈຳປີນີ້ຕ້ອງໃຊ້ເລືອດຂອງເຄື່ອງບູຊາໄຖ່ບາບ2ຕະຫລອດໄປທຸກຍຸກ. ແທ່ນບູຊານີ້ເປັນແທ່ນບໍລິສຸດທີ່ສຸດແກ່ພຣະເຈົ້າຢາເວ”.
ເງິນຄ່າໄຖ່ຊີວິດ
ແລ້ວພຣະເຈົ້າຢາເວໄດ້ເວົ້າກັບໂມເຊວ່າ, “ເມື່ອເຈົ້າສຳຫລວດສຳມະໂນຄົວຊາວອິດສະຣາເອນເພື່ອນັບຈຳນວນພວກເຂົານັ້ນ, ທຸກຄົນຕ້ອງຈ່າຍຄ່າໄຖ່ຊີວິດຂອງຕົນໃຫ້ແກ່ພຣະເຈົ້າຢາເວໃນເວລາທີ່ຜູ້ນັ້ນຖືກນັບ. ແລ້ວໄພພິບັດຈະບໍ່ມາຖືກພວກເຂົາເມື່ອເຈົ້ານັບຈຳນວນພວກເຂົາແລ້ວ. ແຕ່ລະຄົນທີ່ຜ່ານການນັບແລ້ວຈະຕ້ອງຈ່າຍຄ່າໄຖ່ຊີວິດເປັນເງິນເຄິ່ງເຊເຂວ,3 ອີງຕາມເຊເຂວຂອງສະຖານນະມັດສະການ, ເຊິ່ງມີນໍ້າໜັກ 20 ເກຣາ. ເງິນເຄິ່ງເຊເຂວນີ້ແມ່ນເຄື່ອງຖວາຍແກ່ພຣະເຈົ້າຢາເວ. ທຸກຄົນທີ່ຜ່ານການຂຶ້ນທະບຽນແລ້ວ, ຄືຜູ້ທີ່ມີອາຍຸຊາວປີ ຫລື ຫລາຍກວ່ານັ້ນ, ຈະຕ້ອງມອບເຄື່ອງຖວາຍແກ່ພຣະເຈົ້າຢາເວ. ຄົນຮັ່ງມີກໍບໍ່ຕ້ອງຖວາຍເກີນເຄິ່ງເຊເຂວ ແລະ ຄົນຍາກຈົນກໍບໍ່ຕ້ອງມອບໃຫ້ຫລຸດກວ່ານັ້ນ ເມື່ອພວກເຈົ້າເຮັດເຄື່ອງຖວາຍແກ່ພຣະເຈົ້າຢາເວເພື່ອເປັນຄ່າໄຖ່ໃຫ້ແກ່ຊີວິດຂອງພວກເຈົ້າ. ຈົ່ງຮັບເງິນຄ່າລຶບລ້າງບາບຈາກຊາວອິດສະຣາເອນ ແລະ ໃຊ້ເງິນນັ້ນສຳລັບບົວລະບັດເຕັນນັດພົບ. ສິ່ງນີ້ຈະເປັນທີ່ລະນຶກສຳລັບຊາວອິດສະຣາເອນຕໍ່ໜ້າພຣະເຈົ້າຢາເວ, ເປັນການເຮັດພິທີລຶບລ້າງບາບໃຫ້ແກ່ຊີວິດຂອງພວກເຈົ້າ”.
ອ່າງສຳລັບຊຳລະ
ແລ້ວພຣະເຈົ້າຢາເວໄດ້ເວົ້າກັບໂມເຊວ່າ, “ຈົ່ງເຮັດອ່າງທອງສຳລິດດ້ວຍຖານຮອງຮັບທອງສຳລິດເພື່ອການຊຳລະ. ຈົ່ງວາງອ່າງນັ້ນໄວ້ລະຫວ່າງເຕັນນັດພົບກັບແທ່ນບູຊາ, ແລ້ວເອົານ້ຳໃສ່ໃນອ່າງນັ້ນ. ອາໂຣນ ແລະ ບັນດາລູກຊາຍລາວຈະໃຊ້ນ້ຳນັ້ນລ້າງມືລ້າງຕີນຂອງພວກເຂົາ. ເມື່ອໃດກໍຕາມທີ່ພວກເຂົາເຂົ້າໄປໃນເຕັນນັດພົບ, ພວກເຂົາຈະຊຳລະດ້ວຍນ້ຳເພື່ອວ່າພວກເຂົາຈະບໍ່ຕາຍ. ເຊັ່ນດຽວກັນກັບເມື່ອພວກເຂົາເຂົ້າໃກ້ແທ່ນບູຊາເພື່ອບົວລະບັດຮັບໃຊ້ໂດຍການຖວາຍເຄື່ອງບູຊາດ້ວຍໄຟແກ່ພຣະເຈົ້າຢາເວ, ພວກເຂົາຈະລ້າງມື ແລະ ຕີນຂອງພວກເຂົາເພື່ອວ່າພວກເຂົາຈະບໍ່ຕາຍ. ນີ້ຈະຕ້ອງເປັນຂໍ້ປະຕິບັດຖາວອນສຳລັບອາໂຣນ ແລະ ເຊື້ອສາຍຂອງເຂົາຕະຫລອດໄປທຸກຍຸກ”.
ນ້ຳມັນເຈີມ
ແລ້ວພຣະເຈົ້າຢາເວກໍໄດ້ເວົ້າກັບໂມເຊວ່າ, “ຈົ່ງນຳເຄື່ອງຫອມຢ່າງດີດັ່ງຕໍ່ໄປນີ້ຄື: ຢາງໄມ້ຫອມ 500 ເຊເຂວ,4 ອົບເຊີຍຫອມ ແລະ ຫົວສີໄຄຫອມຢ່າງລະເຄິ່ງຂອງຢາງໄມ້ຫອມ (ຄື ປະມານ 250 ເຊເຂວ),5 ກາລະບູນ 500 ເຊເຂວ ທັງໝົດນີ້ແມ່ນອີງຕາມເຊເຂວຂອງສະຖານນະມັດສະການ ແລະ ນ້ຳມັນໝາກກອກໜຶ່ງຮິນ.6 ຈົ່ງເອົາເຄື່ອງເຫລົ່ານີ້ມາປຸງເປັນນ້ຳມັນເຈີມສັກສິດ, ເປັນນ້ຳຫອມທີ່ປຸງຕາມສິລະປະຂອງຊ່າງປຸງນ້ຳຫອມ. ສິ່ງນີ້ຈະເປັນນ້ຳມັນເຈີມສັກສິດ. ແລ້ວຈົ່ງໃຊ້ນ້ຳມັນເຈີມສັກສິດນີ້ເຈີມເຕັນນັດພົບ, ຫີບພັນທະສັນຍາ, ໂຕະ ແລະ ເຄື່ອງໃຊ້ຕ່າງໆທັງໝົດທີ່ຢູ່ໃນນັ້ນ, ຫລັກຕະກຽງ ແລະ ອຸປະກອນຕ່າງໆທີ່ຢູ່ໃນນັ້ນ, ແທ່ນເຜົາເຄື່ອງຫອມ, ແທ່ນເຜົາເຄື່ອງບູຊາ ແລະ ພາຊະນະຮັບໃຊ້ຢູ່ໃນນັ້ນ, ອ່າງທອງສຳລິດພ້ອມດ້ວຍຖານຮອງອ່າງ. ເຈົ້າຈະຕ້ອງຊຳລະສິ່ງເຫລົ່ານີ້ເພື່ອສິ່ງເຫລົ່ານີ້ຈະບໍລິສຸດທີ່ສຸດ ແລະ ສິ່ງໃດກໍຕາມທີ່ສຳພັດສິ່ງເຫລົ່ານີ້ຈະບໍລິສຸດ.
“ຈົ່ງເຈີມອາໂຣນ ແລະ ບັນດາລູກຊາຍຂອງລາວ ແລະ ຊຳລະພວກເຂົາໃຫ້ບໍລິສຸດເພື່ອວ່າພວກເຂົາຈະຮັບໃຊ້ເຮົາໃນຖານະບັນດາປະໂລຫິດ. ຈົ່ງເວົ້າກັບຊາວອິດສະຣາເອນວ່າ, ‘ນີ້ຄືນ້ຳມັນເຈີມສັກສິດຂອງເຮົາຕະຫລອດໄປທຸກຍຸກ. ຢ່າຖອກນ້ຳມັນນີ້ລົງໃສ່ຮ່າງກາຍຄົນໃດ ແລະ ຢ່າປຸງນ້ຳມັນອື່ນໃດໂດຍໃຊ້ສູດດຽວກັນນີ້. ນ້ຳມັນນີ້ເປັນນ້ຳມັນສັກສິດ ແລະ ເຈົ້າຈະຕ້ອງຖືວ່ານ້ຳມັນນີ້ສັກສິດ. ຜູ້ໃດກໍຕາມທີ່ເຮັດນ້ຳມັນຫອມຢ່າງນີ້ ແລະ ນຳໄປໃຊ້ກັບຄົນອື່ນທີ່ບໍ່ແມ່ນປະໂລຫິດຕ້ອງຖືກຕັດອອກຈາກທ່າມກາງພວກເຂົາ’ ”.
ເຄື່ອງຫອມ
ແລ້ວພຣະເຈົ້າຢາເວໄດ້ເວົ້າກັບໂມເຊວ່າ, “ຈົ່ງນຳເຄື່ອງເທດທີ່ມີກິ່ນຫອມຄື: ຢາງໄມ້ຫອມ, ນ້ຳມັນຊາມົດ, ມະຫາຫິງ ແລະ ກຳຍານບໍລິສຸດ, ໃຫ້ໄດ້ຈຳນວນເທົ່າກັນທັງໝົດ, ແລະ ປຸງເປັນເຄື່ອງຫອມຕາມສິລະປະຂອງປຸງນໍ້າຫອມ. ເຄື່ອງຫອມຈະຕ້ອງປະສົມດ້ວຍເກືອແລ້ວຈຶ່ງບໍລິສຸດ ແລະ ສັກສິດ. ຈົ່ງບົດສ່ວນໜຶ່ງຂອງສິ່ງນັ້ນເປັນແປ້ງແລ້ວວາງໄວ້ຕໍ່ໜ້າຫີບພັນທະສັນຍາໃນເຕັນນັດພົບ, ບ່ອນທີ່ເຮົາຈະມາພົບກັບເຈົ້າ. ເຄື່ອງຫອມນີ້ຈະຕ້ອງບໍລິສຸດທີ່ສຸດສຳລັບເຈົ້າ. ຢ່າປຸງເຄື່ອງຫອມໃດດ້ວຍສູດນີ້ເພື່ອຕົນເອງ; ຈົ່ງຖືວ່າເຄື່ອງຫອມນີ້ສັກສິດແກ່ພຣະເຈົ້າຢາເວ. ຜູ້ໃດກໍຕາມທີ່ເຮັດເຄື່ອງຫອມແບບນີ້ໄວ້ເພື່ອມີຄວາມສຸກກັບກິ່ນຫອມນັ້ນຈະຕ້ອງຖືກຕັດອອກຈາກທ່າມກາງພວກເຂົາ”.
Source notes (6)
- Footnote ຄື ກວ້າງ ແລະ ຍາວປະມານ 45 ເຊັນ ສູງປະມານ 90 ເຊັນ
- Footnote ຫລື ເຄື່ອງຖວາຍຊຳລະລ້າງບາບ
- Footnote ຄື ປະມານ 5,8 ກຣາມ ເຊັ່ນດຽວກັບຂໍ້ 15
- Footnote ຫລື ປະມານ 5,8 ກິໂລ; ເໝືອນກັນກັບຂໍ້ 24
- Footnote ຫລື ປະມານ 2,9 ກິໂລ
- Footnote ຫລື ປະມານ 3,8 ລິດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.